Read Bhaibheri Dzvene MuChiShona Chanhasi Ruka 1 Bible Online

Ruka 1 - Bhaibheri Dzvene MuChiShona Chanhasi bible

Ruka 1

¹Vazhinji vakaedza kurondedzera nhoroondo dzezvinhu zvakaitika pakati pedu,

²sokuturirwa kwazvakaitwa kwatiri neavo vakazviona kubva pakutanga naivozve vari varanda veshoko.

³Naizvozvo, sezvo neniwo ndakanyatsoongorora zvose kubva pakutanga, ndakati zvakanakawo kuti ndikunyorerei imi Tiofiro mune mukurumbira, nhoroondo ndichinyatsotevedzanisa,

⁴kuitira kuti mugoziva chokwadi chezvinhu zvamakadzidziswa.

⁵Panguva yaHerodhi mambo weJudhea kwakanga kuno muprista ainzi Zekaria, akanga ari weboka rouprista hwaAbhija; mukadzi wake Erizabheti akanga ari chizvarwa chaAroni.

⁶Vose vakanga vakarurama pamberi paMwari, vachichengeta mirayiro yaShe yose nezvaakatema, vasina zvavangapomerwa.

⁷Asi vakanga vasina vana, nokuti Erizabheti akanga asingabereki; uye vose vari vaviri vakanga vachembera kwazvo.

⁸Mumwe musi Zekaria akati ari pabasa reboka rake achibata somuprista pamberi paMwari,

⁹akasarudzwa nomujenya, maererano netsika youprista, kuti aende andopisa zvinonhuhwira mutemberi yaShe.

¹⁰Uye nguva yokupisa zvinonhuhwira yakati yasvika, vanamati vose vakaungana panze vachinyengetera.

¹¹Ipapo mutumwa waShe akazviratidza kwaari, akamira kurutivi rworudyi rwearitari yezvinonhuhwira.

¹²Zekaria akati achimuona, akavhunduka uye akabatwa nokutya.

¹³Asi mutumwa akati kwaari, “Usatya, Zekaria; munyengetero wako wanzwikwa. Mukadzi wako Erizabheti achakuberekera mwanakomana, uye unofanira kumutumidza zita rokuti Johani.

¹⁴Achava mufaro nokufarisisa kwamuri, uye vazhinji vachafara nokuda kwokuberekwa kwake,

¹⁵nokuti achava mukuru pamberi paShe. Haafaniri kutongonwa waini kana zvinonwiwa zvose zvakaviriswa, uye achazadzwa noMweya Mutsvene kunyange kubva pakuberekwa kwake.

¹⁶Achadzorera vanhu vazhinji vaIsraeri kuna She Mwari wavo.

¹⁷Uye achafamba pamberi paShe, mumweya nomusimba raEria, kuti adzorere mwoyo yamadzibaba kuvana vavo uye kuti vasingateereri vadzokere kuuchenjeri hwavakarurama, kuti agadzirire vanhu vakagadzirirwa kugamuchira Ishe.”

¹⁸Zekaria akabvunza mutumwa akati, “Ndichazviziva seiko izvi? Ini ndava murume mutana uye mukadzi wangu achembera kwazvo.”

¹⁹Mutumwa akapindura akati, “Ndini Gabhurieri. Ndinomira pamberi paMwari, uye ndatumwa kuti ndizotaura newe, ndizokuudza nhau dzakanaka idzi.

²⁰Uye iye zvino uchava chimumumu uye uchatadza kutaura kusvikira pazuva razvichaitika, nokuti hauna kutenda mashoko angu, iwo achaitika nenguva yawo.”

²¹Zvichakadaro, vanhu vakanga vakamirira Zekaria vakashamiswa kuti akanga atora nguva yakareba kudai seiko ari mutemberi.

²²Akati abuda, akasagona kutaura navo. Vakazviona kuti akanga aona chiratidzo mutemberi, nokuti akaramba achitaura navo namaoko, uye akaramba ari chimumumu asingagoni kutaura.

²³Nguva yokushumira kwake yakati yapera, akadzokera kumba kwake.

²⁴Shure kwaizvozvo, mukadzi wake Erizabheti akava nemimba uye akazvivanza kwemwedzi mishanu.

²⁵Akati mumwoyo make, “Ishe andiitira izvi. Mumazuva ano akaratidza nyasha dzake uye akabvisa kunyadziswa kwangu pakati pavanhu.”

²⁶Mumwedzi wechitanhatu, Mwari akatuma mutumwa Gabhurieri kuNazareta, guta riri muGarirea,

²⁷kumhandara yakanga yatsidzirwa kuwanikwa nomurume ainzi Josefa, chizvarwa chaDhavhidhi. Zita remhandara iyi rainzi Maria.

²⁸Mutumwa akasvika kwaari akati, “Kwaziwa, iwe wakanzwirwa nyasha zvikuru! Ishe anewe.”

²⁹Maria akatambudzika zvikuru namashoko ake uye akashamiswa kuti kukwazisa kwakadai ndekworudzii.

³⁰Asi mutumwa akati kwaari, “Usatya, Maria, iwe wanzwirwa nyasha naMwari.

³¹Uchava nomwana uye uchazvara mwanakomana, ugomutumidza zita rokuti Jesu.

³²Achava mukuru uye achanzi Mwanakomana weWokumusoro-soro. Ishe Mwari achamupa chigaro choushe chababa vake Dhavhidhi,

³³uye achatonga pamusoro peimba yaJakobho nokusingaperi; umambo hwake hahungatongogumi.”

³⁴Maria akabvunza mutumwa akati, “Ko, izvi zvichaitika seiko sezvo ini ndiri mhandara?”

³⁵Mutumwa akapindura achiti, “Mweya Mutsvene achauya pamusoro pako, uye simba reWokumusoro-soro richakufukidza. Saka mutsvene achazvarwa achanzi Mwanakomana waMwari.

³⁶Kunyange hama yako Erizabheti achava nomwana pamazuva okukwegura kwake, uye mwedzi uno ndowechitanhatu kuna iye ainzi asingabereki.

³⁷Nokuti hakuna chinhu chisingagonekwi naMwari.”

³⁸Maria akati, “Ini ndiri muranda waShe. Ngazviitike hazvo kwandiri sezvamareva.” Ipapo mutumwa akabva paari.

³⁹Panguva iyoyo Maria akagadzirira ndokukurumidza kuenda kune rimwe guta romunyika yezvikomo yeJudhea,

⁴⁰uko kwaakasvikopinda mumba maZekaria akakwazisa Erizabheti.

⁴¹Erizabheti akati anzwa kukwazisa kwaMaria, mwana akakwakuka mudumbu make, ipapo Erizabheti akazadzwa noMweya Mutsvene.

⁴²Akadanidzira nenzwi guru achiti, “Wakaropafadzwa iwe pakati pavakadzi, uye akaropafadzwa mwana wauchazvara!

⁴³Asi ini ndanzwirwawo nyasha seiko, zvokuti mai vaShe wangu vauye kwandiri?

⁴⁴Pangosvika inzwi rokukwazisa kwenyu munzeve dzangu mwana ari mudumbu mangu abva akwakuka nomufaro.

⁴⁵Akaropafadzwa iye akatenda kuti zvakataurwa kwaari naShe zvichaitika!”

⁴⁶Maria akati: “Mwoyo wangu unokudza Ishe

⁴⁷uye mweya wangu unofara muna Mwari Muponesi wangu,

⁴⁸nokuti akanga ane hanya nokuninipiswa kwomurandakadzi wake. Kubva zvino marudzi ose achanditi ndakaropafadzwa,

⁴⁹nokuti Iye Wamasimba andiitira zvinhu zvikuru, zita rake idzvene.

⁵⁰Ngoni dzake dzinosvika kuna avo vanomutya, kubva kune chimwe chizvarwa kusvikira kune chimwe chizvarwa.

⁵¹Iye akaita mabasa esimba noruoko rwake; akaparadzira avo vanozvikudza mundangariro dzemwoyo yavo.

⁵²Akabvisa vatongi pazvigaro zvavo, asi akasimudzira vanozvininipisa.

⁵³Akagutsa vane nzara nezvinhu zvakanaka, asi akadzinga vapfumi vasina chinhu.

⁵⁴Akabatsira muranda wake Israeri, achirangarira kuva nengoni,

⁵⁵kuna Abhurahama nezvizvarwa zvake nokusingaperi, kunyange sezvaakareva kumadzibaba edu.”

⁵⁶Maria akagara naErizabheti kwemwedzi inenge mitatu uye mushure maizvozvo akazodzokera zvake kumusha.

⁵⁷Nguva yakati yasvika yokuti Erizabheti ave nomwana, akazvara mwana mukomana.

⁵⁸Vavakidzani vake nehama dzake vakanzwa kuti Ishe akanga amunzwira ngoni huru, vakafara pamwe chete naye.

⁵⁹Pazuva rorusere vakauya kuzodzingisa mwana, uye vakanga vachizomutumidza zita rababa vake Zekaria,

⁶⁰asi mai vake vakati, “Kwete! Anofanira kunzi Johani.”

⁶¹Ivo vakati kwaari, “Pakati pehama dzenyu hapana munhu ane zita iroro.”

⁶²Ipapo vakaninira namaoko kuna baba vake, kuti vazive zita raaida kupa mwana.

⁶³Akavakumbira pokunyorera, akanyora kuti “Zita rake ndiJohani” uye vose vakashamiswa nazvo.

⁶⁴Pakarepo muromo wake wakazarurwa uye rurimi rwake rukasunungurwa, akatanga kutaura, achirumbidza Mwari.

⁶⁵Vavakidzani vose vakazadzwa nokutya, nomunyika yose yezvikomo yeJudhea vanhu vakataura pamusoro pezvinhu izvi zvose.

⁶⁶Vanhu vose vakazvinzwa vakashamiswa nazvo, vakati, “Mwana uyu achava akadiniko?” Nokuti ruoko rwaShe rwaiva naye.

⁶⁷Zekaria baba vake vakazadzwa noMweya Mutsvene uye vakaprofita vachiti:

⁶⁸“Ishe, Mwari waIsraeri ngaakudzwe, nokuti akauya akadzikinura vanhu vake.

⁶⁹Akatisimudzira runyanga rworuponeso muimba yomuranda wake Dhavhidhi,

⁷⁰sezvaakataura kubudikidza navaprofita vake vatsvene vekare,

⁷¹iko kuponeswa kubva kuvavengi vedu naparuoko rwavose vanotivenga,

⁷²kunzwira madzibaba edu ngoni nokurangarira sungano yake tsvene,

⁷³mhiko yaakapikira baba vedu Abhurahama:

⁷⁴kutinunura kubva muruoko rwavavengi vedu, uye kutigonesa kuti timushumire tisingatyi,

⁷⁵muutsvene nokururama pamberi pake mazuva edu ose.

⁷⁶“Uye iwe, mwana wangu, uchanzi muprofita weWokumusoro-soro; nokuti uchatungamira pamberi paShe kuti umugadzirire nzira,

⁷⁷kuti ape vanhu vake ruzivo rworuponeso kubudikidza nokuregererwa kwezvivi zvavo,

⁷⁸nokuda kwomwoyo munyoro waMwari wedu, naye zuva richatibudira richibva kudenga,

⁷⁹kuti rivhenekere pamusoro paavo vagere murima nomumumvuri worufu, uye kuti usesedze tsoka dzedu munzira yorugare.”

⁸⁰Uye mwana akakura akava nesimba mumweya; uye akagara mugwenga kusvikira azoonekwa pachena kuvaIsraeri.