Read Bhaibheri Dzvene MuChiShona Chanhasi Dhuteronomi 14 Bible Online

Dhuteronomi 14 - Bhaibheri Dzvene MuChiShona Chanhasi bible

Dhuteronomi 14

¹Imi muri vana vaJehovha Mwari wenyu. Musazvicheka kana kuzviveura pamberi pomusoro muchiitira vakafa,

²nokuti muri rudzi rutsvene kuna Jehovha Mwari wenyu. Jehovha akakutsaurai kubva pakati pendudzi dzose dziri panyika kuti muve rudzi rwake runokosha.

³Musadya chinhu chipi zvacho chinonyangadza.

⁴Idzi ndidzo mhuka dzamungadya: mombe, hwai, mbudzi,

⁵nondo, mhara, mhembwe, ngururu, mharapara, nyati nehwai yomugomo.

⁶Mungadya henyu mhuka ipi neipi ina mahwanda akaparadzana kuita maviri uye inodzeya.

⁷Zvisinei, pane idzo dzinodzeya kana dzina mahwanda akaparadzana, mahwanda akanyatsoparadzana, hamufaniri kudya ngamera, tsuro kana mbira. Kunyange zvazvo dzichidzeya hadzina mahwanda akaparadzana; hadzina kuchena kwamuri.

⁸Nguruvewo haina kuchena; kunyange zvayo ina mahwanda akaparadzana, haidzeyi. Hamufaniri kudya nyama yadzo kana kubata zvitunha zvadzo.

⁹Pazvipuka zvose zvinogara mumvura, mungadya henyu zvose zvine zvimbi namakwande.

¹⁰Asi chipi nechipi zvacho chisina zvimbi namakwande hamufaniri kudya; nokuti hachina kuchena.

¹¹Mungadya henyu shiri ipi neipi yakachena.

¹²Asi dzamusingafaniri kudya ndeidzi: gondo, gora, gora dema,

¹³njerere tsvuku, njerere nhema, rukodzi namarudzi arwo,

¹⁴gunguo namarudzi aro ose,

¹⁵zizi renyanga, kazizimbori, shiri yegungwa, namarudzi ose eruvangu,

¹⁶zizi duku, zizi guru, zizi jena,

¹⁷zizi romurenje, hukurwizi nekanyururahove,

¹⁸neshuramurove namarudzi ose ekondo, nemhupupu uye nechiremwaremwa.

¹⁹Zvipuka zvose zvina mapapiro zvinokambaira hazvina kuchena kwamuri; hamufaniri kuzvidya.

²⁰Asi zvipuka zvose zvina mapapiro zvakachena mungadya henyu.

²¹Musadya chii zvacho chamunoona chakafa. Mungapa zvenyu kumutorwa agere mune rimwe ramaguta enyu, uye angadya zvake kana kuti mungatengesera zvenyu kumutorwa. Asi imi muri rudzi rutsvene kuna Jehovha Mwari wenyu. Musabika mbudzana mumukaka wamai vayo.

²²Chenjera kuti utsaure chegumi chezvinhu zvose zvaunokohwa muminda yako gore negore.

²³Udye chegumi chezviyo, newaini itsva namafuta uye nezvibereko zvokutanga zvemombe dzako nezvamakwai ako pamberi paJehovha Mwari wako panzvimbo yaachasarudza kuti Zita rake rigarepo, kuitira kuti udzidze kutya Jehovha Mwari wako nguva dzose.

²⁴Asi kana nzvimbo yacho iri kure uye waropafadzwa naJehovha Mwari wako, uye usingagoni kutakura chegumi chako (nokuti nzvimbo ichasarudzwa naJehovha kuti Zita rake rigarepo iri kure),

²⁵ipapo unofanira kutsinhanisa chegumi chako nesirivha, ugotora sirivha ugoenda nayo kunzvimbo ichasarudzwa naJehovha Mwari wako.

²⁶Shandisa sirivha yacho kutenga zvaungada, zvakadai sezvizvi: mombe, makwai, waini kana zvimwe zvokunwa zvinobata, kana chinhu chipi zvacho chaunoda. Ipapo iwe neimba yako muchadya pamberi paJehovha Mwari wenyu mugofara.

²⁷Uye musazokanganwa vaRevhi vagere mumaguta enyu, nokuti havana mugove kana nhaka yavowo.

²⁸Panopera makore matatu oga oga, munofanira kuuya nezvegumi zvegore iroro uye mugozvichengetera mumaguta enyu,

²⁹kuitira kuti vaRevhi (avo vasina mugove kana nhaka yavowo) uye nomweni, nherera nechirikadzi vanogara mumaguta enyu, vauye vagodya vachiguta, uye kuitira kuti Jehovha Mwari wenyu akuropafadzei pamabasa ose amaoko enyu.