Read Bhaibheri Dzvene MuChiShona Chanhasi VaRoma 12 Bible Online

VaRoma 12 - Bhaibheri Dzvene MuChiShona Chanhasi bible

VaRoma 12

¹Naizvozvo, ndinokumbira zvikuru kwamuri, hama dzangu, netsitsi dzaMwari, kuti mupe miviri yenyu sechibayiro chipenyu, chitsvene uye chinofadza Mwari, uku ndiko kunamata kwenyu kwomweya.

²Musaramba muchizvienzanisa namaitiro enyika ino, asi mushandurwe nokuvandudzwa kwepfungwa dzenyu. Ipapo muchakwanisa kuti muedze uye mugoziva kuti kuda kwaMwari ndokupi, kuda kwake kwakanaka, kunomufadza uye kwakakwana.

³Nokuti nenyasha dzandakapiwa ndinoti kuno mumwe nomumwe wenyu: Usazviisa pamusoro kupfuura paunofanira kunge uri, asi ufunge nokufunga kwakachenjera, maererano nechiyero chokutenda chawakapiwa naMwari.

⁴Nokuti sezvatino muviri mumwe une mitezo mizhinji, uye mitezo iyi yose haina basa rimwe chete,

⁵saizvozvowo muna Kristu isu tiri vazhinji, tinoumba muviri mumwe chete, uye mutezo mumwe nomumwe mutezo wavamwe.

⁶Tine zvipo zvakasiyana-siyana, maererano nepatakapiwa napo nyasha. Kana chipo chomunhu kuri kuprofita, ngaachishandise maererano nokutenda kwake.

⁷Kana kuri kushumira ngaashumire; kana kuri kudzidzisa, ngaadzidzise;

⁸kana kuri kukurudzira, ngaakurudzire; kana kuri kupa kuna vanoshayiwa, ngaape nomwoyo wose; kana kuri kutungamirira, ngaabate nokushingaira; kana kuri kunzwira ngoni, ngaaite nomufaro.

⁹Rudo ngaruve rwechokwadi. Vengai zvakaipa; namatirai pane zvakanaka.

¹⁰Ivai norudo rukuru mumwe kuno mumwe savadikani. Mumwe nomumwe wenyu ngaakudze mumwe kupfuura kuzvikudza kwaanozviita iye.

¹¹Musatomborega kushingaira, asi pisai pamweya, muchishumira Ishe.

¹²Farai mutariro, tsungirirai pakutambudzika, rambai muchinyengetera.

¹³Goveranai navanhu vaMwari vanoshayiwa. Itirai vaeni rudo.

¹⁴Ropafadzai vanokutambudzai; ropafadzai musatuka.

¹⁵Farai navanofara; chemai navanochema.

¹⁶Garai zvakanaka mumwe nomumwe. Musazvikudza, asi muve nechido chokufambidzana navanhu vapasi pasi. Musazviita vakachenjera.

¹⁷Musatsiva munhu chakaipa nechakaipa. Chenjererai kuti muite zvakanaka pamberi pavanhu vose.

¹⁸Kana zvichibvira, napamunogona napo, ivai norugare navanhu vose.

¹⁹Musatsiva, vadikani vangu, asi siyirai kutsamwa kwaMwari mukana, nokuti kwanyorwa kuchinzi, “Kutsiva ndokwangu; ini ndicharipira,” ndizvo zvinotaura Ishe.

²⁰Asi: “Kana muvengi wako ane nzara mupe zvokudya, kane ane nyota mupe chokunwa. Mukuita izvi, uchatutira mazimbe anopisa pamusoro wake.”

²¹Usakundwa nezvakaipa, asi ukunde zvakaipa nezvakanaka.