Read Bhaibheri Dzvene MuChiShona Chanhasi 1 VaKorinde 12 Bible Online

1 VaKorinde 12 - Bhaibheri Dzvene MuChiShona Chanhasi bible

1 VaKorinde 12

¹Zvino pamusoro pezvipo zvoMweya, hama, handidi kuti muve musingazivi.

²Munoziva kuti pamakanga muri vahedheni, makanga muchitungamirirwa uye nokutsauswa muchiiswa kuzvifananidzo zvisingagoni kutaura.

³Naizvozvo ndinokuudzai kuti hakuna munhu anotaura noMweya waMwari anoti, “Jesu ngaatukwe.” Uye hakuna munhu anoti, “Jesu ndiye Ishe,” asi naMweya Mutsvene.

⁴Kuna marudzi akasiyana ezvipo, asi Mweya ndomumwe.

⁵Kuna marudzi akasiyana oushumiri, asi Ishe mumwe.

⁶Kuna marudzi akasiyana amabasa, asi Mwari mumwe ndiye anoita zvose muvanhu vose.

⁷Zvino mumwe nomumwe anopiwa kuratidzwa kwoMweya kuti vose vabatsirwe.

⁸Nokuti mumwe anopiwa noMweya shoko rouchenjeri, mumwe shoko rokuziva noMweya mumwe chete,

⁹mumwe kutenda noMweya mumwe chete, mumwe zvipo zvokuporesa noMweya mumwe chete,

¹⁰mumwe mabasa esimba, mumwe kuprofita, mumwe kuzivisisa mweya, mumwe kutaura nendimi dzakasiyana-siyana, uyezve mumwe kududzirwa kwendimi.

¹¹Zvose ibasa raMweya mumwe chete uye anopa mumwe nomumwe, sezvaanoda.

¹²Muviri chinhu chimwe chete, kunyange une mitezo mizhinji; uye kunyange mitezo yawo iri mizhinji, inoumba muviri mumwe chete. Ndizvowo zvakaita Kristu.

¹³Nokuti tose takabhabhatidzwa noMweya mumwe mumuviri mumwe, vangava vaJudha kana vaGiriki, varanda kana vakasununguka, uye tose tikapiwa kuti tinwe Mweya mumwe.

¹⁴Zvino muviri hauna kuumbwa nomutezo mumwe, asi mizhinji.

¹⁵Kana rutsoka rukati, “Nokuti handisi ruoko, saka handisi womuviri,” harungaregi kuva chikamu chomuviri nokuda kwechikonzero ichocho.

¹⁶Uye kana nenzeve ikati, “Nokuti handisi ziso, saka handisi chikamu chomuviri,” haringaregi kuva chikamu chomuviri nokuda kwechikonzero ichocho.

¹⁷Kana kuti dai muviri wose waiva ziso, kunzwa kwaizovepiko? Kana kuti dai muviri wose waive nzeve, ko, kunhuhwidza kwaizovepiko?

¹⁸Asi zvino Mwari akaisa mitezo pamuviri, mumwe nomumwe wayo, sezvaakada kuti ive.

¹⁹Kana dai yose waiva mutezo mumwe, ko, muviri waizovepiko?

²⁰Sezvazviri, kune mitezo mizhinji asi muviri mumwe.

²¹Ziso haringati kuruoko, “Handinei newe!” Uye musoro haungati kurutsoka, “Handinei newe!”

²²Asi kutoti mitezo yomuviri inenge isina simba, ndiyo inodikanwa,

²³uye mitezo yatinofunga kuti haikudzwi ndiyo yatinokudza kwazvo,

²⁴asi mitezo yakanaka haidi kushongedzwa. Asi Mwari akabatanidza mitezo yomuviri uye akapa kukudzwa kukuru kumitezo iya isingakudzwi,

²⁵kuitira kuti parege kuva nokupesana pamuviri, asi kuti mitezo ichengetane zvakaenzana.

²⁶Kana mumwe mutezo uchitambudzika, mitezo yose inotambudzika pamwe chete nawo; kana mutezo mumwe ukakudzwa, mitezo yose inofara pamwe chete nawo.

²⁷Zvino imi muri muviri waKristu, uye mumwe nomumwe wenyu mutezo wawo.

²⁸Uye mukereke, Mwari akagadza pakutanga vapostori, vechipiri vaprofita, vechitatu vadzidzisi, tevere vaiti vezvishamiso, uye navane zvipo zvokuporesa, navanobatsira vamwe, vaya vane zvipo zvokufambisa basa, uye navaya vanotaura nendimi dzakasiyana-siyana.

²⁹Vose vapostori here? Vose vaprofita here? Vose vadzidzisi here? Vose vanoita zvishamiso here?

³⁰Vose vane zvipo zvokuporesa here? Vose vanotaura nendimi here? Vose vanodudzira here?

³¹Asi shuvai kwazvo zvipo zvikuru. Uye zvino ndichakuratidzai nzira yakanaka kupfuura dzose.