Read Bhaibheri Dzvene MuChiShona Chanhasi VaGaratia 5 Bible Online

VaGaratia 5 - Bhaibheri Dzvene MuChiShona Chanhasi bible

VaGaratia 5

¹Kristu akatisunungura kuti tive vakasununguka. Zvino, mirai nesimba, murege kuzviremedza zvakare nejoko routapwa.

²Batai mashoko angu! Ini, Pauro, ndinokuudzai kuti kana muchidzingiswa, Kristu haachakosheswi kwamuri napaduku.

³Uyezve, ndinotaura kumunhu wose anoda kudzingiswa kuti anofanira kuteerera murayiro wose.

⁴Imi munoedza kururamisirwa nomurayiro makaparadzaniswa naKristu; makabva panyasha.

⁵Asi nokutenda tinoshinga kwazvo kumirira kururama, kunova ndiko kwatine tariro nako kubudikidza noMweya.

⁶Nokuti muna Kristu Jesu kudzingiswa kana kusadzingiswa hazvina maturo. Chinhu chinokosha chete ndiko kutenda kunozviratidza kubudikidza norudo.

⁷Makanga muchimhanya nhangemutange yakanaka. Ndianiko akakudzivisai uye akakukonesai kuteerera chokwadi?

⁸Kugombedzera ikoko hakuna kubva kuna iye anokudanai.

⁹Mbiriso shoma inovirisa chikanyiwa chose chakakanyiwa.

¹⁰Ndinovimba muna She kuti hamuchazogamuchiri dzimwe pfungwa. Iyeye anokunyonganisai achazviripira mhaka yake, angava ani zvake.

¹¹Hama dzangu, kana ndichiri kuparidza nezvokudzingiswa, ko, ndichiri kutambudzirwei hangu? Naizvozvo kugumbusa kwomuchinjikwa kwabviswa.

¹²Kana vari vaya vanokukuchidzirai, ndaida hangu kuti vazvigure zvinhu zvavo.

¹³Imi, hama dzangu, makadanwa kuti muve vakasununguka. Asi regai kushandisa rusununguko rwenyu munyama; asi shandiranai murudo.

¹⁴Murayiro wose unobatanidzwa mumurayiro mumwe chete unoti: “Ude wokwako sezvaunozvida iwe.”

¹⁵Kana muchiramba muchirumana uye nokudyana, chenjererai kuti murege kuparadzana mumwe nomumwe wenyu.

¹⁶Saka ndinoti, raramai noMweya, uye hamungazofadzi nyama nokuchiva kwayo.

¹⁷Nokuti nyama inoshuva zvinopesana noMweya, uye Mweya anopesanawo nezvinoshuviwa nenyama. Izvi zvinorwisana pachazvo, kuti murege kuita zvamunoda.

¹⁸Asi kana muchitungamirirwa noMweya, hamusi pasi pomurayiro.

¹⁹Mabasa enyama ndiwo aya: upombwe, tsvina, utere;

²⁰kunamata zvifananidzo, uroyi, ruvengo, gakava, godo, kutsamwa, kuzvikudza, kuparadzana, dzidziso dzakatsauka

²¹nokugodorana; kudhakwa, kutamba kwakaipa, nezvimwe zvakadaro. Ndinokuyambirai, sezvandakamboita kare kuti avo vana mararamiro iwaya havangagari nhaka youmambo hwaMwari.

²²Asi chibereko choMweya ndirwo rudo, mufaro, rugare, mwoyo murefu, unyoro, kunaka, kutendeka,

²³kupfava uye kuzvidzora. Hakuna murayiro unopesana nezvizvi.

²⁴Avo vari vaKristu Jesu vakaroverera pamuchinjikwa nyama nokuchiva kwayo uye nezvainoshuva.

²⁵Sezvo tichirarama noMweya, ngatifambei noMweya.

²⁶Ngatiregei kuzvikudza, tichitsamwisana kana kuchiva zvevamwe.