Read Bhaibheri Dzvene MuChiShona Chanhasi VaEfeso 5 Bible Online

VaEfeso 5 - Bhaibheri Dzvene MuChiShona Chanhasi bible

VaEfeso 5

¹Naizvozvo, ivai vateveri vaMwari, savana vanodikanwa

²uye murarame upenyu hworudo, sezvatakadikanwa naKristu akazvipa nokuda kwedu sechipiriso chinonhuhwira uye sechibayiro kuna Mwari.

³Asi pakati penyu hapafaniri kutaurwa kunyange zvoupombwe, kana tsvina yemhando ipi zvayo, kana kukara, nokuti izvi hazvina kunaka kuvanhu vatsvene vaMwari.

⁴Uye hapafaniri kuva nokufunga kusina maturo, kutaura kwoupenzi kana kunemera, izvo zvisina kufanira, asi zviri nani kuvonga.

⁵Nokuti naizvozvi munogona kuva nechokwadi kuti: Hakuna mhombwe, kana munhu ane tsvina kana ane nhafu, munhu akadaro ndiye anonamata zvifananidzo, anowana nhaka muumambo hwaKristu nohwaMwari.

⁶Ngakurege kuva nomunhu anokunyengerai namashoko asina maturo, nokuti nokuda kwezvinhu zvakadaro, kutsamwa kwaMwari kunouya pamusoro peavo vasingateereri.

⁷Naizvozvo musashamwaridzana navo.

⁸Nokuti kare maiva rima, asi zvino mava chiedza muna She. Garai savana vechiedza

⁹(nokuti chibereko chechiedza chino kunaka kwose, kururama nechokwadi)

¹⁰uye muzive zvinofadza Ishe.

¹¹Musayanana namabasa erima, asi zviri nani kuafumura.

¹²Nokuti zvinonyadza kureva zvinoitwa muchivande navana vasingateereri.

¹³Asi zvinhu zvose zvinoratidzwa pachena nechiedza zvinobva zvaonekwa,

¹⁴nokuti chiedza ndicho chinoratidza zvinhu zvose. Ndokusaka zvichinzi: “Muka, iwe muvati, muka kubva kuvakafa, Kristu achavhenekera pauri.”

¹⁵Zvino, muchenjere kuti munorarama sei, kwete savasina kuchenjera asi savakachenjera,

¹⁶muchishandisa mikana yose, nokuti mazuva akaipa.

¹⁷Naizvozvo musava mapenzi, asi munzwisise kuti kuda kwaShe ndokupi.

¹⁸Musadhakwa newaini, nokuti ndipo pano kusazvidzora. Asi, muzadzwe noMweya.

¹⁹Mutaure kuno mumwe nomumwe wenyu namapisarema, nedzimbo uye nenziyo dzomweya. Muimbe uye muridzire Ishe mimhanzi mumwoyo yenyu,

²⁰muchivonga Mwari Baba pazvinhu zvose, muzita raIshe wedu Jesu Kristu.

²¹Muzviise pasi pomumwe nomumwe wenyu muchitya Kristu.

²²Vakadzi, muzviise pasi pavarume venyu sezvamunoita kuna She.

²³Nokuti murume musoro womukadzi saKristu ari musoro wekereke, iwo muviri wake, iyo yaari muponesi wayo.

²⁴Zvino sezvo kereke ichizviisa pasi paKristu, saizvozvowo vakadzi vanofanira kuzviisa pasi pavarume vavo pazvinhu zvose.

²⁵Varume, idai vakadzi venyu, saKristu akada kereke uye akazvipa nokuda kwayo

²⁶kuti aiite tsvene, akaishambidza nokushambidza kwemvura neshoko,

²⁷uye kuti ayiuyise kwaari sekereke inobwinya, isina gwapa kana kuunyana kana chipi zvacho chainopomerwa.

²⁸Nenzira imwe cheteyo, varume vanofanira kuda vakadzi vavo semiviri yavo chaiyo. Uyo anoda mukadzi wake anozvida iye pachake.

²⁹Pana izvozvo zvose, hakuna munhu angavenga muviri wake, asi anoupa zvokudya uye anouchengeta, sezvinoita Kristu kukereke,

³⁰nokuti tiri nhengo dzomuviri wake.

³¹“Nokuda kwaizvozvi, murume achasiya baba namai vake uye asanganiswe nomukadzi, uye vaviri vachava nyama imwe chete.”

³²Ichi ndicho chakavanzika chakadzika, asi ndiri kutaura pamusoro paKristu nekereke.

³³Kunyange zvakadaro, mumwe nomumwe wenyuwo anofanira kuda mukadzi wake sezvaanozvida iye, uye mukadzi anofanira kuremekedza murume wake.