Read Bhaibheri Dzvene MuChiShona Chanhasi VaEfeso 6 Bible Online

VaEfeso 6 - Bhaibheri Dzvene MuChiShona Chanhasi bible

VaEfeso 6

¹Vana, teererai vabereki venyu muna She, nokuti ndizvo zvakanaka.

²“Kudza baba namai vako,” ndiwo murayiro wokutanga une chipikirwa,

³“kuti uitirwe zvakanaka uye kuti ugare upenyu hurefu panyika.”

⁴Vanababa, regai kutsamwisa vana venyu; asi, muvarere mukurovedza nokurayira kwaShe.

⁵Varanda, teererai vatenzi venyu vapanyika noruremekedzo uye nokutya, uye nomwoyo wakatendeka, sokuteerera kwamunoita Kristu.

⁶Musangovateerera kuti vakufarirei pavanenge vachikuonai chete, asi savaranda vaKristu, vanoita kuda kwaMwari zvichibva pamwoyo yavo.

⁷Mushande nomwoyo wose, sokunge munoshandira Ishe, kwete munhu,

⁸nokuti munoziva kuti Ishe achapa mubayiro mumwe nomumwe pane zvose zvakanaka zvaanoita, angava muranda kana akasununguka.

⁹Uye imi vatenzi, mubate varanda venyu nenzira imwe cheteyo. Musavatyisa, sezvo muchiziva kuti Tenzi wavo nowenyu ari kudenga, uye haana rusaruro maari.

¹⁰Pakupedzisira, ivai nesimba muna She nomusimba rake guru.

¹¹Shongai nhumbi dzose dzokurwa nadzo dzaMwari kuti mugogona kumira muchirwa namano adhiabhori.

¹²Nokuti hatirwi nenyama neropa, asi navabati, navanesimba, namasimba enyika ino yerima uye namasimba emweya yakaipa ari muchadenga.

¹³Naizvozvo shongai nhumbi dzose dzokurwa nadzo dzaMwari, kuti panosvika zuva rakaipa, mugokwanisa kumira, uye mushure mokunge maita zvinhu zvose, kuti mumire.

¹⁴Zvino mirai nesimba, makasunga bhanhire rechokwadi muchiuno chenyu, nechidzitiro chechipfuva chokururama,

¹⁵uye tsoka dzenyu dzakashongedzwa negadziriro inobva pavhangeri rorugare.

¹⁶Pamusoro paizvozvi zvose, torai nhoo yokutenda, iyo yamunogona kudzima nayo miseve inopfuta yowakaipa.

¹⁷Torai nguwani yoruponeso nomunondo womweya, iro shoko raMwari.

¹⁸Uye munyengetere muMweya nguva dzose nemhando dzose dzeminyengetero nemikumbiro. Muine izvi mupfungwa dzenyu, murinde uye murambe muchinyengeterera vatsvene.

¹⁹Munyengeterere neniwo, kuti pose pandinoshama muromo wangu, ndipiwe mashoko kuitira kuti ndigozivisa chakavanzika chevhangeri ndisingatyi,

²⁰iro randiri nhume yakasungwa nengetani. Nyengeterai kuti ndiritaure ndisingatyi, sezvandinofanira.

²¹Tikikasi, hama inodikanwa nomuranda akatendeka muna She, achakuudzai zvinhu zvose, kuitira kuti nemiwo muzive zvandiri nezvandinoita.

²²Ndiri kumutuma kwamuri nokuda kwechinangwa ichi, kuti muzive zvatiri, uye kuti akukurudzirei.

²³Rugare kuhama, norudo nokutenda zvinobva kuna Mwari Baba naIshe Jesu Kristu.

²⁴Nyasha kuna vose vanoda Ishe wedu Jesu Kristu norudo rusingaperi.