Read Bhaibheri Dzvene MuChiShona Chanhasi VaFiripi 2 Bible Online

VaFiripi 2 - Bhaibheri Dzvene MuChiShona Chanhasi bible

VaFiripi 2

¹Kana muine kurudziro inobva pakubatana naKristu, kana paine kunyaradza kunobva parudo rwake, kana pano kuwadzana noMweya, kana paino unyoro netsitsi,

²ipapo itai kuti mufaro wangu uzare nokuva nomurangariro wakadaro, muine rudo rumwe chete, muri vamwe mumweya nechinangwa.

³Musaita chinhu nomwoyo wokuchiva kana kuzvikudza, asi mukuzvininipisa muchionawo vamwe kuti vari nani kupfuura imi.

⁴Mumwe nomumwe wenyu ngaarege kungotsvaka zvake chete, asi zvavamwewo.

⁵Kufunga kwenyu ngakuve sokwaKristu Jesu:

⁶Uyo, kunyange aiva Mwari chaiye, haana kufunga kuti kuenzana naMwari chinhu chingabatisiswa,

⁷asi akazviita chinhu pasina, akatora chimiro chomuranda chaiye, akaitwa somunhu.

⁸Uye akati awanikwa ane chimiro chomunhu, akazvininipisa uye akateerera kusvikira pakufa, kunyange rufu pamuchinjikwa.

⁹Naizvozvo Mwari akamukudza panzvimbo yapamusoro-soro, uye akamupa zita riri pamusoro pamazita ose,

¹⁰kuti muzita raJesu mabvi ose apfugame, mudenga napanyika uye napasi penyika,

¹¹uye ndimi dzose dzipupure kuti Jesu Kristu ndiye Ishe, kuti Mwari Baba vakudzwe.

¹²Naizvozvo, shamwari dzangu dzinodiwa, sezvamunogara muchiteerera, kwete ndiripo bedzi, asi zvino zvikuru ndisipo, rambai muchishandira ruponeso rwenyu nokutya nokudedera,

¹³nokuti ndiMwari anoshanda mukati menyu kuti mude uye muite maererano nokuda kwake kwakanaka.

¹⁴Itai zvose musinganyunyuti kana kukakavara,

¹⁵kuitira kuti mugova vasina chavangapomerwa uye vakachena, vana vaMwari vasina mhosva murudzi urwu rwakakombama uye rwakatsauka, rwamunovhenekera senyeredzi munyika

¹⁶sezvamunobatirira pashoko roupenyu, kuitira kuti ndigozvirumbidza pazuva raKristu uye kuti handina kumhanya kana kushanda pasina.

¹⁷Asi kunyange dai ndadururwa hangu sechipiriso chinonwiwa pamusoro pechibayiro noushumiri hunobva pakutenda kwenyu, ndinofara uye ndinofarisisa nemi mose.

¹⁸Saka nemiwo munofanira kufara nokufarisisa neni.

¹⁹Ndine tariro muna Ishe Jesu kuti nditume Timoti kwamuri nokukurumidza, kuti neniwo ndifare pandichanzwa mashoko pamusoro penyu.

²⁰Handina mumwe akaita saye, ane hanya kwazvo nokugara kwenyu kwakanaka.

²¹Nokuti munhu wose anozvitsvakira zvake, zvisati zviri zvaJesu Kristu.

²²Asi munoziva kuti Timoti akaratidza kutendeka kwake, nokuti somwanakomana ana baba vake akashanda neni mubasa revhangeri.

²³Naizvozvo, ndine tariro yokuti ndimutume nokukurumidza kana ndaona kuti zvinhu zvinondifambira sei.

²⁴Ndinovimba muna She kuti ini pachangu ndichauya nokukurumidza.

²⁵Asi ndinofunga kuti zvakafanira kuti nditumirezve kwamuri Epafrodhitasi, hama yangu, mubati pamwe chete neni uye murwi pamwe chete neni, iye nhume yenyuwo, wamakatuma kuti azondibatsira pane zvandaishayiwa.

²⁶Nokuti anokushuvai mose uye ari kutambudzika nokuti makanzwa kuti akanga achirwara.

²⁷Zvechokwadi akanga achirwara, uye akapotsa afa. Asi Mwari akava nengoni naye, uye kwete kwaari oga asi kwandiriwo, kuti ndirege kuva nokusuwa pamusoro pokusuwa.

²⁸Naizvozvo ndinoshinga kwazvo kuti ndimutume, kuti pamunomuonazve mugofara uye ini ndive nokufunganya kushoma.

²⁹Mugamuchirei muna She nomufaro mukuru, uye mukudze munhu akaita saiyeye,

³⁰nokuti akapotsa afa nokuda kwebasa raKristu, akaisa upenyu hwake panjodzi kuti akwanise kubatsira kwamakanga musingagoni kundiitira imi.