Read Bhaibheri Dzvene MuChiShona Chanhasi VaKorose 3 Bible Online

VaKorose 3 - Bhaibheri Dzvene MuChiShona Chanhasi bible

VaKorose 3

¹Sezvo, zvino, makamutswa pamwe chete naKristu, isai mwoyo yenyu pazvinhu zviri kumusoro, uko kugere Kristu kuruoko rworudyi rwaMwari.

²Isai pfungwa dzenyu pazvinhu zviri kumusoro, kwete pazvinhu zvenyika.

³Nokuti makafa, uye upenyu hwenyu hwakavigwa zvino naKristu muna Mwari.

⁴Panoonekwa Kristu, iye upenyu hwenyu, ipapo nemiwo muchaonekwa pamwe chete naye mukubwinya.

⁵Naizvozvo, urayai zvose zvenyu zvenyika zvinoti: upombwe, netsvina, nokusachena, nokuchiva, nokuda zvakaipa uye kukara, ndiko kunamata zvifananidzo.

⁶Nokuda kwaizvozvi, kutsamwa kwaMwari kuri kuuya.

⁷Imi maimbofamba mazviri, muupenyu hwamaimborarama.

⁸Asi zvino munofanira kuzvidzora pane zvose zvakadai sezvizvi zvinoti: kutsamwa, hasha, ruvengo, makuhwa, nokutaura zvakaora zvichibva pamiromo yenyu.

⁹Musareverana nhema, sezvo makabvisa munhu wenyu wekare namabasa ake

¹⁰mukafuka munhu mutsva, ari kuvandudzwa mukuziva, mumufananidzo woMusiki wake.

¹¹Apa hapachina muGiriki kana muJudha, kudzingiswa kana kusadzingiswa, mutorwa kana muSitia, nhapwa kana akasununguka, asi Kristu ndiye zvose, uye ari mune zvose.

¹²Naizvozvo savasanangurwa vaMwari, vatsvene uye vanodikanwa kwazvo, zvifukidzei netsitsi, nounyoro, nokuzvininipisa, nokupfava uye nomwoyo murefu.

¹³Munzwirane tsitsi uye mukanganwirane pamhosva ipi zvayo yamunenge matadzirana. Mukanganwire sezvamakakanganwirwa naShe.

¹⁴Uye pazvinhu zvose izvi fukai rudo, runokusunganidzai pamwe chete muhumwe hwakakwana.

¹⁵Rugare rwaKristu ngarutonge mumwoyo yenyu, sezvo senhengo dzomuviri mumwe makadanirwa kurugare. Uye munofanira kuvonga.

¹⁶Shoko raKristu ngarigare zvakakwana mamuri pamunenge muchidzidzisana muchirayirana nouchenjeri hwose, uye muchiimba mapisarema, dzimbo nenziyo dzomweya muchivonga Mwari mumwoyo yenyu.

¹⁷Uye zvose zvamunoita, mushoko kana mumabasa, itai zvose muzita raIshe Jesu, muchivonga Mwari ivo Baba kubudikidza naye.

¹⁸Vakadzi, zviisei pasi pavarume venyu, sezvazvakafanira muna She.

¹⁹Varume, idai vakadzi venyu musingavabati nehasha.

²⁰Vana, teererai vabereki venyu pazvinhu zvose, nokuti izvi zvinofadza Ishe.

²¹Madzibaba, musanetsa vana venyu, nokuti vanozoora mwoyo.

²²Varanda, teererai vatenzi venyu vapanyika muzvinhu zvose; uye muzviite, kwete kuti vakuonei chete uye kuti mudikanwe navo, asi nokutendeka kwomwoyo uye nokutya Ishe.

²³Zvose zvamunoita, itai zvose nomwoyo wose, savanhu vanoshandira Ishe, kwete munhu,

²⁴sezvo muchiziva kuti muchagamuchira nhaka kubva kuna She somubayiro. NdiIshe Kristu wamunoshumira.

²⁵Ani naani anoita zvakaipa achatsiviwa nokuda kwezvakaipa zvake, uye hapana kutsaura vanhu.