Read Bhaibheri Dzvene MuChiShona Chanhasi 1 VaTesaronika 5 Bible Online

1 VaTesaronika 5 - Bhaibheri Dzvene MuChiShona Chanhasi bible

1 VaTesaronika 5

¹Zvino, hama, kana dziri nguva kana misi hatifaniri kuti tikunyorerei,

²nokuti imi munoziva kwazvo kuti zuva raShe richauya sembavha usiku.

³Vanhu pavanenge vachiti, “Rugare norunyararo,” kuparadzwa kuchasvika pamusoro pavo nokukurumidza, somukadzi ane mimba worwadziwa, uye havangapunyuki.

⁴Asi imi, hama, hamusi murima zvokuti zuva iri rikusvikirei sembavha.

⁵Imi mose muri vanakomana vechiedza navanakomana vamasikati. Hatizi vousiku kana verima.

⁶Saka zvino, ngatiregei kuita savamwe vavete, asi ngatisvinurei uye tive vanozvidzora.

⁷Nokuti avo vanovata, vanovata usiku, uye avo vanodhakwa, vanodhakwa usiku.

⁸Asi sezvo tiri vamasikati, ngatizvidzorei, takapfeka kutenda norudo sechidzitiro chechipfuva, netariro yoruponeso senguwani.

⁹Nokuti Mwari haana kutisarudza kuti tive vokutsamwirwa asi kuti tigamuchire ruponeso kubudikidza naIshe wedu Jesu Kristu.

¹⁰Akatifira isu kuitira kuti, kunyange takasvinura kana tivete, tigare pamwe chete naye.

¹¹Naizvozvo kurudziranai uye muvakane, sezvamunoita zvino.

¹²Zvino tinokukumbirai, hama, kuti muremekedze avo vanoshanda nesimba pakati penyu, vari pamusoro penyu muna She uye vanokurayirai.

¹³Muvakudze zvikuru murudo nokuda kwebasa ravo. Garai murunyararo nomumwe nomumwe wenyu.

¹⁴Uye tinokukurudzirai, hama, kuti muyambire avo vano usimbe, mukurudzire vanotya, batsirai vasina simba, muite mwoyo murefu kuvanhu vose.

¹⁵Muve nechokwadi kuti kurege kuva nomunhu anodzorera chakaipa nechakaipa, asi edzai kuva nomwoyo munyoro kuno mumwe nomumwe wenyu uye nokuna vose.

¹⁶Farai nguva dzose;

¹⁷rambai muchinyengetera;

¹⁸vongai pazvinhu zvose, nokuti ndiko kuda kwaMwari kwamuri muna Kristu Jesu.

¹⁹Musadzima moto woMweya;

²⁰musazvidza zviprofita.

²¹Edzai zvinhu zvose. Batirirai kune zvakanaka.

²²Regai zvakaipa zvose.

²³Mwari pachake, iye Mwari worugare, ngaakuitei vatsvene kwazvo kwazvo. Mweya wenyu wose, nomwoyo uye nomuviri zvichengetwe zvisina mhosva pakuuya kwaIshe wedu Jesu Kristu.

²⁴Iye anokudanai akatendeka uye achazviita.

²⁵Hama, tinyengeterereiwo.

²⁶Kwazisai hama dzose nokutsvoda kutsvene.

²⁷Ndinokurayirai pamberi paIshe kuti tsamba iyi iverengerwe hama dzose.

²⁸Nyasha dzaIshe wedu Jesu Kristu ngadzive nemi.