Read Bhaibheri Dzvene MuChiShona Chanhasi 2 VaTesaronika 3 Bible Online

2 VaTesaronika 3 - Bhaibheri Dzvene MuChiShona Chanhasi bible

2 VaTesaronika 3

¹Pakupedzisira, hama, mutinyengetererewo kuti shoko raShe rikurumidze kuparadzirwa uye kuti rikudzwe, sezvazvakanga zvakaita kwamuri.

²Uye munyengetere kuti tirwirwe kubva kune akaipa, nokuti havasi vose vanotenda.

³Asi Ishe akatendeka, uye achakusimbisai nokukudzivirirai kubva kune akaipa.

⁴Tinotenda muna She kuti muri kuita uye mucharamba muchiita zvinhu zvatinokurayirai.

⁵Mwari ngaatungamirire mwoyo yenyu murudo rwaMwari uye nomukutsungirira kwaKristu.

⁶Muzita raIshe Jesu Kristu, tinokurayirai hama, kuti mubve pahama imwe neimwe inoita zvousimbe uye isingararami maererano nedzidziso yamakagamuchira kubva kwatiri.

⁷Nokuti imi pachenyu munoziva kuti munofanira kutevera sei muenzaniso wedu. Takanga tisiri simbe patakanga tinemi,

⁸uye hatina kudya chokudya chomunhu tisingaripi. Asi, takashanda usiku namasikati, tichishanda zvikuru uye tichitambudzika kuitira kuti tirege kuva mutoro kwamuri.

⁹Takaita izvi, kwete nokuda kwokuti hatina kodzero yokuti tibatsirwe pakadaro, asi kuitira kuti tive muenzaniso kwamuri wokuti mutevere.

¹⁰Nokuti kunyange pataiva nemi, takakupai murayiro uyu wokuti: “Kana munhu asingashandi, ngaarege kudya.”

¹¹Tinonzwa kuti vamwe pakati penyu vane usimbe. Havashandi; havaregi zvavamwe.

¹²Vanhu vakadaro tinovarayira uye tinovakurudzira muna Ishe Jesu Kristu kuti vashande chinyararire vagodya chingwa chavanoshandira.

¹³Uye kana murimi, hama, musaneta pakuita zvakanaka.

¹⁴Kana pano munhu asingateereri kurayira kwedu mutsamba iyi, mumungwarire. Musafambidzana naye, kuitira kuti anyare.

¹⁵Asi musamutora somuvengi, asi mumuyambire sehama.

¹⁶Zvino Ishe worugare ngaakupei rugare nguva dzose nomunzira dzose.

¹⁷Ini Pauro, ndanyora kwaziso iyi noruoko rwangu, chinova ndicho chiratidzo mutsamba dzangu dzose.

¹⁸Nyasha dzaIshe wedu Jesu Kristu ngadzive nemi mose.