Read Bhaibheri Dzvene MuChiShona Chanhasi 1 Timoti 2 Bible Online

1 Timoti 2 - Bhaibheri Dzvene MuChiShona Chanhasi bible

1 Timoti 2

¹Naizvozvo, pakutanga kwezvose, ndinokurayirai kuti vanhu vose vakumbirirwe, vanyengetererwe, varevererwe, vavongerwe,

²madzimambo navose vari kutonga, kuti tigare norugare uye norunyararo pakurarama muumwari hwose nomuutsvene.

³Izvi zvakanaka uye zvinofadza Mwari muponesi wedu.

⁴Anoda kuti vanhu vose vaponeswe uye kuti vazive chokwadi.

⁵Nokuti kuna Mwari mumwe chete, nomurevereri mumwe chete pakati paMwari navanhu, ndiye munhu Kristu Jesu.

⁶Uyo akazvipa sorudzikinuro kuvanhu vose, uchapupu hwakapiwa panguva yakafanira.

⁷Uye nokuda kwechikonzero ichi ndakaitwa muparidzi nomupostori, ndinokuudzai chokwadi, handisi kureva nhema, uye ndiri mudzidzisi wokutenda kwechokwadi kune veDzimwe Ndudzi.

⁸Ndinoda kuti varume kwose kwose vasimudze maoko matsvene pakunyengetera, vasina kutsamwa kana nharo.

⁹Ndinodawo kuti vakadzi vapfeke zvakafanira, zvakanaka zvino kuzvidzora, kwete nebvudzi rakarukwa kana negoridhe kana namaperera kana nguo dzemari zhinji,

¹⁰asi ngavave namabasa akanaka, sezvakafanira vakadzi vanoti vanonamata Mwari.

¹¹Mukadzi ngaadzidze akanyarara uye nokuzviisa pasi kwose.

¹²Handitenderi kuti mukadzi adzidzise kana kuti ave nesimba pamusoro pomurume; anofanira kunyarara.

¹³Nokuti Adhamu ndiye akatanga kuumbwa, tevere Evha.

¹⁴Uye Adhamu haasi iye akanyengerwa; mukadzi ndiye akanyengerwa akava mutadzi.

¹⁵Asi vakadzi vachaponeswa nokubereka vana kana vachirambira mukutenda, murudo noutsvene, uye nokuzvidzora.