Read Bhaibheri Dzvene MuChiShona Chanhasi Firimoni 1 Bible Online

Firimoni 1 - Bhaibheri Dzvene MuChiShona Chanhasi bible

Firimoni 1

¹Pauro, musungwa waKristu Jesu, naTimoti hama yedu, kuna Firimoni shamwari yedu inodikanwa uye nomushandi pamwe chete nesu,

²kuna Afia hanzvadzi yedu, kuna Akipo murwi pamwe chete nesu uye nokukereke inosangana mumba mako:

³Nyasha ngadzive nemi norugare zvinobva kuna Mwari Baba vedu naIshe Jesu Kristu.

⁴Ndinovonga Mwari wangu nguva dzose pandinokurangarira muminyengetero yangu,

⁵nokuti ndinonzwa nezvokutenda kwako muna Ishe Jesu uye norudo rwako kuvatsvene vose.

⁶Ndinokunyengeterera kuti ugovane navamwe nesimba, kuitira kuti uve noruzivo rwakazara pamusoro pezvinhu zvose zvakanaka zvatinazvo muna Kristu.

⁷Rudo rwako rwakandipa mufaro mukuru nokukurudzirwa, nokuti iwe, hama yangu, wakazorodza mwoyo yavatsvene.

⁸Naizvozvo, kunyange zvazvo ndisingatyi, muna Kristu, kuti ndikurayire zvaunofanira kuita,

⁹asi ndinokukumbira nokuda kworudo. Saka ini, saPauro mutana uye zvino musungwa waKristu Jesu

¹⁰ndinokumbira kwauri pamusoro pomwanakomana wangu Onesimasi, akava mwanakomana wangu pakusungwa kwangu.

¹¹Akanga asingabatsiri kwauri kare, asi zvino ava kubatsira kwatiri tose iwe neni.

¹²Ndiri kumudzosera kwauri, iye mwoyo wangu chaiwo.

¹³Ndaida kuti iye agare neni kuti agotora nzvimbo yako pakundibatsira zvandiri muusungwa nokuda kweVhangeri.

¹⁴Asi handina kuda kuita chinhu iwe usina kuchitendera, kuitira kuti zvose zvakanaka zvauchaita zvirege kuva zvokurovedzerwa asi nokuda kwako.

¹⁵Nokuti zvimwe wakaparadzaniswa naye kwechinguva kuti ugozova naye nokusingaperi,

¹⁶asisiri somuranda, asi ava nani kupfuura muranda, sehama inodikanwa. Munhu anodikanwa kwandiri, asi kutonyanya kwauri, zvose somunhu uye sehama muna She.

¹⁷Saka kana uchindiona somumwe wako, mugamuchire sokugamuchira kwaungandiita.

¹⁸Kana ane zvaakakutadzira kana kuti ane mungava newe, uzvireve kwandiri.

¹⁹Ini, Pauro, ndanyora izvi noruoko rwangu. Ndichazviripira, ndisingarevi kuti iwe pachako uri mungava kwandiri.

²⁰Hama, ndinoshuva, kuti ndiwane rubatsiro kubva kwauri muna She; zorodza mwoyo wangu muna Kristu.

²¹Ndanyora kwauri ndichivimba nokuteerera kwako, ndichiziva kuti uchaita kunyange kupfuura zvandakukumbira.

²²Uye chimwe chinhuzve: Ndigadzirirewo pokugara, nokuti ndinotarira kuti ndichapiwa kwamuri pakupindurwa kweminyengetero yenyu.

²³Epafurasi, musungwa pamwe chete neni muna Kristu Jesu, anokukwazisai,

²⁴uyewo Mako, Aristakusi, Dhemasi, naRuka, vashandi pamwe chete neni.

²⁵Nyasha dzaIshe Jesu Kristu ngadzive nomweya wako.