Read Bhaibhiri Idzva rechiShona Mavambo 11 Bible Online

Mavambo 11 - Bhaibhiri Idzva rechiShona bible

Mavambo 11

¹Pasi chigare, vanhu vose vaingotaura mutauro mumwechete, vaine mazwi mamwechetewo.

²Mukutamatama kwaiita vanhu kumabvazuva, vakazondogara vakaita musha wavo mubani reShinari kuBhabhironi.

³Vakazorangana vachiti, “Ngatikanyei zvidhina tinyatsozvipisa zvakanaka.” Zvidhina ndozvaiva matombo avo, dhaka ravo rokuvakisa riri tara.

⁴Vakazoti, “Ngatizvivakirei guta rine nhungamakore yeshongwe, tiite zita rino mukurumbira, tirege kungopararira nenyika.”

⁵Tenzi akaburuka kudenga kuzoona guta neshongwe zvakanga zvavakwa navanhu.

⁶Tenzi akati, “Onai vanhu ava vose vanongova rudzi rwumwechete uye vose vanotaura mutauro mumwechete. Idzi imviromviro chete dzezvavachaita. Hakuna chichavatadzisa kuita chinhu chose chose chavanofunga kuita.

⁷Ngatiburukei tindopesanisa mutauro wavo vagorega kunzwana pakutaura.”

⁸Tenzi akavaparadzanisa vakapararira nenyika yose, vakabva varega kuvaka guta riya.

⁹Saka zita reguta iroro rakanzi Bhabheri nokuti Tenzi akapesanisa mutauro wapasi pose. Tenzi akavaparadzanisa vakapararira nenyika, pasi pose.

¹⁰Izvi ndizvo zvizvarwa zvokwaShemu. Shemu akagara zana ramakore akabereka Aripakishadhi, makore maviri shure kwamafashamo emvura.

¹¹Abva mukubereka Aripakishadhi, Shemu akagara mazana mashanu amakore akaberekawo vamwe vana vakomana navasikana.

¹²Aripakishadhi akagara makumi matatu amakore ana makore mashanu, ndokuzobereka Shera.

¹³Mushure mokubereka Shera, Aripakishadhi akagarazve mazana mana amakore ana makore matatu, akaberekawo vamwe vana vakomana navasikana.

¹⁴Shera akagara makumi matatu amakore akabereka Ebheru.

¹⁵Mushure mokubereka Ebheru, Shera akagarazve mazana mana amakore ana makore matatu akaberekawo vamwe vana vakomana navasikana.

¹⁶Ebheru akagara makore makumi matatu namana akabereka Peregi.

¹⁷Mushure mokubereka Peregi, Ebheru akagarazve mazana mana ana makumi matatu amakore akaberekawo vamwe vana vakomana navasikana.

¹⁸Peregi akagara makumi matatu amakore akabereka Reu.

¹⁹Mushure mokubereka Reu, Peregi akagara mazana maviri amakore ana makore mapfumbamwe akaberekawo vamwe vana vakomana navasikana.

²⁰Reu akagara makumi matatu amakore ana makore maviri, akabereka Serugu.

²¹Mushure mokubereka Serugu, Reu akagara mazana maviri amakore ana makore manomwe akaberekawo vamwe vana vakomana navasikana.

²²Serugu akagara makore makumi matatu akabereka Nahori.

²³Mushure mokubereka Nahori, Serugu akagara mazana maviri amakore akaberekawo vamwe vana vakomana navasikana.

²⁴Nahori akagara makumi maviri amakore ana makore mapfumbamwe akabereka Tera.

²⁵Mushure mokubereka Tera, Nahori akagara zana ramakore namakore gumi namapfumbamwe akaberekawo vamwe vakomana navasikana.

²⁶Tera akagara makore makumi manomwe akabereka Abhuramu naNahori naHarani.

²⁷Hezvinoi zvizvarwa zvaTera. Tera akabereka Abhuramu naNahori naHarani. Harani ndiye baba vaRoti.

²⁸Harani akafa baba vake vasati vafa, akafira kunyika kwaakaberekerwa muguta reUru kunyika yevaKaradhia.

²⁹Abhuramu naNahori vakawana vakadzi vavo. Zita romukadzi waAbhuramu ndiSarai, zita romukadzi waNahori richinzi Mirika mwana waHarani. Harani, vakaberekawo Isika.

³⁰Asi Sarai akanga asina mbereko asina mwana.

³¹Tera akatora mwanakomana wake Abhuramu, nomuzukuru wake Roti mwanakomana waHarani, nomuroora wake Sarai, mudzimai womwana wake Abhuramu. Vose ivavo vakabva kuguta reUru munyika yevaKaradhia vakasimuka voenda kuKanani. Asi pavakasvika kuHarani vakaita musha wavo ikoko.

³²Makore ose pamwechete aTera akagara mazana maviri amakore ana makore mashanu, ndokubva Tera azofira zvake kuHarani.