Read Bhaibhiri Idzva rechiShona Mavambo 14 Bible Online

Mavambo 14 - Bhaibhiri Idzva rechiShona bible

Mavambo 14

¹Panguva yaAmuraferi mambo weShinari, Arioku mambo weErasari naKedhoriraomeri mambo weEramu naTidhari mambo weGoimu,

²madzimambo iwaya akaita hondo namadzimambo aya anoti: Bhera mambo weSodhomu naBhirisha mambo weGomora naShinabhu mambo weAdhima naShemebheri mambo weZebhoimu namambo weBhera (kana kuti Zoari).

³Madzimambo iwaya ari mashanu akafunga zvokuita chirwirangwe akaunganidza hondo dzawo mubani reSidhimu kana kuti Gungwa roMunyu.

⁴Vakanga vari pasi pamambo Kedhoriraomeri kwamakore gumi nemaviri. Asi vakazomuitira chimurenga mugore regumi nechitatu.

⁵Zvino mugore regumi nechina Kedhoriraomeri akauya namadzimambo aaiva nawo akakunda vaRefaimu vaigara kuAsherotikarinaimu, nevaZuzimu kuHamu nevaEmimu kuShavhekiriataimu

⁶nevaHori mugomo ravo reSeiri kusvikira kuEriparani kumucheto werenje.

⁷Vakazodzoka vakaenda kuEnimishipati (kana kuti kuKadheshi), vakakurira nyika yose yavaAmereki navaAmori vakanga vagere Hazazonitamari.

⁸Madzimambo mashanu anoti, mambo weSodhomu namambo weGomora namambo weAdhima namambo weZebhoimu mambo weBhera (kana kuti Zoari) akandounganidza hondo dzawo mubani reSidhimu

⁹vakarwisana namadzimambo mana anoti; mambo weKedhoriraomeri weEramu namambo Tidhari weGoimu namambo Amuraferi weShinari namambo Arioku weErasari. Vakarwisana vachiti uku vana, uku vashanu.

¹⁰Bani reSidhimu rakanga riine migodhi mizhinji yetara. Madzimambo eSodhomu neGomora akatiza, vamwe vanhu vavo vakawira mumigodhi yacho. Vakasarawo vakatizira kumakomo.

¹¹Madzimambo mana aye akapamba upfumi hwose hweSodhomu neGomora, nezvokudya zvavo zvose vakaenda nazvo.

¹²Kunyange Roti uya, mwanakomana womunun'una waAbhuramu akanga agere kuSodhomu vakamutapawo, vakapambawo upfumi hwake, vakaenda.

¹³Mumwewo akapunyuka ipapo akaenda akandoudza Abhuramu muHebheru kwaiva nemiti yemioku yokwaMamure kwavakanga vagere. Mamure uyu aiva worudzi rwevaAmori, iye aivawo mukoma nomunun'una naEshikoru naAneru. Ivava vose vaibatana pamwechete naAbhuramu pakurwa.

¹⁴Abhuramu paakanzwa zvokutapwa kwehama yake akaunganidza vanhu vake mazana matatu ane gumi navasere vakanga vakanyatsodzidziswa zvehondo vakaberekwa mumhuri dzavaranda vake. Vakaronda madzimambo aya kusvika kuDhani.

¹⁵Abhuramu akakamura varwi vake akavarwisa nousiku akavakunda, akavadzingirira kusvika kuHobha kuchamhembe kweDhamasikusi.

¹⁶Akadzoka nezvinhu zvose zvakanga zvapambwa, akadzokawo nehama yake Roti nezvinhu zvake, navakadzi navamwe vanhu.

¹⁷Kuzoti Abhuramu adzoka kuya kwaakanga akunda Kedhoriraomeri namadzimambo aakanga anawo, mambo weSodhomu akandomuchingamidza pabani reShavhe (kana kuti bani raMambo).

¹⁸Merekizedhekiwo mambo weSaremu aiva mupristi waMwari Wokumusorosoro akauyawo nechingwa newaini kuna Abhuramu.

¹⁹Akamukomborera achiti; “Mwari Wokumusorosoro, Musiki wedenga napasi, ngaakomborere Abhuramu.

²⁰Ngaakudzwe Mwari Wokumusorosoro, akaisa vavengi venyu mumaoko enyu.” Abhuramu akabvisa chegumi chezvinhu zvose zvaakanga adzoka nazvo, akapa kuna Merekizedheki.

²¹Mambo weSodhomu akati kuna Abhuramu, “Pane zvawadzoka nazvo, ndipe vanhu utore zvako upfumi.”

²²Asi Abhuramu akapindura mambo weSodhomu achiti, “Ndakapika naTenzi Mwari Wokumusorosoro

²³ndichiti, ‘Pazvinhu zvenyu zvose handidi kutora kana chinhu zvacho, kunyange kashinda kana tambo zvayo yeshangu kuti murege kuzondikonora muchiti, ndini ndakatopfumisa Abhuramu.’

²⁴Ini pachangu handidi chinhu. Zvakadyiwa navarwi vangu pamwechete nomugove unopiwa vanhu vandakaenda navo, ndizvo zvanguwo zvandinowana. Asi regai Aneru naEshikoru naMamure vatore mugove wavo.”