Read Bhaibhiri Idzva rechiShona Mavambo 20 Bible Online

Mavambo 20 - Bhaibhiri Idzva rechiShona bible

Mavambo 20

¹Abhurahamu akabva kuMamure akaenda kunyika yeNegevhu, akandogara pakati peKadheshi neShuru, akambogarawo kuGerari.

²Abhurahamu aiti, mudzimai wake, Sara ihanzvadzi yangu. Abhimereki mambo weGerari, akatuma vanhu vakandomuunzira Sara.

³Asi Mwari akauya kuna Abhimereki mukurota usiku akati kwaari, “Ndokufa uku kwawatoita pamusana pomukadzi wawandotora, mukadzi womuridzi.”

⁴Asi Abhimereki akanga asati atorana naye. Abhimereki akati, “Nhai Tenzi, mungaparadze rudzi rwavanhu vasina mhosva here?

⁵Haasiri iye pachake here akanditi, ‘Ihanzvadzi yangu.’ Mukadzi wacho pachake achiti, ‘Ihanzvadzi yangu.’ Ndakazviita mukusaziva, pasina chakaipa chandaimbofunga mumwoyo mangu.”

⁶Mwari akamutaurira mukurota ikoku achiti, “Ndinozviziva zvangu kuti wakazviita mukusaziva pasina chakaipa chawaimbofunga mumwoyo mako. Ndini ndakaita kuti urege kunditadzira, saka ndisina kukubvumidza kumbomugunzva zvako.

⁷Zvino chidzorera mukadzi womuridzi. Murume wake achakunamatira ugorarama nokuti muporofita. Asi kana ukarega kumudzorera, chinyatsoziva zvako kuti ndokufa kwawava kuita uku, iwe navanhu vako vose.”

⁸Saizvozvo Abhimereki akamuka mangwanani-ngwanani akadaidza makurukota ake ose ndokuaudza zvose izvozvi. Varume ivavo vakatya zvikuru.

⁹Abhimereki akadaidza Abhurahamu akati kwaari, “Chiiko ichi chawaita kwatiri? Ndakakutadzira zvakaita sei zvaunobva wandiunzira chitadzo chakakura chikadai ini nenyika yangu? Zvawandiitira izvi, hazvifanire kumboitwa!”

¹⁰Abhimereki akati kuna Abhurahamu, “Waifungeiko kuita zvinhu zvakadai?”

¹¹Abhurahamu akati, “Ndakazviita ndichifunga kuti vanhu vokuno havatye Mwari, uye kuti zvimwe vangandiuraye pamusana pomudzimai wangu.

¹²Izvowo ihanzvadzi yangu chaiyo, baba vedu mumwechete, takangosiyana kunanamai. Akazovawo mudzimai wangu zvake.

¹³Mwari paakandibvisa kumusha kwababa vangu, achindiita kuti nditame-tame, ndakaudza mudzimai wangu ndichiti, ‘Ndiitirewo mwoyochena kwose kwatinoenda, upote uchinditi, ihanzvadzi yangu.’ ”

¹⁴Abhimereki akatora hwai nemombe, navaranda vechikadzi nevechirume akapa izvozvo Abhurahamu, akamudzorerawo Sara mudzimai wake.

¹⁵Abhimereki akati, “Tarisa uone, nyika yangu yose iyi yauri kuona, enda unogara pose pose paunoda.” Akataurirawo Sara achiti,

¹⁶“Ndapa hanzvadzi yako chiuru chemari yesirivha yokuratidza kuti hauna nemhosva yose nokukuchenurawo pana vamwe vako vose vaunavo navanhu vose zvavo.”

¹⁷Abhurahamu akanamata Mwari, Mwari ndokuporesa Abhimereki nomudzimai wake, navaranda vake vechikadzi kuti vave nembereko zvakare

¹⁸nokuti Tenzi akanga amisa kubereka vakadzi vose vemhuri yaAbhimereki, pamusana paSara, mudzimai waAbhurahamu.