Read Bhaibhiri Idzva rechiShona Mavambo 22 Bible Online

Mavambo 22 - Bhaibhiri Idzva rechiShona bible

Mavambo 22

¹Mushure maizvozvi, Mwari akaedza Abhurahamu akati, “Abhurahamu.” Iye akati, “Ndiri pano.”

²Mwari akati, “Tora mwanakomana wako, iye mumwechete oga, wepamwoyo, Isaki uende naye kunyika yeMoria umuite chibayiro chomupiro wokupisa ikoko pane rimwe gomo randichakuudza.”

³Abhurahamu akafumomuka akaisa chityaro padhongi rake akatora varanda vake vaviri nomwanakomana wake Isaki. Akatema huni dzokupisa nadzo mupiro wokupisa, ndokusimuka oenda kunzvimbo yaakanga audzwa naMwari.

⁴Pazuva retatu Abhurahamu akatarisa akaona nzvimbo iyoyo ichiri chinhambwe.

⁵Abhurahamu akataurira varanda vake achiti, “Chimbosarai pano apa nedhongi iri, ini nomwana timboenda kundonamata tigozoti todzoka zvedu kuno kwamuri.”

⁶Abhurahamu akatora huni dziye akadzitakudza Isaki mwana wake. Iye akatakura moto nebanga mumaoko, vakaenda zvavo vose vari vaviri.

⁷Isaki akabvunza Abhurahamu baba vake achiti, “Nhai baba!” Iye akati, “Chiiko mwanangu?” Isaki akati, “Moto nehuni tinazvo, ko hwayana yokundoita chibayiro chomupiro wokupisa iri kupi?”

⁸Abhurahamu akati, “Mwanangu, Mwari pachake ndiye achaona kuti tawana hwayana yechibayiro chemupiro wokupisa.” Saka vose vari vaviri vakaenda zvavo.

⁹Vakasvika panzvimbo yavakanga vataurirwa naMwari. Abhurahamu akavaka atari ipapo. Akanyatsoronga huni, akasunga Isaki mwanakomana wake akamuradzika paatari, pamusoro pehuni.

¹⁰Abhurahamu ndokutambanudza ruoko rwake otora banga kuti achibaya mwana wake.

¹¹Pakarepo mutumwa waMwari akadaidzira ari mudenga achiti, “Abhurahamu, Abhurahamu!” Abhurahamu akati, “Ndiri pano.”

¹²Mutumwa akati, “Usakuvadze mwana wako kana kuwana chaungaite paari. Zvino ndazoziva kuti unotya Mwari, zvausina kurambira nomwanakomana wako, mumwe chete oga.”

¹³Abhurahamu akatarisa onei seri kwake kuine hondohwe yakakochekera nenyanga dzayo mugwenzi. Abhurahamu akandotora hondohwe iyoyo, akaiita chibayiro chomupiro wokupisa panzvimbo yomwana wake.

¹⁴Saka Abhurahamu akatumidza nzvimbo iyoyo zita rokuti “Tenzianoonazvokuita,” kunyange nanhasi uno zvichiri kungonzi, “Pagomo raTenzianoonazvokuita.”

¹⁵Ipapo mutumwa waTenzi akadaidzira rwechipiri ari mudenga kuna Abhurahamu

¹⁶achiti, “Ndinopika neni pachangu. Ndini Tenzi ndinodaro kutaura. Zvawaita chinhu chakadai ichi ukarega kurambira nomwanakomana wako, mwana wako mumwechete oga,

¹⁷ndichanyatsokukomborera chaizvo. Ndichaita kuti vana vako vawande senyenyedzi dzedenga, sejecha romumahombekombe egungwa. Maguta avavengi vavo, vana vako vachaaita avo.

¹⁸Nokuda kwavana vako marudzi apasi pose achakomborerwa nokuti wateerera zvandinoreva.”

¹⁹Abhurahamu akadzokera kuvaranda vake ndokusumuka voenda vose kuBheerishebha. Abhurahamu akaita musha wake kuBheerishebha.

²⁰Shure kwaizvozvo Abhurahamu akazoudzwa kuti, “Mirika akaberekera munun'una wake Nahori vana vakomana.”

²¹Wedangwe ndiUzi achiteverwa naBhuzi, kwozouya Kemueri baba waAramu,

²²tevere Kesedhi naHazo naPiridhashi naJidhirafu naBhetueri.

²³Bhetueri ndiye akazobereka Ribheka. Aya ndiwo majaya masere akaberekwa naMirika mudzimai waNahori munun'una waAbhurahamu.

²⁴Nahori akaberekawo vamwe vana nomurongo wake ainzi Reuma. Murongo iyeyo akabereka Tebha naGahamu naTahashi naMaaka.