Read Bhaibhiri Idzva rechiShona Mavambo 24 Bible Online

Mavambo 24 - Bhaibhiri Idzva rechiShona bible

Mavambo 24

¹Zvino Abhurahamu akanga achembera mazuva aendedzana Tenzi akanga amukomborera pazvinhu zvose.

²Abhurahamu akataurira muranda wake mukuru pazera pana vose mumusha make aiva mutariri mukuru wokutarisa zvose zvemhuri yake, vachiti, “Isa ruoko rwako pasi pechidya changu,

³ugopika naTenzi, Mwari wedenga napasi, kuti hauzotorera mwanakomana wangu mukadzi pavasikana veKanani vandigere navo

⁴asi kuti uchazoenda kunyika kwangu, kune hama dzangu, kundotsvakira mwana wangu, Isaki, mukadzi ikoko.”

⁵Muranda akati, “Ko kana mukadzi wacho akaramba kuuya neni kuno, ndinofanira kudzorera mwana wenyu kunyika kwamakabva here?”

⁶Abhurahamu akati, “Kwete. Usambodzorera zvako mwana wangu ikoko.

⁷Tenzi, Mwari wedenga akandibvisa pamusha wababa vangu, munyika yandakaberekerwa akandipikira achiti, ‘Nyika ino ndichaipa kuzvizvarwa zvako,’ ndiye achatuma mutumwa wake kuzokutungamirira kuti undotorera mwana wangu mukadzi ikoko.

⁸Kana mukadzi iyeyo aramba kuuya newe, iwe uchasunungurwa pamhiko yangu yawapika. Asi chako iwe rega kudzokera nemwana wangu ikoko.”

⁹Muranda uyu akaisa ruoko rwake pasi pechidya chaAbhurahamu, vatenzi vake, ndokupika mhiko yacho.

¹⁰Muranda uyu akatora gumi, pangamera dzavatenzi vake, nezvipo zvakasiyana-siyana zvakanakisisa zvaibva kuna vatenzi vake, akasimuka, oenda kuMesopotamia kuguta raNahori.

¹¹Akaita kuti ngamera dzake dzirare patsime raiva kunze kweguta, manheru, nguva inouya vakadzi kuzochera mvura.

¹²Akanamata achiti, “Tenzi, Mwari waAbhurahamu, vatenzi vangu, nzwirai tsitsi vatenzi vangu Abhurahamu, mundibatsire ndiwane zvandafambira.

¹³Onai ndimire pano patsime pachauya vanasikana vavanhu vomuguta rino kuzochera mvura.

¹⁴Zvino musikana wandinenge ndati nditekerewo mvura ndinwe, kana iye akapindura achiti, ‘Inwai zvenyu uye ndichapawo ngamera dzenyu mvura yokunwa,’ iyeyo ngaave musikana wamakasarudzira muranda wenyu Isaki. Ndizvo zvichandiratidza kuti maitira mwoyochena vatenzi vangu.”

¹⁵Asati ambopedza kutaura pakabva pasvika Ribheka mwanasikana waBhetueri. Bhetueri uyu akaberekwa naMirika, mudzimai waNahori munun'una waAbhurahamu. Ribheka akasvika akatakura chirongo chake papfudzi.

¹⁶Zvino musikana uyu aiva nechimiro chakanaka kwazvo, iri mhandara isina kumbosangana nomurume. Akapinda mutsime akazadza chirongo chake nemvura akabuda.

¹⁷Muranda uyu akamhanyira kwaari akati, “Regai ndingonyavawo pahuro nemvura yokunwa yomuchirongo chenyu.”

¹⁸Musikana akati, “Inwai zvenyu tenzi wangu.” Akakurumidza kutura chirongo chake pasi ndokumubatira achinwa.

¹⁹Kuzoti amupa mvura, musikana akati, “Chiregai zvenyu nditekerewo ngamera dzenyu mvura, dzinwe dzigute.”

²⁰Akabva atora mvura yaiva muchirongo chake akaidururira mokuti dzinwire, ndokumhanyira kutsime kundocherera ngamera dzake dzose mvura yokunwa.

²¹Murume akatarisisa anyerere achida kuziva kuti chokwadi Tenzi anditungamirira kuwana zvandafambira here, kana kuti kwete.

²²Kuzoti ngamera dzake dzanwa dzaguta muranda uyu akatora mhete yendarama yairema sechidimbu chapakati napakati cheshekeri, ndokushongedza Ribheka. Akamupawo makoza maviri endarama airema mashekeri gumi.

²³Muranda akati, “Uri mwana waaniko? Ko tingawanawo here pokurara kumba kwababa venyu?”

²⁴Iye akati, “Ndiri mwana waBhetueri akaberekwa naMirika, mudzimai waNahori.”

²⁵Akatiwo, “Tine zvose zvakawanda, mashanga nezvokudya zvezvipfuwo uye pokurara paripo.”

²⁶Murume uyu akapfugama akanamata Tenzi achiti,

²⁷“Ngaarumbidzwe Tenzi, Mwari watenzi wangu Abhurahamu nokuti akaramba akatendeka, akaita zvaakatsidzira tenzi wangu. Kana ndirini, Tenzi anditungamirira akandisvitsa kumusha kwehama dzatenzi wangu.”

²⁸Musikana uyu akabva amhanyira kumba kwamai vake, ndokundovaudza zvose.

²⁹Ribheka aiva nehanzvadzi yake yainzi Rabhani. Rabhani akamhanyira kumurume uye, kutsime,

³⁰nokuti akanga aona hanzvadzi yake iine mhete, namakoza mumaoko ayo, akanzwawo kutaura kwaiita Ribheka achiti, “Ndizvo zvandaudzwa nomurume iyeyo.” Ndopaakamhanyira kumurume uya, akamuwana amire patsime paya nengamera dzake.

³¹Rabhani akati, “Titambireika vanyakukomborerwa naTenzi! Ko manga muchadarirei kumirira kunze kunze kuno uku. Izvozvi tatokugadzirirai imba nepokutenhera ngamera.”

³²Saka murume uyu akandopinda mumba. Rabhani akasunungura ngamera dziya, akamupa mashanga nezvokudya zvengamera. Akapawo murume uyu navaaiva navo mvura yokushamba tsoka.

³³Vakamuperekera zvokudya, asi iye akati, “Handingadyi ndisati ndataura mashoko angu.” Rabhani akati, “Tipire zvako tinzwe.”

³⁴Iye akati, “Ndiri muranda waAbhurahamu.

³⁵Tenzi akakomborera vatenzi vangu kwazvo zvokuti vakapfuma zvikuru. Vane hwai, mombe, sirivha, ndarama, navaranda vechirume nevechikadzi nengamera namadhongi mazhinji.

³⁶Sara, mudzimai wavatenzi vangu, kunyange akanga achembera zvake, akaberekera vatenzi vangu mwana mukomana. Ivo vatenzi wangu vakapa mwana wavo iyeyo zvinhu zvose zvavanazvo.

³⁷Zvino vatenzi vangu vakandiitisa mhiko vachiti, ‘Usatsvakire mwana wangu mukadzi mukati mevanasikana verudzi rwevaKanani vane nyika yandigere.

³⁸Asi enda kumusha kwababa vangu, kuhama dzangu undotsvakira mwana wangu mukadzi ikoko.’

³⁹Ndakati kuna vatenzi vangu. ‘Zvimwe mukadzi wacho acharamba kuuya neni.’

⁴⁰Ivo vatenzi vangu ndokuti, ‘Tenzi wandinogara ndichinamata muupenyu, achatuma mutumwa wake akuperekedze kuti zvaunofambira zvibudirire, undotorera mwana wangu mukadzi kuhama dzangu kumusha kwababa vangu.

⁴¹Kana wasvika kuhama dzangu, vakaramba kukupa mukadzi iyeyo, uchasunungurwa zvako pamhiko yangu.’

⁴²“Pandasvika patsime nhasi uno ndati, ‘Tenzi, Mwari wavatenzi vangu Abhurahamu, nditungamirireiwo ndigowana zvandafambira.’

⁴³Zvino zvandimire patsime pano, kana pakauya musikana kuzochera mvura ndikamuti, ‘Dondipawo mvura muchirongo chako ndinwe,’

⁴⁴kana iye akati, ‘Inwai zvenyu, ndichatekerawo ngamera dzenyu mvura yokunwa,’ iyeyo ngaave mukadzi akasarudzirwa mwana wavatenzi vangu naTenzi.

⁴⁵Zvino ndisati ndapedza kunamata nechemumwoyo ndabva ndaona Ribheka achiuya akatakura chirongo pamapfudzi ake, ndokusvikopinda mutsime, ndokuchera mvura. Ini ndamuti, ‘Dondipawo mvura yokunwa.’

⁴⁶Pakarepo iye abva atura chirongo chake pamafudzi akati, ‘Inwai zvenyu, uye ndichapawo ngamera dzenyu mvura yokunwa.’ Ndanwa ndokubva iye apawo ngamera dzangu dzikanwa.

⁴⁷Ipapo ndamubvunza ndichiti, ‘Ko nhai, uri mwana waaniko?’ Iye ati, ‘Ndiri mwana womwana waNahori, baba vangu ari Bhetueri aberekwa naMirika mudzimai waNahori.’ Ini ndabva ndaisa mhete pamhuno yake namakoza mumaoko ake.

⁴⁸Ndapfugama ndikanamata Tenzi, ndikarumbidza Tenzi wavatenzi vangu Abhurahamu nokuti anditungamirira kuti ndinange kuhama yavatenzi vangu Abhurahamu kuti ndiwanire muroora wavatenzi vangu.

⁴⁹Zvino kana imi muchida kuva vanhu vakatendeka vanoita zviri pachokwadi kuna vatenzi vangu ndiudzei. Asi kana musingadi, ndiudzeiwo zvangu ndione zvokuita.”

⁵⁰Ipapo Rabhani naBhetueri vakapindura vachiti, “Zvinhu izvi zvabva kuna Tenzi. Isu hapana chatingataure.

⁵¹Ribheka ndiyeyu ari pano mutore zvako uende naye, andova mudzimai womwanakomana wavatenzi vako sokutaura kwakaita Tenzi.”

⁵²Muranda waAbhurahamu paakanzwa zvavakataura akapfugama pasi akanamata Tenzi.

⁵³Muranda uyu akabva abudisa zvishongo zvesirivha nezvendarama nehanzu dzokupa Ribheka. Akaburitsawo zvipo zvinokosha ndokupa amai vaRibheka nehanzvadzi yake Rabhani.

⁵⁴Muranda uyu navarume vaakanga anavo vakadya, vakanwa, ndokurarapo usiku ihwohwo. Kuzoti vamuka mangwanani akati, “Chiregai ndichidzokera zvangu kuna vatenzi vangu.”

⁵⁵Hanzvadzi yake naamai vake vakati, “Regai timboti garei nomusikana uyu nguva yakati kuti kana mazuva angaite gumi zvawo agoti oenda zvake.”

⁵⁶Asi iye akati, “Dai machirega zvenyu kundinonotsa, onai Tenzi andipa zvandafambira. Chiregai zvenyu ndidzokere kuna vatenzi vangu.”

⁵⁷Ivo vakati, “Regai tidaidze mhandara yacho tinzwe.”

⁵⁸Vakadaidza Ribheka vakati kwaari, “Unoda kuenda nomurume uyu here?” Iye akati, “Hongu ndinoda.”

⁵⁹Vakabvumidza Ribheka mwana wavo[6] kuenda. Akaenda nomuranda wechikadzi nyakumurera. Vakaenda nomuranda waAbhurahamu pamwechete navanhu vake.

⁶⁰Vakakomborera Ribheka vachiti, “Dai iwe mwana wedu ukava amai vamazana akazanirana avanhu! Zvizvarwa zvako ngazvikurire maguta avavengi vazvo.”

⁶¹Ribheka navasikana vake vaimushandira vakagadzirira zvokusumuka, vakatasva ngamera dzavo, vakaenda nomurume uye vachimutevera. Muranda uyu ndiko kutora kwaakaita Ribheka akabva aenda zvake.

⁶²Ipapo Isaki akanga achangotama kuBheerirahairoi, ava kugara kuNegevhu.

⁶³Ava manheru, Isaki akaenda musango achimbondoti avarairwe zvake achifunga. Akasumudza musoro akaona ngamera dzichiuya.

⁶⁴Ribheka akati tarisei, paakaonawo Isaki akabva akurumidza kuburuka pangamera yake,

⁶⁵ndokubvunza muranda uyu achiti, “Ko murume uyo ari kuuya nomusango umo kuzochingurana nesu ndiani?” Muranda akati, “Ndivatenzi vangu.” Ribheka akatora dhuku rake akazvifukidza kumeso.

⁶⁶Muranda uyu akaudza Isaki zvose zvaakanga aita.

⁶⁷Isaki akaunza Ribheka mutendhe rakanga riri raSara amai vake. Akatora Ribheka akava mukadzi wake. Isaki akamuda. Saka ndiko kunyaradzwa kwaakaitwa mushure mokufa kwaamai vake Sara.