Read Bhaibhiri Idzva rechiShona Mavambo 27 Bible Online

Mavambo 27 - Bhaibhiri Idzva rechiShona bible

Mavambo 27

¹Kuzoti Isaki ava harahwa, maziso ake ava kuonera madzerere asisaone akadaidza Esau dangwe rake akamuti, “Mwanangu!” Iye akati, “Ndiri pano baba!”

²Vakati, “Ini ndakwegura, handizivi zuva rokufa kwangu.

³Zvino chitora zvombo zvako zvokuvhimisa, zvinoti mukutu nemiseve yako uende musango kundondivhimira nyama.

⁴Ugondigadzirira chokudya chakanaka chomwoyo wangu chaicho, undiigire ndidye, ndigokukomborera ndisati ndafa.”

⁵Ribheka akanga akateerera Isaki achitaura naEsau mwanakomana wake. Esau paakaenda musango kundovhima,

⁶Ribheka akataurira Jakobho mwanakomana wake vachiti, “Ndanzwa baba vako vachitaura naEsau mukoma wako vachiti,

⁷‘Ndiigire nyama yemhuka ugondigadzirira zvokudya zvakanaka, ndidye ndikupe chikomborero chaTenzi ndisati ndafa.’

⁸Zvino, mwanangu chiteerera zvandava kukuudza.

⁹Enda kudanga undiigire mbudzana mbiri dzakakora ndibikire baba vako chokudya chakanaka chepamwoyo wavo chaicho.

¹⁰Ugoenda nazvo kuna baba vako, vadye vakukomborere vasati vafa.”

¹¹Jakobho akapindura amai vake Ribheka achiti, “Mukoma wangu Esau, munhu ane mvere muviri wose, asi ini handina mvere.

¹²Zvimwe baba vachabata muviri wangu vakazviziva kuti ndiri kuvanyengedza vakazoti rushambwa rundiwire ini ndanga ndichiti ndikomborerwe.”

¹³Asi amai vake vakati, “Mwanangu rushambwa rwacho ngaruwire inini. Chako iwe kuteerera zvandiri kureva, uende undodzitora uuye nadzo kwandiri.”

¹⁴Jakobho akaenda akandodzibata, akauya nadzo kuna amai vake. Amai vake vakabikira baba vake chokudya chakanaka chapamwoyo pavo chaicho.

¹⁵Ribheka akatora hanzu dzakaisvonaka dzaEsau mwanakomana wake mukuru dzaaiva nadzo mumba, akadzipfekedza Jakobho munun'una wake.

¹⁶Akapfekedza Jakobho matehwe embudzana dziye mumaoko nomumutsipa make makanga musina mvere.

¹⁷Ribheka akatora zvokudya zvakanaka nechingwa zvaakanga abika, akapa Jakobho.

¹⁸Jakobho akaenda kuna baba vake akati, “Baba!” Ivo vakati, “Mwanangu! Ko ndiwe aniko mwanangu?”

¹⁹Jakobho ndokuti, “Ndini dangwe renyu Esau ndaita zvamandiudza. Mukai zvenyu muite zvokugara mudye nyama yemhuka yandauya nayo, mundikomborere.”

²⁰Isaki akati, “Wakurumidza nei kuiwana mwanangu?” Jakobho ndokuti, “Ndaiwaniswa naTenzi, Mwari wenyu.”

²¹Isaki akataurira Jakobho achiti, “Chimboswedera kuno mwanangu, ndibate muviri wako ndinzwe kana uriwe mwana wangu Esau zvechokwadi kana kuti kwete.”

²²Jakobho akaswedera pana baba vake Isaki. Ivo vakabata muviri wake vakati, “Izwi nderaJakobho asi maoko ndeaEsau.”

²³Isaki haana kuziva kuti ndiJakobho nokuti maoko ake akanga ava nemvere, sezvakanga zvakaita maoko omukoma wake Esau, akamukomborera.

²⁴Akati, “Saka ndiwe here mwana wangu Esau?”

²⁵Akati, “Ndini.” Isaki akati, “Chindipa nyama yemhuka yawabaya, ndidye ndikukomborere.” Jakobho akavapa vakadya, akavapawo waini vakanwira zvavo.

²⁶Baba vake Isaki vakamuti, “Chiswedera kuno unditsvode mwanangu.”

²⁷Akaswedera akavatsvoda. Isaki akanzwa kunhuwirira kwehanzu dzake akamupa chikomborero achiti, “Kunhuwirira kwemwana wangu kwakaita sokunhuwirira kwesango rakakomborerwa naTenzi.

²⁸Mwari ngaakuunzire dova rokudenga, ngaanyatsokurisa zvirimwa zvako, akupe mbesanwa dzakawanda newaini.

²⁹Ndudzi dzose ngadzikushandire, marudzi ose avanhu akugwadamire uve mutongi wehama dzako, vana vaamai vako vakuombere. Vanenge vati uwirwe norushambwa, rushambwa ngaruwire ivo, vakomborerwewo vanoti iwe ukomborerwe.”

³⁰Zvakaitika kuti Isaki achangopedza kukomborera Jakobho, iye Jakobho achangoti ibvei pana baba vake, Esau mukoma wake ndokubva atiwo vhu kusvikawo achibva kundovhima.

³¹Akabikawo zvokudya zvinonaka, akaenda nazvo kuna baba vake akasvikoti, “Baba, mukai muite zvokugara, mudye nyama yemhuka yandauya nayo, mugondikomborera.”

³²Baba vake, Isaki ndokumuti, “Ndiwe ani?” Akati, “Ndini Esau mwana wenyu wedangwe.”

³³Isaki akadedera zvikuru akati, “Ko ndianiko ambondivhimira nyama akauya nayo kwandiri ndikaidya yose usati wauya, ndikamupa chikomborero? Iyeyo ndiye atokomborerwa.”

³⁴Esau akati achinzwa zvaitaurwa nababa vake, akazhamba kuchema achishungurudzika achiti, “Baba neniwo ndikomborereiwo.”

³⁵Asi ivo vakati, “munun'una wako andinyengedza akabva atora chikomborero chako.”

³⁶Esau akati, “Handiti vakagona vakamutumidza zita rokuti Jakobho nokuti anditorera nzvimbo yangu ruviri rwese. Akanditorera udangwe hwangu, zvino hoyo watora chikomborero changu.” Akatizve, “Ko hamuna kundisiyirawo here chimwe chikomborero?”

³⁷Isaki ndokupindura Esau achiti, “Chitarisa uoneka, ndamuita kuti ave mutongi wako. Hama dzake dzose ndadziita kuti dzive varanda vake, ndikamupawo chikomborero chembesanwa newaini. Zvino chii chasara ipapa chandingakuitirewo mwanangu.”

³⁸Esau ndokupindura baba vake achiti, “Nhai baba, ko munongova nechikomborero chimwechete chete here? Baba neniwo ndipeiwo chikomborero!” Esau akabva achema zvinosiririsa.

³⁹Baba vake Isaki ndokuti, “Musha wako uchava kure noupfumi hwenyika, uri kure kure nedova rinobva kumusoro kudenga.

⁴⁰Zvokubatirana mapfumo navamwe vako, ndohuchagara huri upenyu hwako. Uchava muranda womunun'una wako. Asi paanongokuti tupfunu chete uchatyora joko rake pamutsipa wako.”

⁴¹Esau akavenga Jakobho pamusana pechikomborero chaakanga apiwa nababa vake. Asi nechomumwoyo Esau akati, “Mazuva okufa kwababa vangu ava pedyo, tikapedza kuvachema ndichauraya munun'una wangu Jakobho.”

⁴²Ribheka paakanzwa zvairongwa naEsau mwanakomana wake mukuru akadaidza Jakobho mwanakomana wake muduku akati kwaari, “Chionaka iwe, mukoma wako Esau ari kuronga zvokukuuraya achitsividza.

⁴³Saka mwanangu chinzwa zvandinokuudza. Chisimuka pano uende kuHarani kuhanzvadzi yangu Rabhani.

⁴⁴Ugare ikoko mazuva akati kuti,

⁴⁵kusvikira hasha dzomukoma wako dzaserera, kudzamara mukoma wako asisiri kukushatirirwa, akanganwa zvawakamuitira. Ndipo pandichazotumira munhu kuzokutora ikoko. Handidi ini kurasikirwa navanhu vaviri pamusi mumwechete.”

⁴⁶Ribheka akati kuna Isaki, “Vakadzi vechiHiti vandakaroorerwa naEsau vandipfuvisa. Kana Jakobhowo akaroora mukadzi wechiHiti savava ava kuvanasikana vomunyika muno zviri nani zvangu kuti ndife.”