Read Bhaibhiri Idzva rechiShona Mavambo 28 Bible Online

Mavambo 28 - Bhaibhiri Idzva rechiShona bible

Mavambo 28

¹Isaki akadaidza Jakobho akamukomborera ndokumuyambira achiti, “Usaroore mukadzi wechiKanani.

²Sumuka uende kuMesopotamia kumusha kwaBhetueri, baba vaamai vako undotsvaka musikana mumhuri yaRabhani, hanzvadzi yaamai vako uroore.

³Iye Aripagomo ngaakukomborere akupe vana vazhinji, vawande zvokuti vave madzinza namadzinza avanhu.

⁴Ngaakupe chikomborero chaAbhurahamu, iwe nezvizvarwa zvako chokuti uve muridzi wenyika ino yatiri kumboti apa garei tame apa garei yakapiwa Abhurahamu naMwari!”

⁵Naizvozvo Isaki akaendesa Jakobho kuMesopotamia kuhanzvadzi yaRibheka, amai vaJakobho naEsau, kwaRabhani mwanakomana waBhetueri muAramu.

⁶Esau akazvinzwa kuti Isaki akakomborera Jakobho, akamuendesa kuMesopotamia kundoroora mukadzi ikoko. Akanzwawo kuti paakamukomborera akamuti, “Usaroore mukadzi wechiKanani.”

⁷Akazvizivawo kuti Jakobho akanga ateerera baba naamai vake akaenda kuMesopotamia.

⁸Ipapo Esau akazviziva kuti baba vake Isaki havadi vakadzi vechiKanani,

⁹akabva aenda kuna Ishimaeri mwanakomana waAbhurahamu, akandoroora Maharati mwana waIshimaeri, hanzvadzi yaNebhayoti achiwedzera pavakadzi vaakanga anavo.

¹⁰Jakobho akapinda murwendo rwake rwokuenda kuHarani achibva kuBheerishebha.

¹¹Akadokerwa nezuva ave pane imwe nzvimbo akararapo. Ava kurara akatora rimwe ibwe repo akariita mutsago ndokukotsira zvake.

¹²Akarota achiona manera akanga akamiswa panyika achisvika kudenga, vatumwa vaMwari vachiashandisa kukwira kudenga nokuburuka pasi.

¹³Akaonawo Tenzi amire kumusoro kwamanera acho achiti, “Ndini Tenzi, Mwari waAbhurahamu vasekuru vako naMwari waIsaki. Nyika iyoyi yaurere, ndichaipa kwauri navana vako.

¹⁴Vana vako vachawanda seguruva renyika, muchatekeshera kumadokero nokumabvazuva nokuchamhembe nokumaodzanyemba. Pamusana pako iwe navana vako, mhuri dzapasi pose dzichawaniswa makomborero.

¹⁵Chinzwa, ndichava newe ndichikuchengeta kwose kwaunenge uri. Ndichakudzosera kunyika ino nokuti handizombosiyana newe kusvikira ndaita zvandakuudza izvi.”

¹⁶Jakobho akapepuka muhope akati, “Zvechokwadi Tenzi ari panzvimbo ino asi ini ndanga ndisingazvizivi.”

¹⁷Akabva atya ndokuti, “Inga nzvimbo ino inoera! Imba yaMwari chete, iwoyu ndomusuo wedenga.”

¹⁸Jakobho akafumomuka, akatora ibwe raakanga akatsamira ndokurimisa kuti rive ibwe rechiyeuchidzo, ndokubva adira mafuta pamusoro paro.

¹⁹Akatumidza nzvimbo iyoyo zita rokuti Bhetieri,[10] asi kare guta iroro raimbonzi Ruzi.

²⁰Jakobho ndokupika nemhiko achiti, “Kana Mwari akava neni akandichengeta parwendo rwangu rwandiri kuenda achindipa chokudya nechokupfeka,

²¹ndichizodzokerazve kumusha kwababa vangu zvakanaka, Tenzi achava Mwari wangu.

²²Paibwe iri randamisa pano kuti rive ibwe rechiyeuchidzo pachava imba yaMwari. Pazvinhu zvose zvamuchandipa ndichabvisa chegumi chazvo ndichikupai.”