Read Bhaibhiri Idzva rechiShona Mavambo 30 Bible Online

Mavambo 30 - Bhaibhiri Idzva rechiShona bible

Mavambo 30

¹Rakeri paakaona kuti haasi kuberekera Jakobho vana, akaitira mukoma wake shanje. Akanyunyutira Jakobho achiti, “Ndipeiwo mwana. Kana ukasandipa zviri nani kuti ndife zvangu!”

²Jakobho akashatirirwa Rakeri akati, “Ko ndini ndava kutora nzvimbo yaMwari here akaita kuti ushaye mbereko?”

³Rakeri akati, “Hoyuka Bhiriha muranda wangu pindai naye mumba zvako, andiberekere vana, ndiumbewo mhuri.”

⁴Saizvozvo Rakeri akapa Jakobho muranda wake wechikadzi, Bhiriha kuti ave mukadzi wake Jakobho akapinda naye mumba.

⁵Bhiriha akava napamuviri ndokuberekera Jakobho mwana mukomana.

⁶Rakeri akati, “Mwari andiitira ruenzaniso, anzwa chichemo changu akandipawo mwana mukomana.” Naizvozvo akamutumidza zita rokuti Dhani.

⁷Bhiriha muranda waRakeri akavazve napamuviri ndokuberekera Jakobho mwana mukomana wechipiri.

⁸Ipapo Rakeri akati, “Ndakwikwidzana nomukoma wangu, ndikakunda.” Akabva amutumidza zita rokuti Nafutari.

⁹Rea paakaona kuti amira kubereka akapa Jakobho muranda wake Ziripa kuti ave mukadzi wake.

¹⁰Ziripa, muranda waRea akaberekera Jakobho mwana mukomana.

¹¹Rea akati, “Makorokoto! Ndaita rombo rakanaka!” Akamutumidza zita rokuti Gadhi.

¹²Ziripa, muranda waRea akaberekera Jakobho mwana mukomana wechipiri.

¹³Rea akati, “Aiwa ndazofara kwazvo! Pamusana peizvi vakadzi vachanditi, ‘Zvako mai wakakomborerwa.’ ” Naizvozvo akamutumidza zita rokuti Asheru.

¹⁴Rimwe zuva panguva yokukohwa koroni, Rubheni akandotanha michero musango akauya nayo kuna amai vake Rea. Rakeri vakati kuna Rea, “Dondipaiwo michero yomwana wako.”

¹⁵Rea akati, “Heya, zvawakanditorera murume wangu hazvina kukugutsa nhai! Zvino wodazve kunditorera michero yomwana wangu!” Rakeri akati, “Kana ukandipa michero yomwana wako ungatorane zvako nomurume kwousiku hwanhasi.”

¹⁶Ava manheru, Jakobho paakauya achibva kumafuro, Rea akandomutambira akati, “Nhasi unofanira kuuya kumba kwangu nokuti ndakubvisira muripo wemichero yomwana wangu.” Jakobho akabva andorara kwaRea usiku ihwohwo.

¹⁷Mwari akanzwa chichemo chaRea akabva abata pamuviri ndokubereka mwana mukomana wechishanu.

¹⁸Rea akati, “Mwari andipa mubayiro wangu nokuti ndakapa murume wangu muranda wangu.” Nezvo akamutumidza zita rokuti Isakari.

¹⁹Rea akava napamuviri zvakare akabereka mwana mukomana wechitanhatu.

²⁰Rea akati, “Mwari andipa chipo chakanaka. Rwendo runo murume wangu ndiye ava kuzogara neni zvino, nokuti ndamuberekera majaya matanhatu.” Saka akamutumidza zita rokuti Zebhuruni.

²¹Rea akazobereka mwana musikana akamutumidza zita rokuti Dhina.

²²Mwari akarangarirawo Rakeri. Mwari akanzwa munamato wake ndokubva amupawo mbereko.

²³Rakeri akava napamuviri akabereka mwana mukomana akati, “Mwari abvisa kuzvidzwa kwangu.”

²⁴Akamutumidza zita rokuti Josefi achiti, “Dai Tenzi akandipazve mumwe mwana mukomana!”

²⁵Rakeri paakabereka Josefi, Jakobho akati kuna Rabhani, “Chiregai ndichidzokera kumusha kwangu, kunyika kwangu.

²⁶Saka chindipai zvenyu madzimai angu andakaitira ugariri, navana vangu, ndiende nokuti imi munoziva kushanda kwandakakuitirai.”

²⁷Asi Rabhani akamuti, “Ndapota zvangu, dai wagara. Ndakanyatsoongorora ndikaona kuti, Tenzi akandikomborera pamusana pako.

²⁸Reva zvako mubayiro waunoda kuti ndipote ndichikupa.”

²⁹Jakobho akati, “Imi munoziva kukushandirai kwandakaita, munozivawo machengetero andakaita zvipfuwo zvenyu.

³⁰Pandakasvika pano maiva nezvipfuwo zvishomanana, zvikazowanda kwazvo. Tenzi akakukomborerai pose pandaibata. Ko munoti mhuri yangu ndichazoishandirawo rini?”

³¹Rabhani ndokuti, “Zvino chii chandingakupe?” Jakobho akati, “Regai zvenyu kundipa chinhu. Kana mabvuma zvandinokukumbirai, ndiregei zvenyu ndichifudza zvipfuwo zvenyu.

³²Ini ndichacherechedza zvipfuwo zvenyu nhasi, ndichitsaura hwai nehwayana dzina mavara mavara nedzina makamba makamba nenhema. Ndichatsaurawo mbudzi dzose dzina makamba makamba nedzina mavara mavara. Zvipfuwo izvozvo ndizvo zvingave mubayiro wangu.

³³Pamunouya kuzoongorora mubayiro wangu muchazoziva kuti ndiri munhu akadii pakutendeka. Kana mukawana ndiine mbudzi zvayo isina mavara mavara kana makamba makamba zvawo, kunyange hwai isiri nhema munobva maziva kuti ndakukorovherai.”

³⁴Rabhani akati, “Zvakanaka, ngatiite zvawareva.”

³⁵Musi iwoyo, Rabhani akatsaura mbudzana nezvikotora nenhunzvi dzose dzembudzi dzakanga dzina mavara mavara nedzaiva namakamba makamba neyose zvayo yaiva nevara jena, akatsaurawo hwayana nhema dzose akapa vana vake kuti vadzichengete.

³⁶Rabhani akati vana vake vabve pana Jakobho vaende kunzvimbo yerwendo rwamazuva matatu. Jakobho akasara achifudza zvipfuwo zvaRabhani zvakanga zvasara.

³⁷Jakobho akatora tumapango tunyoro twomupopura nomuarimondi nomupureni, akakwatura makanda acho achiti apa kwaturei apa siyei apa kwaturei apa siyei, tuchisara twava nemitsetse mitsetse mitema nemichena.

³⁸Akaisa tumapango twacho pedyo nemidziyo madzainwira mvura, patwaionekwa nezvipfuwo pazvaiuya kuzonwa mvura nokuti zvaiti zvikasvikapo, mikono yotandana nehadzi dzichibva dzaita mazamu.

³⁹Zvino iyoyo yakanga iri nguva yokutandana kwezvipfuwo, saka zvipfuwo zvakaita mazamu zvichitarisa tumapango twuya zvakabereka vana vane mitsetse mitsetse, navana mavara mavara navana makamba makamba.

⁴⁰Jakobho akatsaura hwayana, zvipfuwo zvose zvakasara akazviisa pazvo zvoga zvakatarisana nezvipfuwo zvaRabhani zvaiva nemitsetse mitsetse nezvakanga zviri zvitema. Ndokutanga kwakaita Jakobho kuita matanga ezvipfuwo zvavo pachavo vasisasanganise nedanga rezvipfuwo zvaRabhani.

⁴¹Kwaiti kana zvipfuwo zvakasimba zvabindura, Jakobho aitora tumapango tuya otuisa, pedyo nemidziyo yokunwira mvura iya, patwaionekwa nezvipfuwo kuti zviite zamu pakatarisana notumapango tuya.

⁴²Asi kana zvipfuwo zvacho zvainge zviri ndonda, akanga asingatandarike tumapango twacho. Saka zvipfuwo zvakanga zvakaondoroka zvaiva zvaRabhani, asi zvakasimba zviri zvaJakobho.

⁴³Naizvozvo Jakobho akava mupfumi, akava nezvipfuwo zvizhinji navaranda vechirume nevechikadzi nengamera namadhongi.