Read Bhaibhiri Idzva rechiShona Mavambo 33 Bible Online

Mavambo 33 - Bhaibhiri Idzva rechiShona bible

Mavambo 33

¹Jakobho akatarisa akaona Esau achiuya namazana mana avarume. Akakamura vana vake achiti Rea navake, Rakeri navake, varanda vechikadzi vaye vaviri navavowo.

²Akatungamidza varanda vaye navana vavo pamberi, vachiteverwa naRea navana vake, kuchizouya Rakeri naJosefi kwokupedzesera.

³Iye Jakobho akavatungamirira, achiswedera kune mukoma wake akamugwadamira pasi kanomwe kudzamara azosvika kwaaiva.

⁴Asi Esau akamhanyira kundomuchingura, akasvikomumbundira, akati koche mutsipa wake akamutsvoda, ndokubva vose vasvimha kuburitsa misodzi.

⁵Esau akatarisa akaona vakadzi navana akati, “Ko ava vaunavo ndivanaani?” Jakobho ndokuti, “Vana vangu ini muranda wenyu vandakapiwa naMwari nokuda kwenyasha dzake.

⁶Varanda navana vavo vakaswederawopo vakamugwadamira.

⁷Kwakatevera Rea navana vake vakauyapowo vakamugwadamira. Pakupedzesera, Josefi naRakeri vakauyawo vakamugwadamira.”

⁸Esau akati, “Ko matanga namatanga ezvipfuwo andasangana nawo ndeeiko?” Jakobho akati, “Ndeokukutetai changamire kuti mundiitirewo tsiye nyoro.”

⁹Esau akati, “Munun'una, ini ndinazvowo zvakawanda! Chengeta zvako zvinhu zvako!”

¹⁰Jakobho akati, “Kweteka. Kana mandiitira mwoyo munyoro, ndinokumbira kuti mugamuchire zvenyu zvipo zvandiri kukupai. Pandaona chiso chenyu ndaita sendaona chiso chaMwari nokuti mandifarira zvikuru.

¹¹Gamuchirai zvenyu zvipo zvandakuigirai nokuti Mwari akaita zvokundiwodzvorera kwazvo. Chinondipa kudaro ndechokuti ndine zvose.” Akaramba achimunyengetedza kusvikira azvigamuchira.

¹²Esau akazoti, “Ngatichisimukai tiende zvedu, ini ndichakutungamirirai pamberi.”

¹³Asi Jakobho akamuti, “Changamire munoziva kuti vapwere havana kusimba. Uye ndinotyirawo hwai nemombe dzandinadzo dziri kuyamwisa. Kana zvikanyanya kumhanyiswa kwezuva rimwechete zvaro matanga ose ezvipfuwo zvinopera kufa.

¹⁴Zvino dai mukatungamira zvenyu pamberi pomuranda wenyu changamire. Ini ndichatevera zvangu zvishoma nezvishoma kudzamara ndasvika kwamuri kuSeiri sokufamba kwezvipfuwo zvandiri kutinha izvi nokufambawo kwavana, changamire.”

¹⁵Esau ndokuti, “Kana zvakadaro rega ndikusiyire vamwe varume vandinavo.” Jakobho akati, “Ko munenge muchadarirei nhai changamire? Inga mandiitira mwoyo munyoro wani.”

¹⁶Nokudaro Esau akabvapo zuva iroro odzokera zvake kuSeiri.

¹⁷Asi Jakobho akaenda kuSukoti akambovaka musha wake namatanga ezvipfuwo zvake ikoko. Ndokusaka vakatumidza nzvimbo iyoyo zita rokuti Sukoti.[19]

¹⁸Jakobho akasvika zvakanaka kuShikemu munyika yeKanani achibva kuMesopotamia,[20] akasvikodzika matendhe ake pedyo neguta reShikemu.

¹⁹Jakobho akatenga katunhu ikako kaakadzika matendhe ake kuna Hamori baba waShikemu. Akabvisa zana remari yamapesita yesirivha.

²⁰Akavaka atari ipapo akaitumidza zita rokuti Erieroheisiraeri.[21]