Read Bhaibhiri Idzva rechiShona Mavambo 49 Bible Online

Mavambo 49 - Bhaibhiri Idzva rechiShona bible

Mavambo 49

¹Jakobho akakokorodza vanakomana vake akati, “Chiunganai pano mose ndikuudzei zvichazoitika kwamuri mune ramangwana.

²Unganai nuteerere imi vana Jakobho, munzwe zvandava kutaura ini Isiraeri baba wenyu.

³Rubheni, ndiwe dangwe rangu, chiratidzo chokutanga chesimba rangu, wandakabereka ndichiri kuzvinzwa. Pasimba napakukudzwa ndiwe wapamusoro.

⁴Unovhaira semvura iri kuvira, asi hauzovi mukuru nokuti wakapinda iwe mumba mangu, ini baba ukan'oresa pandinorara, uchitoenda zvako pauriri hwangu.

⁵“Simeoni naRevhi mukoma nomun'una, zvombo zvehondo zvavo ndezvokumutsisa musindo chete.

⁶Pabangano ravo handitsikipo, handina chandinoronga navo, nokuti vakauraya vanhu vakashatirwa. Vakacheka marunda emombe, vachiita zvoutsinye zvavo.

⁷Mwari ngaarange kutsamwa kwavo, nokuti kunotyisa. Ngaarange hasha dzavo nokuti dzinovaitisa utsinye. Ndichati mumwararire zvenyu muzvizvarwa zvaJakobho muti mwarara zvenyu mukati mavaIsiraeri.

⁸“Iwe Judha, ndiwe ucharumbidzwa nehama dzako. Uchadzipa huro dzavavengi vako uchivakurira, vana vababa vako vachakugwadamira.

⁹Judha mwana weshumba chaiyo, anobata nyama achibva adzokera kubako rake, ondozorora zvake akazvambarara. Seshumba hadzi hakuna angashinge kumumutsa.

¹⁰Tsvimbo youshe haizobvi pana Judha. Haazotorerwa nyembe youmambo, kusvikira muridzi wenyembe asvika. Ndudzi dzose dzavanhu dzichamuteerera.

¹¹Achasungirira dhongi rake pamugirepisi achasungirira chigondora chake chedhongi pamugirepisi wakanaka kwazvo, hanzu dzake achisuka zvake muwaini, zvipfeko zvake achisuka muwaini yakati piriviri kutsvuka.

¹²Meso ake achatsvuka kunge waini, meno ake agochena kuti mbe-e somukaka.

¹³“Zebhuruni achava mugari wokumahombekombe kwegungwa. Nyika yake ichava yokusvikira ngarava, muganhu wake uchisvika kuSidhoni.

¹⁴“Isakari idhongi chairo kusimba, sedhongi riri pakati pemitoro yaro.

¹⁵Paachaona kuti agere panyika yakanaka nyika inomufadza kwazvo, achabvuma zvake kutakura mutoro pamapfudzi.

¹⁶“Dhani achavawo mutongi wavanhu vake, sezvichangoitawo mamwe madzinza evaIsiraeri.

¹⁷Dhani achaita senyoka iri panzira, senyoka inouturu iri panofamba vanhu, inoruma bhiza nechepazondo raro, mutasvi waro achiwira pasi negotsi.

¹⁸Tenzi we-e ini ndamirira ruponeso rwenyu.

¹⁹“Gadhi acharwiswa namagandanga, asi iye achatsikirirana nawo kutevera.

²⁰“Asheru achawana zvokudya, zvokudya zvakawanda zvakanaka, zvinotodyiwawo kwazvo namadzimambo.

²¹“Nafutariwo ungati isheshe yenondo inotamba-tamba zvayo, inoberekawo mhuru dzakanaka.

²²“Josefi akaita sembizi imire pachisipiti, ungati imbizi iri mujinga megomo.[28]

²³“Mhandu dzake dzinomurwisa zvinotyisa, dzichimudzingirira nouta nemiseve.

²⁴Asi uta hwaJosefi hunoramba hwakatsigirwa. Maoko ake achiramba akasimbaradzwa, nesimba raiye Samasimbaose, waJakobho ndiye mufudzi ndiye bako raIsiraeri.

²⁵Mwari wababa vako ngaakubatsire, iye Aripagomo akukomborere. Akukomborere nokukunayisira mvura, akupewo mvura inobva muvhu. Ngaakomborere madzimai enyu agobereka vana vavanozoyamwisa, akomborerewo zvipfuwo zvenyu zvigobereka vana vokuyamwisa.

²⁶“Makomborero andakupa ini baba vako anopfuura makomborero anobva mumakomo epasi chigare. Anopfuura zvinokosha zviri mumakomo okugara nokugara.[29] Ndiwo makomborero achava aJosefi, akasarudzwa naMwari kutungamirira vakoma vake.

²⁷“Bhenjamini mhumhi chaiyo inorura, inobata nyama mangwanani, manheru yogara pasi kuigovanisa.”

²⁸Iwaya ose ndiwo madzinza gumi namaviri evaIsiraeri. Mashoko aya ndiwo akataurwa nababa wavo achivakomborera, achipa mumwe nomumwe chikomborero chakakodzerana naye.

²⁹Jakobho akazorongera vana vake achiti, “Nguva yangu yokuti ndichiendawo kwakaenda vamwe vokwangu yava kusvika. Munofanira kuzondiviga pane madzibaba angu, mubako riya riri mugura raEfuroni worudzi rwechiHiti.”

³⁰Ndiro bako riya riri mugura kuMakipera riri nechokumabvazuva kweMamure, munyika yeKanani, rakatengwa naAbhurahamu pamwechete nomunda wacho kuna vaEfuroni muHiti ikava nzvimbo yavo yokuviga vanhu.

³¹Ipapo ndipo pakavigwa Abhurahamu nomudzimai wake Sara. Isaki nomudzimai wake Ribheka vakavigwawo ipapo. Rea ndakazomuvigwawo ipapo.

³²Munda wacho nebako ririmo zvakatengwa kuvaHiti.

³³Kuzoti Jakobho apedza kurongera vana vake akarara pamubhedha wake, ndiye sarai oendawo kwakaenda vamwe.