Read Bhaibhiri Idzva rechiShona Mavambo 5 Bible Online

Mavambo 5 - Bhaibhiri Idzva rechiShona bible

Mavambo 5

¹Haanoi mazita ezvizukuru zvaAdhamu. Mwari paakasika munhu, akamusika akafanana naiye Mwari pachake.

²Akavasika vari munhurume nomunhukadzi, akavakomborera akavatumidza kuti vanhu paakavasika.

³Adhamu akagara makore zana namakumi matatu ndokubereka mwana mukomana akafanana naye, akamutumidza kuti Seti.

⁴Akazoberekawo vamwe vana, vakomana navasikana. Mushure mokubereka Seti, Adhamu akazogarazve mazana masere amakore.

⁵Saka ose pamwechete, Adhamu akagara mazana mapfumbamwe amakore ana makore makumi matatu, ndokuzofa zvake.

⁶Seti akagara zana ramakore namakore mashanu ndokubereka Enoshi.

⁷Seti akaberekawo vamwe vana, vakomana navasikana. Mushure mokubereka Enoshi, Seti akagarazve mazana masere amakore ana makore manomwe.

⁸Saka ose pamwechete, Seti akagara mazana mapfumbamwe amakore ana makore gumi namaviri ndokuzofa zvake.

⁹Enoshi akagara makumi mapfumbamwe amakore ndokubereka Kenani.

¹⁰Enoshi akazoberekawo vamwe vana, vakomana navasikana. Mushure mokubereka Kenani, Enoshi akazogarazve mazana masere amakore namakore gumi namashanu.

¹¹Saka ose pamwechete, Enoshi akagara mazana mapfumbamwe amakore ana makore mashanu, ndokuzofa zvake.

¹²Kenani akagara makumi manomwe amakore ndokubereka Mahararieri.

¹³Kenani akaberekawo vamwe vana, vakomana navasikana. Mushure mokubereka Mahararieri, Kenani akazogarazve mazana masere ana makumi mana amakore.

¹⁴Saka ose pamwechete, Kenani akagara mazana mapfumbamwe ane gumi ramakore, ndokuzofa zvake.

¹⁵Mahararieri akagara makumi matanhatu amakore ana makore mashanu akazobereka Jaredhi.

¹⁶Mushure mokubereka Jaredhi, Mahararieri kagara mazana masere ana makumi matatu amakore, akaberekawo vamwe vana, vakomana navasikana.

¹⁷Saka ose pamwechete, Mahararieri akagara makore mazana masere ana makumi mashanu, ndokuzofa zvake.

¹⁸Jaredhi akagara zana rina makumi matanhatu amakore namakore maviri ndokubereka Enoki.

¹⁹Jaredhi akaberekawo vamwe vana, vakomana navasikana. Mushure mokubereka Enoki, Jaredhi akazogarazve mazana masere amakore.

²⁰Saka ose pamwechete, Jaredhi akagara mazana mapfumbamwe ana makumi matanhatu amakore ana makore maviri ndokufa zvake.

²¹Enoki akagara makumi matanhatu amakore ana makore mashanu, ndokubereka Metushera.

²²Mushure mokubereka Metushera Enoki akanyatsowadzana naMwari kwamazana matatu amakore, akaberekawo vamwe vana, vakomana navasikana.

²³Saka ose pamwechete, Enoki akagara mazana matatu amakore ana makore makumi matanhatu namashanu.

²⁴Enoki ainyatsowadzana naMwari, ndokubva anyangarika nokuti Mwari akamutora.

²⁵Metushera akagara zana rine makumi masere amakore ana makore manomwe vakazobereka Rameki.

²⁶Metushera akaberekawo vamwe vana vakomana navasikana. Mushure mokubereka Rameki, Metushera akazogarazve mazana manomwe ana makumi masere amakore ana makore maviri.

²⁷Saka ose pamwechete, Metushera akagara mazana mapfumbamwe namakumi matanhatu amakore ana mapfumbamwe ndokuzofa zvake.

²⁸Rameki akagara zana namakumi masere amakore ana makore maviri, akaberekawo mwana mukomana

²⁹waakatumidza zita rokuti Nowa, achiti, “Mwana uyu ndiye achatizorodza mwoyo pabasa redu rakaoma ratinotambura tichiita namaoko edu zvakakonzerwa nenyika yakapiwa rushambwa naTenzi.”

³⁰Rameki akaberekawo vamwe vana, vakomana navasikana. Mushure mokubereka Nowa, Rameki akazogarazve mazana mashanu ana makumi mapfumbamwe amakore ana makore mashanu.

³¹Saka ose pamwechete, Rameki akagara mazana manomwe ana makumi manomwe amakore ana makore manomwe, ndokuzofa zvake.

³²Nowa akagara mazana mashanu amakore ndokubereka Shemu naHamu naJafeti.