Read Bhaibhiri Idzva rechiShona Mavambo 7 Bible Online

Mavambo 7 - Bhaibhiri Idzva rechiShona bible

Mavambo 7

¹Tenzi akataurira Nowa achiti, “Pinda mungarava, iwe nemhuri yako yose. Ndazviona kuti pachizvarwa ichi ndiwe wakarurama.

²Pamhando yoga yoga yemhuka dzisina kun'ora tora mikono minomwe nehadzi dzacho nomwe. Pamhando yoga yoga yemhuka dzakan'ora utorewo mbiri mbiri hono nehadzi yacho.

³Torawo machongwe manomwe nesheshe nomwe pamhando yoga yoga yeshiri dzedenga kuti mhando yadzo isatsakatike panyika.

⁴Shure kwamazuva manomwe ini ndichanayisa mvura panyika siku nesikati, kwamazuva makumi mana. Ndichatsakatisa zvinhu zvose zvipenyu panyika.”

⁵Nowa akaita zvose zvaakaudzwa naTenzi.

⁶Nowa akanga ava namazana matanhatu amakore panguva yakauya mafashamo emvura.

⁷Nowa akapinda mungarava pamwechete nomudzimai navanakomana vake navaroora vake kuti vapunyuke mafashamo emvura.

⁸Mhando dzose dzemhuka dzakan'ora nedzisina kun'ora dzakapinda mungarava naNowa,

⁹dziri mbiri mbiri, hono nehadzi, pamwechete nemhando dzose dzeshiri nezvinokambaira nokuzvova napasi sokutaurirwa kwakaitwa Nowa naMwari.

¹⁰Kuzoti kwapera mazuva manomwe, mafashamo emvura akabva auya panyika.

¹¹Nowa paakanga ava namazana matanhatu amakore mumwedzi wechipiri pazuva regumi nechinomwe romwedzi iwoyo, ndiro zuva rakatubuka zvisipiti zvemvura zhinji yepasipasi penyika zvikapfachuka, mahwindo okudenga akazarurwa,

¹²mvura zhinji ikanaya panyika siku nesikati, kwamazuva makumi mana.

¹³Pazuva iroro Nowa nomudzimai wake navanakomana vake vanaShemu naHamu naJafeti navaroora vake vatatu vakapinda mungarava

¹⁴pamwechete nemhando dzose dzemhuka, nezvipfuwo nezvinokambaira nokuzvova napasi, nemhando dzose dzeshiri.

¹⁵Zvinhu zvose zvipenyu zvino mweya wokufema zvakapinda mungarava naNowa zviri zviviri zviviri,

¹⁶chikono nechikadzi sezvakaudzwa Nowa naMwari. Tenzi ndokumupfigiramo.

¹⁷Mvura zhinji yakaramba ichinaya pasi pose kwamazuva makumi mana. Yakawanda zvokuti yakasumudza ngarava ikayangarara pamusoro pemvura.

¹⁸Mvura yakaita mafashafasha, ikatutumuka kuzara pasi pose, ngarava ikayangarara pamusoro pemvura.

¹⁹Mvura yakazara ikanyudza makomo marefu ose epasi pose.

²⁰Mvura yakazara ikafukidza makomo ikaapfuurira namamita manomwe.

²¹Zvinhu zvose zvipenyu zvinofamba panyika zvakafa, zvaiti: shiri nezvipfuwo nemhuka nezvinokambaira navanhu vose.

²²Zvinhu zvose zvipenyu zvino mweya wokufema zvisingagare mumvura zvakapera kufa.

²³Zvinhu zvipenyu zvose zvakatsakatiswa pasi pose zvaiti, vanhu nemhuka nezvinokambaira nokuzvova napasi neshiri dzedenga, zvakatsakatiswa pasi pose. Asi kwakangosara Nowa chete navaaiva navo mungarava.

²⁴Mvura ndokuramba yakati fasha panyika kwamazuva zana namakumi mashanu.