Read Bhaibhiri Idzva rechiShona Mavambo 9 Bible Online

Mavambo 9 - Bhaibhiri Idzva rechiShona bible

Mavambo 9

¹Mwari akakomborera Nowa navana vake akati, “Berekanai muwande muzadze nyika.

²Mhuka dzose dzapasi pose, neshiri dzose dzedenga, nezvose zvinokambaira nokuzvova napasi, nehove dzose dzomugungwa dzichakutyai dzichikudederai. Dzose ndadziisa mumaoko enyu.

³Zvinhu zvipenyu zvose zvinofamba zvichava chokudya chenyu. Ndakupai zvose zvazvo sokukupai kwandakaita miriwo minyoro.

⁴Asi chete nyama ichine ropa rayo, ichine upenyu hwayo, musaidye.

⁵Ndinoti kuurayiwa kwenyu vanhu kunofanira kutoripwa. Mhuka kana munhu anouraya munhu ndinoda kuona kuti atoripa. Munhu anouraya mumwe munhu, mhaka iyoyo inoripwa norufu rwomunhu.

⁶Ani naani zvake anodeura ropa romumwe munhu, ropa rakewo rinofanira kutoita zvokudeurwa nomunhu nokuti Mwari akasika munhu akamufananidza naiye pachake.

⁷“Asi imi berekanai muwande, muite zararira chairo kuzara panyika, murambe muchiwanda mairi.”

⁸Mwari akataurira Nowa navanakomana vake achiti,

⁹“Chinzwai, ndava kuita chitenderano changu newe nezvizvarwa zvako zvichauya,

¹⁰pamwechete nezvipenyu zvose zvaunazvo, zvinoti: shiri nezvipfuwo nemhuka dzose dzepanyika dzinewe nezvose zvabuda mungarava nemhuka dzose dzapasi pose.

¹¹Chitenderano chandinoita nemi ndechichi chokuti, ‘Handichazomboparadza zvakare zvipenyu zvose namafashamo emvura uye hakuchazovizve namafashamo emvura okuparadza pasi pose.’ ”

¹²Mwari akati, “Ichi ndicho chiratidzo chechitenderano chandinoita nemi nezvipenyu zvose zvinemi nezvizvarwa zvose zvichauya.

¹³Ndamisa muraraungu wangu mumakore kuti uve chiratidzo chechitenderano changu napasi pose.

¹⁴Kana ndichinge ndauyisa makore panyika, muraraungu ukaonekwa mumakore,

¹⁵ndipo pandichayeuka chitenderano changu chandaita nemi nezvipenyu zvose, saka mvura haizombove mafashamo okuparadza zvinhu zvipenyu zvose.

¹⁶Kana muraraungu wamira mumakore, ndichauona ndigoyeuka chitenderano chokugara nokugara chandaita nezvipenyu zvose zviri panyika.”

¹⁷Mwari akataurira Nowa achiti, “Ichi ndicho chiratidzo chechitenderano chandaita nezvipenyu zvose zviri panyika.”

¹⁸Vanakomana vaNowa vakabuda mungarava ndiShemu naHamu naJafeti. Hamu ndiye baba vaKanani.

¹⁹Ivava ndivo vanakomana vatatu vaNowa. Kwavari ivava ndiko kwakazobva vanhu vose vari panyika pano.

²⁰Nowa aiva murimi akasima munda wemagirepisi.

²¹Akanwa waini akararadza akarara mutendhe rake asina kupfeka.

²²Hamu baba waKanani akaonerera baba wake asina kupfeka, akandoudza mukoma nomunun'una wake panze.

²³Shemu naJafeti vakatora nguwo vakaisumudza kusvika pamapfudzi avo vose vari vaviri, vakadududza namakotsi vakasvikofukidza baba vavo vakatarisa rutivi, saka havana kutarisa baba vavo vakanga vasina kupfeka.

²⁴Nowa paakapengenuka mukuraradza newaini, akaziva zvakanga zvaitwa kwaari nomwanakomana wake muduku.

²⁵Akati, “Kanani ngaawirwe norushambwa, ngaave muranda chaiye wokupedzesera kuvakoma navanun'una vake.”

²⁶Akatiwo, “Ngaarumbidzwe Tenzi Mwari waShemu, Kanani ngaave muranda waShemu.

²⁷Mwari ngaakudziridze Jafeti, ngaagare mumatendhe aShemu, Kanani ave muranda wake.”

²⁸Shure kwamafashamo emvura Nowa akagara mazana matatu amakore ana makore makumi mashanu.

²⁹Saka ose pamwechete, Nowa akaita makore mazana mapfumbamwe ana makumi mashanu ndokuzofa zvake.