Read Bhaibhiri Idzva rechiShona 2 Samueri 1 Bible Online

2 Samueri 1 - Bhaibhiri Idzva rechiShona bible

2 Samueri 1

¹Mushure mokufa kwaSauro, Dhavhidhi adzoka kwaakanga andorakatisa kuuraya vaAmareki Dhavhidhi akambogara mazuva maviri muZikiragi.

²Pazuva rechitatu racho, ndiye vhu mumwe murume achibva kumatendhe okwaSauro, aine hembe dzakabvaruka, nehuruva mumusoro. Paakasvika kuna Dhavhidhi, akati pasi gwadagwa achimuremekedza.

³Dhavhidhi akati kwaari, “Unobva kupi?” Iye akamupindudra achiti, “Ndapunyuka kumatendhe eIsiraeri.”

⁴Dhavhidhi akati kwaari, “Tipire tinzwe, zvafamba sei?” Iye akapindura achiti, “Vanhu vatiza kuhondo. Uye vamwe vavo vakawanda kwazvo varakatiswa, vafa. Sauro nomwanakomana wake Jonatani vafawo.”

⁵Dhavhidhi ndokuti kujaya iri rokuuya neshoko kwaari, “Ko wazviziva sei kuti Sauro nomwanakomana wake Jonatani vafa?”

⁶Jaya rakamuudza rikati kwaari, “Ndakangosvikawo zvangu nokugomo reGiribhoa, onei, Sauro aripo akazendamira pfumo rake ukuwo ngoro dzehondo dzamabhiza navachairi vadzo vachiti tsvome tsvome naye.”

⁷Paakati cheu kutarisa shure, akandiona ndokubva andidaidza, ini ndokuti, “Ndokuno changamire.”

⁸Iye ndokunditi, “Ndiwe aniko iwe?” Ini ndikati, “Ndiri muAmareki.”

⁹Iye akanditi, “Uya umire pandiri pano uchindipedzisa zvako nokuti ndatambura ini asi mweya wangu warambirira mandiri.

¹⁰Saizvozvowo ndakandomira paakanga ari ndokubva ndamupedzisa nokuti ndakanga ndanyatsoona kuti haamborarama namawiro aakanga akaita pasi kudaro. Ndakatora ngundu yakanga iri mumusoro make netsambo yaiva muruoko rwake. Ndauya nazvo kwamuri changamire.”

¹¹Dhavhidhi akati ndu hembe dzake akadzibvarura neshungu, ndozvakaitawo vamwe varume vose vaaiva navo.

¹²Vakachema Sauro nomwanakomana wake Jonatani navanhu vaTenzi nemhuri yose yeIsiraeri nokuti vakanga varakatiswa kuuraiwa namapakatwa. Vakahwihwidza kuchema vakatsanya kusvikira manheru.

¹³Dhavhidhi akati kujaya riya rokumutaurira, “Ko iwe unobva kupi?” Iye akati, “Ini ndiri mwana womumwe muuyi, muAmareki.”

¹⁴Dhavhidhi ndokuti kwaari, “Chakakupa kurega kutya kusimudzira ruoko rwako kuparadza muzodzwa waTenzi chii?”

¹⁵Dhavhidhi akabva adaidza rimwe jaya akati, “Naye munhu uyu, mupfuudze.”

¹⁶Akabva amuponda akafa. Dhavhidhi akati kwaari, “Rufu rwako ndorwokuzviparira nokuti muromo wako wawataura wokutoti zvako, ‘Ndakauraya muzodzwa waTenzi’ wakuparira.”

¹⁷Dhavhidhi akagurukuta kuchema Sauro nomwana wake Jonatani achiimba rwiyo rwengondo.

¹⁸Akati rudzidziswe vedzinza rokwaJudha. Zvino ngondo yacho ino iyi yakanyorwa muBhuku raJashari, rinoti:

¹⁹“Vanodadisa Isiraeri vacho vachiti kata kata kufa, vachiti kata kata pamitunhu yenyu yakatunhumara. Zvauya sei chokwadi, magamba kuti rakata kudai?

²⁰Dai mangorega zvenyu kuzvitaura kuGati, kunyange zvako kuzviparidzira muAshikeroni. Vanasikana vavaFirisitia vangadaro vakapembera kufara. Vanasikana vavanhu vasina kudzingiswa vakazvitutumadza.

²¹“Imi makomo eGiribhoa pamusoro penyu, dova ngarirege kudonherapo, kana mvura ngairege kunayapo, parege kuva neminda inopa mbeswa zhinji; nokuti nhoo dzamagamba dzakafumurirwa ipapo. Nhoo yaSauro, zvokuzorwa mafuta zvakapera.

²²Museve waJonatani wakanga usingadzoke, usina ropa rewainge wauraya. Bakatwa raSauro haraidzoka risina mafuta amagamba.

²³“Sauro naJonatani kuvanhu, vaiva vepamoyo chaivo. Naivowo pachavo vari vanhu vakanaka. Upenyu hwavo hwose kusvikira parufu, havana kumbopararana. Pakumhanya gondo raisara pasi, pasimba dziri mvumba chaidzo kupfuura shumba.

²⁴“Imi vanasikana veIsiraeri, chemai Sauro ndiye aikupfekedzai hanzu tsvuku dzamandiriri, aiisa zvishongo zvendarama pazvipfeko zvenyu.

²⁵“Zvauya sei chokwadi, magamba kuti rakata mukati mehondo kudai? Jonatani chaiye achiti rashu, kufa pamitunhu yenyu yakatunhumara.

²⁶“Zvako zvandishungurudza mwoyo, mukoma wangu Jonatani kwandiri, wanga uri wapamwoyo chaiye. Kundida kwako kwanga kusingatauriki, kwaikunda rudo rwavanhukadzi.

²⁷“Zvauya sei chokwadi, magamba kuti rakata kudai, zvombo zvenyu zvehondo kuparara kudai?”