Read Bhaibhiri Idzva rechiShona 2 Samueri 11 Bible Online

2 Samueri 11 - Bhaibhiri Idzva rechiShona bible

2 Samueri 11

¹Muchirimo, nguva yepfumvudza, nguva yaiwanzoenda madzimambo kuhondo, Dhavhidhi akatuma Joabhu namakurukota ake pamwechete neIsiraeri yose. Vakandokurira vaAmoni, vakabva vorwisa Rabha. Asi Dhavhidhi akasara zvake kuJerusaremu.

²Zvakaitika kuti manheru zuva rarereka Dhavhidhi akamuka pamubhedha wake ofamba-famba zvake padenga remba yamambo, ari padengapo akaona mukadzi aishamba muviri. Mukadzi uya akanga aine chimiro chakanaka kwazvo.

³Dhavhidhi akatuma munhu kundobvunza kuti mukadzi iyeyo ndiani. Mumwe akati, “Haasi Bhatishebha here, mwana waEriamu mudzimai waUriya muHiti?”

⁴Dhavhidhi ndokutuma nhume dzakandomutora. Mukadzi uyu akauya kwaari. Dhavhidhi akapinda mumba nomukadzi uyu. (Izvozvo mukadzi uyu ainge achitozvichenura pakun'ora kwaakanga aita.) Mukadzi uyu akazodzokera zvake kumba kwake.

⁵Akabata pamuviri akabva atumira shoko kuna Dhavhidhi rokuti, “Ndava napamuviri.”

⁶Dhavhidhi ndokutumira shoko kuna Joabhu rokuti, “Nditumire kuno Uriya muHiti.” Joabhu akatumira Uriya kuna Dhavhidhi.

⁷Pakasvika Uriya kwaari, Dhavhidhi akamubvunza kuti zviri kufamba sei kuna Joabhu uye kuti vanhu vakadii zvavo uyewo kuti hondo iri kurwiwa zvakadii.

⁸Dhavhidhi akati kuna Uriya, “Chimboenda zvako kumba kwako umbondoshamba tsoka dzako uzorore.” Uriya akabuda mumuzinda wamambo achiteverwa pakarepo nechipo chakabviswa namambo.

⁹Asi Uriya akarara kumusuo womuzinda wamambo pamwechete navamwe vavaranda vatenzi wake. Haana kudzika kumba kwake.

¹⁰Pavakataurira Dhavhidhi kuti Uriya haana kudzika kumba kwake, Dhavhihdi akati kuna Uriya, “Ko hauna kubva parwendo here? Chawaregerera kudzika kumba kwako chii?”

¹¹Uriya akati kuna Dhavhidhi, “Mungati uku bhokisi rechitenderano nevokwaIsiraeri nevokwaJudha, vagere kudaro mumisasa, uye changamire wangu Joabhu pamwechete namakurukota enyu changamire wangu vagere panze pachena kudaro, ini ndopondoenda zvangu kumba kwangu kundodya nokunwa nokutopinda zvangu mumba nomukadzi wangu here? Kana ndimiwo zvenyu munongozvionawo kuti ini pachangu handimbofa ndakaita chinhu chakadai.”

¹²Dhavhidhi ndokuti kuna Uriya, “Chiramba zvako uri pano nhasi, mangwana ndopandichakurega woenda zvako.” Saizvozvo Uriya akaramba ari muJerusaremu zuva iroro namangwana acho.

¹³Dhavhidhi akamukoka, iye akadya nokunwa pamwechete naye akasvika pakutomuraradzisa. Asi manheru acho Uriya akaenda akandorara pauriri hwake pamwechete navaranda vatenzi wake. Haana kudzika kumba kwake.

¹⁴Mangwanani acho Dhavhidhi akanyorera Joabhu tsamba akaitumira naiye Uriya.

¹⁵Mutsamba iyoyo akanyora kuti, “Isa Uriya kumberimberi chaiko kunenge kuchipisa hondo kwazvo mugodududza momusiya ari oga kuitira kuti auraiwe afe.”

¹⁶Joabhu paaingunorwisa guta iroro akatuma Uriya kwaaiziva kuti kune shasha chaidzo dzokurwa hondo.

¹⁷Varume vomuguta iri vakabuda vakarwisa Joabhu. Mukati mavanhu, mamwe makurukota aDhavhidhi akafa. Uriya muHiti akaurayiwawo.

¹⁸Joabhu akatuma shoko kuna Dhavhidhi rezvekurwa ikoku.

¹⁹Akarayira nhume iyi kuti, “Ukange wapedza kusvitsa shoko rezvekurwa iri kuna mambo,

²⁰kana mambo akaviruka nehasha akati kwauri, ‘Pakurwa kwenyu makasvikirei pedyo neguta kudaro? Hamaizviziva here kuti vaizopfura vari parusvingo?’

²¹Ko akauraya Abhimereki mwanakomana waJerubhesheti ndiani? Haasiri mukadzi here akamudonhedzera huyo pamusoro kubva parusvingo akafira kuTebhezi? Chamakanga moenderawo pedyo norusvingo chii? Imi mobva mati, ‘Muranda wenyu Uriya muHiti uya akafawo wani.’ ”

²²Saizvozvo nhume iyi yakaenda ikasvika ikataurira Dhavhidhi zvose zvayakanga yatumwa naJoabhu kundotaura.

²³Nhume yakati kuna Dhavhidhi, “Vanhu ivavo vakambotikurira vakatibudira vachitivinga musango. Asi takazodzingirirana navo kusvikira kusuo guru reguta.

²⁴Vemiseve vakapfura kwatiri isu varanda venyu kubva parusvingo. Mamwe makurukota enyu mambo akafa. Muranda wenyu Uriya muHiti uya akafawo.”

²⁵Dhavhidhi akati kunhume iyi, “Enda undoti kuna Joabhu izvi, ngazvirege kukutambudza zvako nokuti hondo inotora wayada. Rwisai nesimba muparadze guta iroro, umutaurire uchimusimbaradza.”

²⁶Mukadzi waUriya paakanzwa kuti murume wake Uriya akafa akachema murume wake.

²⁷Kuzoti nguva yokuchema kuya yapera, Dhavhidhi akati aunzwe kumba kwake, akava mukadzi wake akamuberekera mwana mukomana. Asi zvakanga zvaitwa naDhavhidhi izvi hazvina kufadza Tenzi.