Read Bhaibhiri Idzva rechiShona 2 Samueri 16 Bible Online

2 Samueri 16 - Bhaibhiri Idzva rechiShona bible

2 Samueri 16

¹Dhavhidhi paakangoti pfuurei zvishoma pamusoro paye ndiye Zibha muranda waMefibhosheti nepo pfacha namadhongi aiva nezvityaro akatakudzwa zvingwa mazana maviri, nezana rezvitsumbu zvamagirepisi akaomeswa nemichero zana yomuzhizha neguchu rewaini redehwe.

²Mambo akati kuna Zibha, “Ko wauyirei nezvinhu izvi?” Zibha akati, “Madhongi aya ndeokuti mhuri yamambo iwane chokufambisa. Zvingwa izvi nemichero yezhizha iyi ndechokudya chamajaya enyu. Waini ndeyokuti vanenge vaziya nenyota murenje muno vanwe.”

³Mambo ndokuti, “Ko mwanakomana watenzi wako ari kupiko?” Zibha akati kuna mambo, “Asara zvake muJerusaremu umu. Ari kutoti nhasi mhuri yeIsiraeri ichandidzosera ushe hwababa vangu.”

⁴Mambo akabva ati kuna Zibha, “Chinzwa, zvose zvanga zviri zvaMefibhosheti zvava zvako.” Zibha akati, “Ndinokuremekedzai mambo changamire. Dai mwoyochena wenyu kwandiri wangoramba wakadaro.”

⁵Mambo Dhavhidhi paakasvika kuBhahurimu, akavingwa nomumwe murume wekumhuri yokwaSauro ainzi Shimei mwanakomana waGera. Akanyatsomubudira achimutuka,

⁶achikanda matombo kuna Dhavhidhi nokumakurukota ose amambo Dhavhidhi nokuvanhu vose. Izvozvo varwi vehondo vano chaivo vokwamambo vakanga vakamukuta kurudyi nokuruboshwe.

⁷Shimei aimutuka achiti, “Iwe! Ibva kuno! Ibva! Mhondi yomunhu! Munhu pasina!

⁸Tenzi akatsividza ropa remba yokwaSauro wawakatorera chigaro chokutonga. Tenzi azopa umambo mwanakomana wako Abhusharomu. Yhaa! Wazozviona. Waparara iwe nokuti uri mhondi yomunhu.”

⁹Abhishai mwanakomana waZeruya akati kuna mambo, “Ko uyu imbwa zvayo yakafa kudai angatukireiko mambo changamire? Regai ndimuvinge ndimudimure musoro.”

¹⁰Asi mambo akati, “Munei nazvo nhaimi vana vaZeruya? Zvimwe kudaro ari kundituka pamusana pokuti Tenzi amuti, tuka Dhavhidhi, ndiani zvino angabvunze kuti, ‘Ko izvozvi uri kuitirei?’ ”

¹¹Dhavhidhi akati kuna Abhishai nokumakurukota ake ose, “Hamuoniwo here kuti mwana wangu chaiye wokubereka ari kuda kuparadza upenyu hwangu. Ko kutozoti uyu wokwaBhenjamini zvake? Muregei akadaro. Regai atuke zvake nokuti Tenzi ndiye aita kuti adaro.

¹²Zvichida Tenzi achaona dambudziko rangu akandiitira zvakanaka pamusana pokunyombwa kwandiri kuitwa.”

¹³Dhavhidhi navanhu vake vakapinda zvavo munzira, uku Shimei achifambawo nomujinga mechikomo akavambirana naye achingomunyomba achimupotsera matombo nokumumbumurira guruva.

¹⁴Mambo navanhu vose vakasvika kuna Jorodhani[9] vaneta akambozorora ipapo.

¹⁵Izvozvo Abhusharomu navanhu vose, varume vokwaIsiraeri vakasvika kuJerusaremu, Ahitoferi aivawo naye.

¹⁶Pakasvika Hushai, muAriki, shamwari yaDhavhidhi iya kuna Abhusharomu yakati, “Zvoumambo hwenyu ngazvigare zvakadaro, ngazvirambe zvakadaro mambo!”

¹⁷Abhusharomu akati kuna Hushai, “Ndiko kuvimbika here kushamwari yako nhai ikoku? Waregerei kuenda neshamwari yako?”

¹⁸Hushai akati kuna Abhusharomu, “Bodo, nokuti anenge asarudzwa naTenzi navanhu ivava pamwechete navarume vose vokwaIsiraeri ndiye wangu iyeyo, uye ndiyewo wandinogara naye.

¹⁹Uyezve ndiani wandingashandirewo kusatoti mwanakomana wake? Sokushandira kwandaingoita baba venyu ndokushandirawo kwandichaitira imi.”

²⁰Abhusharomu ndokuchizoti kuna Ahitoferi, “Tipewo zano, toitei?”

²¹Ahitoferi akati kuna Abhusharomu, “Torana navarongo vababa vako vavakasiya kuti vachengete musha ugare navo savakadzi vako. Isiraeri yose ichazvinzwa kuti wakazvimutsira daka nababa vako. Izvozvo zvinobva zvasimbaradza vanhu vaunavo”

²²Vanhu vakabva vadzikira Abhusharomu tendhe padenga remba, Abhusharomu akatorana navarongo vababa vake vaIsiraeri vose vachiona.

²³Pamazuva iwayo mazano aipiwa naAhitoferi aifanana nomunhu ainge abvunza kuna Mwari. Ndizvo zvakanga zvakaita mazano aAhitoferi kuna Dhavhidhi naAbhusharomu.