Read Bhaibhiri Idzva rechiShona 2 Samueri 2 Bible Online

2 Samueri 2 - Bhaibhiri Idzva rechiShona bible

2 Samueri 2

¹Mushure maizvozvi Dhavhidhi akandobvunza kuna Tenzi kuti “Ndoenda here kune rimwe ramaguta aJudha?” Tenzi ndokumuti, “Enda zvako.” Dhavhidhi ndokuti, “Ndoenda kune ripi?” Tenzi akati, “kuHebhuroni.”

²Saizvozvo Dhavhidhi akakwidza kuendako pamwechetewo namadzimai ake maviri, vana Ahinoamu wokuJezireeri naAbhigairi chirikadzi iya yaNabhari wokuKarimeri.

³Dhavhidhi akaendako navanhu vake vaaiva navo munhu wose aine mhuri yake. Vakagara mumaguta okuHebhuroni.

⁴Varume vokwaJudha vakauyako vakagadza Dhavhidhi umambo hwokwaJudha. Pavakataurira Dhavhidhi kuti, “Varume vokuJabheshigireadhi ndivo vakaviga Sauro,”

⁵Dhavhidhi akatuma nhumwa kuvarume ava vokuJabheshigireadhi akati kwavari, “Tenzi ngaakukomborerei nokuti makaitira Sauro, changamire wenyu mwoyo wakanaka nokumuviga kwamakaita.

⁶Tenzi ngaachikuitirai mwoyochena avewo zvake akatendeseka. Iniwo ndichakuitirai zvakanaka pamusana pokuti makaita izvozvi.

⁷Saka zvino chishingai mwoyo, muve vanhu vane chivindi, changamire wenyu, Sauro zvaakafa uyewo vokwaJudha zvavakandigadza umambo hwokwawo kuti ndivatonge.”

⁸Izvozvo Abhuneru mwanakomana waNeru mutungamiriri wehondo yaSauro akanga atora Ishibhosheti mwanakomana waSauro akaenda naye kuMahanaimu.

⁹Akamuita mambo wokuGireadhi newevaAsheru nokuJezirieri nokwaEfuraimu nokwaBhenjamini neIsiraeri yose zvayo.

¹⁰Ishibhosheti mwanakomana waSauro akanga ava namakumi mana amakore paakatangisa kutonga Isiraeri. Akatonga kwamakore maviri. Asi vokwaJudha vainge vachitevera Dhavhidhi.

¹¹Dhavhidhi aiva mambo wokwaJudha kwamakore manomwe nemwedzi mitanhatu kuHebhuroni.

¹²Abhuneru mwanakomana waNeru namakurukuta aIshibhosheti mwanakomana waSauro vakabva kuMahanaimu vakaenda kuGibheoni.

¹³Joabhu mwanakomana waZeruya namakurukuta okwaDhavhidhi vakabuda vakandosangana navo kudziva rokuGibheoni. Vakagara pasi vakati vamwe kumhiri uku vamwe kumhiri uku padziva ipapo.

¹⁴Abhuneru akati kuna Joabhu, “Regai mamwe majaya edu amirisane ativaraidze.” Joabhu akati, “Ngavamirisane zvavo.”

¹⁵Ivo vakandomirisana vakati uku gumi navaviri vokwaBhenjamini naIshibhosheti mwanakomana waSauro; uku gumi navaviri vokumakurukota aDhavhidhi.

¹⁶Munhu oga oga akati dzvi musoro womumwe waakanga akamirisana naye, akati nebakatwa zwi parutivi pewaakanga akamirisana naye vachibva vati pamwechete pasi rikiti. Naizvozvo nzvimbo iyi yakatumidzwa zita rokuti “Guraramapakatwa.”[1] Iri kuGibheoni.

¹⁷Zuva irori kwakarwiwa hondo inotyisa. Abhuneru navarume vokwaIsiraeri vakakurirwa nevokumakurukota okwaDhavhidhi.

¹⁸Ipapo paiva navanakomana vaZeruya vatatu vaiti: Joabhu naAbhishai naAsaheri. Zvino Asaheri uyu aiva mhene chaiyo pakumhanya.

¹⁹Asaheri akadzingirirana naAbhuneru akaramba akati naye tande asina kwaaitsaukira, achitevera Abhuneru chete.

²⁰Abhuneru akacheuka ndokuti, “Ndiwe here Asaheri?” Iye akati, “Ndini.”

²¹Abhuneri akamuti, “Tsaukira zvako kurudyi kana kuruboshwe uwane rimwe jaya raungabate uripambe.” Asi Asaheri akaramba angoti tsvome tsvome naye chete.

²²Abhuneru ndokutizve kuna Asaheri, “Rega zvokundidzingira izvi. Unodirei kuti ndikupatitsire pasi? Ndingazotarisana sei nomukoma wako Joabhu?”

²³Asi Asaheri akaramba angoti naye naye chete. Naizvozvo Abhuneru akabva amuti neshure dhuvhu nomusisi zvokuti pfumo rakati bherevere ndokubuda nokumusana, achibva ati pasi mbonye mbonye, ndiye pakarepo fatata kufa. Vose vakanga vati unga unga paakawira vakamira vakati kanha kutarira.

²⁴Asi Joabhu naAbhishai vakaramba vachingodzingirirana naAbhuneru. Kuzoti zuva rodoka vakasvika kuchikomo cheAma chokunge tava kuda kusvika kuGia munzira yokurenje reGibheoni.

²⁵VokwaBhenjamini vakaunganidzana kuna Abhuneru vakaita chikwata chimwechete, vakandomira pamusoro pechikomo.

²⁶Abhuneru akadaidzira kuna Joabhu achiti, “Ko iro bakatwa rokuuraya vanhu risisakandwe pasi, ndohwava upenyu here? Hauzive here kuti magumo acho anorwadza kwazvo? Kusvikira rini chaizvo usati wati vanhu vokwako vadzoke varege kuronda hama dzavo?”

²⁷Joabhu akati, “NaMwari chaiye mupenyu, dai wanga usina kutaura saizvozvo chokwadi varume ava vaitosvikira mangwana mangwanani vachingoronda chete hama dzavo idzodzo.”

²⁸Nokudaro Joabhu akaridza hwamanda vanhu vose vakamira vakabva varega kuronda vokwaIsiraeri ndokubva varega kuramba vachirwa.

²⁹Abhuneru navanhu vake vakararirofamba usiku ihwohwo nomuArabha vakayambuka Jorodhani vakafamba mangwanani ose vakasvika kuMahanaimu.

³⁰Joabhu akadzoka mukuronda Abhuneru. Paakaunganidza vanhu vose pamwechete pakaonekwa kuti kuvanhu vokwaDhavhidhi, varume gumi navapfumbamwe pakanga pasina tisingaverengere Asaheri.

³¹Asi ivo vokumakurukota okwaDhavhidhi vakanga vauraya vanhu vokwaBhenjamini mazana matatu avarume ana varume makumi matanhatu evokwaAbhuneru.

³²Vakatora Asaheri vakamuviga muguva rababa vake kuBheterehemu. Joabhu navanhu vake vakararirofamba usiku hwose vakaedzerwa vava kuHebhuroni.