Read Bhaibhiri Idzva rechiShona 2 Samueri 20 Bible Online

2 Samueri 20 - Bhaibhiri Idzva rechiShona bible

2 Samueri 20

¹Zvakangoitikawo kuti paiva nomumwe matatapure womunhu ainzi Shebha mwanakomana waBhikiri wokwaBhenjamini. Akaridza hwamanda akati, “Isu muna Dhavhidhi, mugove hatina. Hatina nhaka mumwana waJese isu. VokwaIsiraeri we-e, munhu wese ngaazive nzira aende kwake.”

²Ipapo varume vose vokwaIsiraeri, zvokutevera Dhavhidhi vakabva vakanda pasi ndokubva votevera Shebha mwana waBhikiri. Asi varume vokwaJudha vakaramba vakati kwati kwati namambo wavo kubvira muna Jorodhani kusvikira kuJerusaremu.

³Dhavhidhi akasvika mumuzinda wake muJerusaremu. Mambo akatora varongo vaye gumi vaakanga asiyira kuchengeta musha. Akavaisa mune imwe imba mavaichengetedzwa achivariritira asi haana kumbozopinda mumba navo. Naizvozvo vakazogara vakapfigirwa upenyu hwavo hwose vachigara sechirikadzi.

⁴Mambo akazoti kuna Amasa, “Ndikokoredzere vanhu vokwaJudha vave pano mushure memazuva matatu iwe unge uri panowo.”

⁵Amasa akaenda kundokokorodza vokwaJudha. Asi akanonoka nguva yaakanga anzi auye.

⁶Dhavhidhi akati kuna Abhishai, “Zvino Shebha uyu mwana waBhikiri achatipinza nhamo kupfuura Abhusharomu. Chitora makurukota okwachangamire wako umuronde angadaro akapinda mumaguta etsvingo akazotinzvenga.”

⁷Varume vokwaJoabhu navaichengetedza mambo,[12] maKereti nemaPereti nemvumba dzose chaidzo dzokurwa hondo, vakaenda vakatungamirirwa naAbhishai. Vakabuda muJerusaremu vakandoronda Shebha mwanakomana waBhikiri.

⁸Pavakasvika kuzidombo guru rokuGibheoni, Amasa akasanganidzana navo. Izvozvo Joabhu akanga akapfeka hanzu dzake dzehondo, pamusoro padzo akasungira bhande muchiuno raiva nebakatwa muhara. Paakati achiti fambei bakatwa rakasvotokera pasi,

⁹Joabhu ndokuti kuna Amasa, “Ko, wakadiiko munun'una?” Joabhu akabva amuti ndebvu kweshu norudyi rwake kunge kuda kumutsvoda.

¹⁰Asi Amasa haana kucherechedza bakatwa raiva muroko rwaJoabhu. Joabhu akabva amuti naro dhuvhu mudumbu, ura hwake hukati pasi wodzvo asina kumubaya rwechipiri akabva afa. Joabhu nomunun'una wake Abhishai vakabva voronda Shebha mwana waBhikiri.

¹¹Mumwe murume wokwaJoabhu akamira pedyo nechitunha chaAmasa ndokusheedzera achiti, “Munhu wese anenge achida Joabhu neanenge ari wokwaDhavhidhi, ngaatevere Joabhu.”

¹²Izvozvo Amasa akanga achitoumburuka muropa pakati pomugwagwa mukuru. Ani naani aisvika nepo aiti akangomuona ombomira. Murume uya paakaona kuti munhu wese ari kumbomirapo akabvisa Amasa pamugwagwa apa akandomuisa musango akamufukidza neimwewo hanzu.

¹³Paakabvisa Amasa mumugwagwa vanhu vose vakanga vava kungopfuura vachienda naJoabhu kundoronda Shebha mwana waBhikiri.

¹⁴Shebha akafamba achidevanisa nemadzinza okwaIsiraeri ose kusvika kuAbheri nokuBhetimaaka nokuvaBheri vose vakaungana vakamutevera.

¹⁵Varwi vose vaiva naJoabhu vakauya vakamukomba muAbheri kuBhetimaaka. Vakaunganidza ivhu rikaita chinenge musana wenzou chakatsamirana norusvingo ndokubva vava kutigimura rusvingo kuti rukoromokere pasi.

¹⁶Mumwe mukadzi akanga akangwara akadaidzira ari mugutamo achiti, “Nditeerereiwo munzwe. Itii vaJoabhu vauye apo ndimbotaurawo navo.”

¹⁷Joabhu akaenda kwaari, iye ndokuti, “Ndimi vaJoabhu?” Joabhu akati, “Ndini.” Mukadzi akabva ati, “Chimbonzwai zvandavakutaura ini muranda wenyu.” Akati “Ndipire ndizwe.”

¹⁸Iye ndokuti, “Makarekare vakuru vaiti, ukangobvunza zano kuAbheri, nyaya yaibva yapera.

¹⁹Ini ndiri mumwe wavanhu vanoda rugare uye vakatendeka muIsiraeri. Asi imi muri kuda kuparadza guta rakaita saamai muIsiraeri. Chamadira kumedza nhaka yaTenzi chii?”

²⁰Joabhu akabva ati, “Handimbofa ndakaita zvakadaro. Zvokumedza izvo kana kuparadza kwandiri hazvimboitika izvo.

²¹Hazvisiri izvo. Chiripo chete ndechokuti kune mumwe murume anonzi Shebha mwana waBhikiri wokunyika yokwaEfuraimu yamakomo akapandukira mambo Dhavhidhi. Ingoturirai murume iyeyo mumaoko medu ndinobva ndatosiyana neguta rino.” Mukadzi uyu akati, “Chiregai zvenyu muone, muchakandirwa musoro wake napamusoro porusvingo.”

²²Nouchenjeri hwake ihwohu mukadzi uyu akaenda kuvanhu vose, vakazodimura Shebha mwana waBhikiri musoro vakaukanda kuna Joabhu. Joabhu ndokubva aridza hwamanda, vanhu vake vakabva vakotonoka paguta iri munhu wese akadzokera kumusha kwake. Joabhu akabva adzokera kuJerusaremu kuna mambo.

²³Joabhu ndiye aiva ari mukuru mukuru wehondo yose zvayo yeIsiraeri. Bhenaya mwanakomana waVaJehoyadha akanga ariye mutungamiri wevaichengetedza mambo, maKereti nemaPereti.

²⁴Adhoramu aiva mukuru mukuru wezvebasa rechibharo, Jehoshafati mwanakomana waAhirudhi ariye samunyori mukuru mukuru.

²⁵Shevha ndiye aiva munyori. Zadhoki naAbhiatari ndovaiva vapristi.

²⁶Ira wokuJairi aivawo mupristi waDhavhidhi.