Read Bhaibhiri Idzva rechiShona 2 Samueri 22 Bible Online

2 Samueri 22 - Bhaibhiri Idzva rechiShona bible

2 Samueri 22

¹Dhavhidhi akadetemba mazwi erwiyo urwu kuna Tenzi paakununurwa naTenzi mumaoko avavengi vake vose nomumaoko aSauro achiti:

²Tenzi ndiye bako rangu, ndiye nhare nomununuri wangu.

³Mwari wangu ndiye bako rangu, maari ndimo mandinopotera. Ndiye nhoo yangu, simba noruponeso rwangu. Ndiye shongwe yangu yakakwirira, muponesi wokundinunura mumadzudzo.

⁴Ndinodaidzira kuna iye anofanira kurumbidzwa, Tenzi; ndinobva ndatonunurwa ini kune vanondivenga.

⁵Nokuti masundesunde orufu akandikomberedza, mharadzi dzikati neni momoto semafashamo emvura.

⁶Tambo dzenzvimbo yavachakabvu dzakanditi koche koche, mariva orufu akandigaririra.

⁷Munhamo yangu iyi ndakachema kuna Tenzi. Ndakachema kuna iye Mwari wangu, muTemberi yake iye akanzwa izwi rangu, kuchema kwangu kukasvika munzeve dzake.

⁸Nyika yakadedera ikandengendeka, nheyo dzedenga dzikazunguzika dzikatetemera nokuti akanga ashatirwa.

⁹Akafemeruka utsi mumhuno dzake, rimi romoto rikavavaya, mukanwa make, mukabuda mazimbe anobvira moto.

¹⁰Akabvarura denga akaburuka, gore dema riri pasi petsoka dzake.

¹¹Akati pakerubhu karakata akabhururuka, akaonekwa achibhururuka mumhepo.

¹²Rima raive rakamutenderedza, akariita chokuhwanda nacho, makute edenga matematema chaiwo emvura aya.

¹³Pamusana pokupenya kwaiva mberi kwake, mazhenje omoto wemheni aivaima.

¹⁴Tenzi akadhiriridza mudenga umu, izwi raNyadenga rikariridza.

¹⁵Akakanda miseve vakati dzvamu kutiza, nayo mheni vakati ware kutiza.

¹⁶Makoronga omugungwa akaoneka, pagere nyika pakanyatsoti pachena yacha.

¹⁷Akandisveerera ruoko ari kumusoro akanditora, akandinyurura mumvura zhinji.

¹⁸Akandinunura kuvavengi vangu vane simba kuna vaindivenga, nokuti vaiva nesimba kupinda ini.

¹⁹Vakandivinga pazuva renhamo dzangu, asi Tenzi ndiye akava musimboti wangu.

²⁰Akandiburitsamo akanditi panhandare tendhe, akandinunura nokuti anondifarira.

²¹Tenzi akandipa mubayiro, maererano nokururama kwandinako, akandidzorera zvinofambiranawo, nokuchena kwandakaita maoko;

²²nokuti ndakarambira ndiri mumakwara aTenzi; handina kuita chakaipa chokusiyana naMwari,

²³nokuti chainditungamirira, zvirongwa zvake zvose, mirawo yake ndisingaifuratire.

²⁴Kwaari iye handina chinoshoreka. Ndakazvichengeta ndisina mhosva.

²⁵Ndokusaka andidzorerawo maererano nokururama kwandinako zvichifambiranawo nokuchena kwangu mukuona kwake.

²⁶Kune akatendeka, imi makatendeka, kune akarurama, imi makarurama.

²⁷Kune ane mwoyo wakanaka imi makanaka, asi kune ane muitiro wakakombama, imiwo munobva mavava.

²⁸Munonunura vanotambudzika, asi munotsvukisira meso vanozvikudza, kuti muvaorore.

²⁹Sezvo imi Tenzi murimi mwenje wangu, imi Mwari wangu ndimi munondivhenekera murima;

³⁰nokuti nemi ndinoparadza chikwata chavarwi, ndiina Mwari wangu, rusvingo ndinosvetuka.

³¹Mwari uyu, nzira dzake dzakarurama, zvinotaurwa naTenzi ndezvechokwadi, inhoo yevose vanopotera kwaari.

³²Ndiani Mwari, kunze kwaTenzi? Ndiani bako, kunze kwaMwari wedu?

³³Mwari iyeyu ndiye diziro rangu akaita kuti nzira yangu ive yakarurama.

³⁴Makumbo angu anoaita seengururu, kunyange pamangoringori ndinomira.

³⁵Anondidzidzisa kurwa hondo zvokuti kunyange uta hwendarira maoko angu anogona kutatamura.

³⁶Ruponiso rwenyu ndonhoo yamakandipa, nokuzvirereka kwenyu makaita kuti ndive mukuru mukuru.

³⁷Pokutsika netsoka dzangu, makandipa pakuru zvokuti tsoka dzangu kutsvedzemuka hadzina.

³⁸Ndakaronda vavengi vangu ndikavaparadza, kufuratira, ndakatozofuratira vapera kuti dhu.

³⁹Ndakavazhanya ndikavapwanya-pwanya zvokutadza kana kumuka, vakati rakata pasi petsoka dzangu.

⁴⁰Nokuti simba rokurwa hondo makandipa mukaita kuti vavengi vangu vandigwadamire.

⁴¹Vanondivenga makaita kuti vanditi ware kutiza vanondivenga ndikavaparadza.

⁴²Vakaparapatika kutsvaka vokuvanunura vakamushaya, kuna Tenzi kwanga kusinawo mhinduro.

⁴³Ndakavakuya-kuya vakaita sehuruva yevhu Ndikavatsika-tsika ndikavakanya-kanya sedhaka munzira

⁴⁴Makandinunura mumhirizhonga yevekwangu mukaita kuti ndirambe ndiri musoro wendudzi dzavanhu, vanhu vandakanga ndisingambozivi vakandishandira.

⁴⁵Vatorwa vaiuya kwandiri vachitodemba, vachiti vakangonzwa chete nezvangu vonditeerera.

⁴⁶Vatorwa vakarasa mwoyo, nokukurumidza vakauya vachidedera.

⁴⁷Tenzi mupenyu iye bako rangu, ngaarumbidzwe, ngaatunhidzwe Mwari wangu, ndiye bako rinondiponesa.

⁴⁸Mwari anonditsivira anondiisira ndudzi pasi pangu.

⁴⁹Makandipunyutsa kuvavengi vangu. Makandisumudzira pamusoro pevavengi vangu, mukandinunura kuvanhu vehondo.

⁵⁰Naizvozvo ndinokurumbidzai iyemi Tenzi mukati mendudzi dzisingakuzivei ndichaimba ndichirumbidza zita renyu.

⁵¹Anopa mambo wake kukunda kukuru kwazvo, anoitira mwoyochena muzodzwa wake Dhavhidhi nezvizvarwa zvokwake narini wose.