Read Bhaibhiri Idzva rechiShona 2 Samueri 23 Bible Online

2 Samueri 23 - Bhaibhiri Idzva rechiShona bible

2 Samueri 23

¹Aya ndiwo mazwi okupedzesera aDhavhidhi. Shoko raDhavhidhi mwana waJese shoko romurume akakwidziridzwa pamusoro muzodzwa waMwari waJakobho muimbi weIsiraeri wepamwoyo.

²Mweya waTenzi ari kutaura nomandiri shoko rake riri mumuromo mangu.

³Mwari weIsiraeri ataura iye Bako reIsiraeri anditi: “Kana munhu achitonga vanhu zvine ruenzaniso achitonga achitya Mwari,

⁴anoita sechiedza chemambakwedza sokupenya kunoita zuva, semangwanani asina kana kakore nechiedza chacho nemvura yokunaya ruswiswi runobva rwamera pasi.”

⁵Handiti ndiwo mamiriro akaita imba yangu naMwari here nokuti akaita neni chitenderano chinogara nokusingapere? Zvinhu zvose akatozvironga kare akatozvisimbisa. Angazorega here kuti ndibudirire achindiitirawo zvido zvangu?

⁶Asi vasina hanya naMwari vose vachakukurwa seminzwa, isingaitwi zvokubatwa namaoko.

⁷Asi kana munhu oibata anotozviita nesimbi kana nerwiriko rwepfumo. Pairi ipapo ndopainororomeserwa nomoto.

⁸Aya ndomazita emagamba aiva naDhavhidhi okurwa: kunoti Jashebhabhashebheti wokuTakemoni, pautatu hwavo ndiye aiva mukuru mukuru. Akarwisa mazana masere avarume akavauraya nepfumo rake muhondo imwechete.

⁹Aitevedzerwa naEreazari mwanakomana waDhodho mwanakomana waAhohi. Ndiye akanga aina Dhavhidhi pavaitafurira vaFirisitia vakanga vaunganidzanako kuzorwa hondo ndokubva varwi veIsiraeri vatiza.

¹⁰Iye akamira akauraya vaFirisitia kusvikira ruoko rwake rwaneta asisagone kurega bakatwa rake muchanza pamusana pechinyamunhari. Tenzi akaita basa guru kwazvo rokuti vakunde zuva iroro asi vakazodzokerazve kuzopamba zvinhu pazvitunha.

¹¹Aimutevera wacho ndiShama, mwanakomana waAgee wokuHarari. Pakanga vaFirisitia vaunganidzana pamwechete kuRehi paiva nomunda uzere nyemba, vamwe vaIsiraeri vakatiza vaFirisitia.

¹²Asi Shama akamira mukati momunda iwoyo achiudzivirira akauraya vaFirisitia. Tenzi akaita basa guru rokuti vakunde.

¹³Munguva yokukohwa, pavakuru vakuru makumi matatu, vamwe vavo vatatu vakasvika kuna Dhavhidhi kubako reAdhuramu izvozvo chimwe chikwata chavarwi vechiFirisitia chakanga chadzika matendhe mubani rokuvaRefaimu.

¹⁴Izvozvo Dhavhidhi akanga achiri munhare yakavakirirwa chimwe chikwata chavarwi vechiFirisitia chakanga chiri kuBheterehemu.

¹⁵Dhavhidhi akanzwa nenyota akati, “Dai pangowana mumwe anondonditekera mvura yokunwa kutsime rokuBheterehemu riri pedyo nesuo guru raro.”

¹⁶Magamba okurwa aye ari matatu akatyoredzera nomumatendhe avaFirisitia imomo akandoteka mvura kutsime rekuBheterehemu riri pedyo nesuo guru racho. Vakaichera vakauya nayo kuna Dhavhidhi. Asi akaramba kuinwa, akaiteurira pasi kuna Tenzi

¹⁷achiti, “Tenzi we-e handifanire kumbofa ndakaita chinhu chakadai iropaka iri ravanhu vaendako vachitopinza upenyu hwavo munjodzi.” Naizvozvo kuinwa akaramba. Izvozvi izvi ndizvo zvinhu zvakaitwa nemagamba matatu aya.

¹⁸Abhishai munun'una waJoabhu mwanakomana waZeruya ndiye aiva mukuru mukuru wavo vari makumi matatu.[13] Akarwisa varume mazana matatu nepfumo rake akavauraya akazviwanira mbiri yakada kuita seyevatatu vaye.

¹⁹Ndiye aiva nomukurumbira kwazvo pamakumi matatu avo ndokubva ava mukuru mukuru wavo. Asi pavatatu vaya, haana kupasvika.

²⁰Bhenaya mwanakomana waJehoyadha wokuKabhuzeri ndiyewo aiva rimwe gamba rokurwa, nyakuita mabasa makuru kwazvo. Akauraya shumba chaidzo dzavanhu vaviri vokuMoabhu. Akapindawo mugomba akauraya shumba musi wakanga wadonha chando.

²¹Akaurayawo mumwe muIjipiti, murume chaiye akasvika. MuIjipiti uyu akanga akabata pfumo muruoko, asi Bhenaya akamuvinga netsvimbo. Akatorera muIjipiti pfumo ndokubva amuuraya nepfumo rake iroro.

²²Izvozvi izvi ndizvo zvakaitwa naBhenaya mwana waJehoyadha akazviwanira mbiri yakada kuita seyemagamba matatu aya.

²³Iyeyu uyu aivawo nomukurumbira pamwechete navaya vaya makumi matatu. Asi pavatatu vaya, haana kupasvika Dhavhidhi akamuita mukuru mukuru wevokumuchengetedza iye mambo.

²⁴Asaheri munun'una waJoabhu aivawo mumwe wamakumi matatu iwaya uye Erihanani mwanakomana waDhodho wokuBheterehemu:

²⁵kwouya Shama wokuHarodhi naErika wokuHarodhi

²⁶naHerezi wokuPariti naIra mwanakomana waIkeshi wokuTekoa

²⁷kwouyawo Abhiezeru wokuAnatoti naMebhunai wokuHusha

²⁸naZarimoni muAhohi uye Maharai wokuNetofa

²⁹uyewo Herebhu mwanakoma waBhaana wokuNetofa naItai mwanakomana waRibhai wokuGibhea kwaBhenjamini

³⁰kwoti Bhenaya wokuPireatoni naHidhai wokumakoronga okuGaashi

³¹naAbhiaribhoni wokuAribha naAzimavheti wokuBhahurimu,

³²kwotiwo Eriyahibha wokuShaaribhoni kwouya vanakomana vaJasheni naJonatani

³³mwanakomana waShama wokuHarari naAhihamu mwanakomana waSharari wokwakare kuHarari,

³⁴kuchizoti Erifereti mwanakomana waAhashibhai wokuMaaka naEriamu mwanakomana waAhitoferi wokuGiro

³⁵naHeziro wokuKarimeri naPaarai wokuAribhu,

³⁶kuchitiwo Igari mwanakomana waNatani wokuZobha naBhani wokwaGadhi

³⁷naZereki muAmoni naNaharai wokuBheeroti ndiye aiva wokutakurira Joabhu mwanakomana wavaZeruya zvombo zvehondo

³⁸kwozoti Ira wokuItira naKarebhu wokwakareko kuItira

³⁹naUriya muHiti. Vose pamwechete vaiva vanhu makumi matatu navanomwe.