Read Bhaibhiri Idzva rechiShona 2 Samueri 24 Bible Online

2 Samueri 24 - Bhaibhiri Idzva rechiShona bible

2 Samueri 24

¹Tenzi akashatirirwa Isiraeri zvakare akaisa muna Dhavhidhi mumwewo mweya wokuti zvivaipire achiti, “Enda uverenge vokwaIsiraeri novokwaJudha.”

²Mambo akataurira Joabhu navatungamiriri wehondo yake, waaiva naye achiti, “Chienda ubvongodze nomumadzinza okwaIsiraeri neokwaJudha kubvira kwaDhani kusvikira kuBheerishebha uchiverenga vanhu ndigoziva kuti kune vanhu vangani.”

³Asi Joabhu akapindura mambo achiti, “Hongu zvazvo dai Tenzi, Mwari wenyu akawedzera vanhu kazana kakazanirana kupfuura zvavari kuri zvino mugotozvionawo nameso enyu imi mambo changamire. Asi nhai mambo changamire, ko, madireiko kuita chinhu chakadai?”

⁴Zvakataurwa namambo ndizvo zvakatozobudirira pane zvaJoabhu nezvavatungamiriri vehondo. Ipapo Joabhu navatungamiriri vehondo vakabva pana mambo voenda kundoverenga varwi veIsiraeri.

⁵Vakayambuka Jorodhani vakadzika matendhe avo kuguta reAroero kubvira kuguta riri mukati mebani vakananga kwaGadhi nokuJazeri.

⁶Vakazosvika kuGireadhi nokunyika yavaHiti kuHodhishi, vakasvikawo kwaDhanijaani. Vakabva muDhanijaani vakapota nokuSidhoni.

⁷Vakazosvika kuguta retsvingo reTire nokumaguta ose avaHivhi navaKanani. Vakabvamo vakaenda kuNegevhu kwaJudha kuBheerishebha.

⁸Kuzoti vabvongodza nyika iyi yose vakadzokera zvavo Jerusaremu, izvozvo kwapera mwedzi mipfumbamwe namazuva makumi maviri.

⁹Joabhu akataurira mambo uwandi hwavanhu hwakadai izvi: KwaIsiraeri kwaiva nezviuru mazana masere zvavarume vano chaivo vokurwa namapakatwa. Varume vokwaJudha vaivawo mazana mashanu ezviuru.

¹⁰Asi Dhavhidhi apedza kuverenga vanhu kudaro hana yakamutambudza ndokubva ati kuna Tenzi, “Ndakatadza zvikuru kwazvo nezvandakaita. Zvino ndateterera Tenzi we-e. Ndiregerereiwo chitadzo changu ini muranda wenyu nokuti zvandakaita izvi ndezvoupenzi chaizvo.”

¹¹Kuzoti Dhavhidhi amuka mangwanani acho, izwi raTenzi rakauya kumuporofita Gadhi, muoni wokwaDhavhidhi rikati,

¹²“Enda uti kuna Dhavhidhi, zvanzi naTenzi sarudza chandingaite kwauri pazvitatu izvi zvandiri kukupa.”

¹³Nokudaro Gadhi akaenda kuna Dhavhidhi akamuti, “Mungade here kuti muno munyika yenyu muve namakore manomwe enzara, kana kuti mupedze mwedzi mitatu muchingotiza vavengi venyu vachikurondai, kana kuti muno munyika yenyu murohwe nedenda kwamazuva matatu? Zvino dai mukapafunga mundipewo mhinduro yokundopa andituma.”

¹⁴Dhavhidhi akati kuna vaGadhi, “Inga ndazotambura zvino. Regai zvenyu ndisve ndarangwa zvangu naTenzi nokuti ngoni dzake dzakanyanya kwazvo. Asi zvokuti munhu ave iye wokundiranga, aiwa.”

¹⁵Saizvozvo Tenzi akarova Isiraeri nedenda kubvira mangwanani kusvikira panguva yakanga yarehwa, kukafa vaIsiraeri zviuru makumi manomwe kubvira kwaDhani kudzamara kundosvika kuBheerishebha.

¹⁶Mutumwa waMwari paakanga zvino oda kuti achiparadza Jerusaremu, Tenzi akanyevenuka mwoyo akarega kuwana chakaipa chaakazoita. Akati kumutumwa akanga achiita basa rokuparadza vanhu, “Zvakwana, chirega.” Izvozvo mutumwa waTenzi akanga ava paburiro ravaArauna vechiJebhusi.

¹⁷Dhavhidhi paakaona mutumwa uyu akanga achirakatisa vanhu akanamata kuna Tenzi achiti, “Inga ndakatadza ndakaita zvakaipa. Ko hwai idzi dzakapareiwo? Ndateterera dai maranga zvenyu ini nevemba yokwababa vangu.”

¹⁸Gadhi akasvika kuna Dhavhidhi musi wakarewo akati kwaari, “Kwirai kuruware rwavaArauna vechiJebhusi muvakire Tenzi atari ipapo.”

¹⁹Nokudaro Dhavhidhi akaendako sokutaura kwakanga kwaitwa naGadhi sezvakanga zvanzi naTenzi zviitwe.

²⁰Arauna akati tarisei akaona mambo namakurukota ake vachidimura kuuya kwaari. Arauna akabuda akakotamira mambo akatyora uso.

²¹Arauna akati, “Mambo changamire mavingeiko kwandiri ini muranda wenyu?” Dhavhidhi akati, “Kuzotenga ruware rwako ndivakepo atari yaTenzi kuti denda rimiswe kuvanhu.”

²²Arauna akati kuna Dhavhidhi, “Mambo changamire torai zvenyu mupire kuna Mwari zvamunoda, nzombe ndidzodzi idzi, dzomupiro wokupisa, majoki emombe nezvirhei ndizvozvi izvi ndozvehuni.

²³Mambo, ini Arauna, zvose izvozvi ndozvandapa kwamuri mambo.” Arauna akati kuna mambo, “Tenzi, Mwari wenyu ngaakugamuchirei.”

²⁴Asi mambo akati kuna vaArauna, “Bodo, nokuti zvokutenga ndinofanira kutenga chete nemari kwauri. Handifanire kupira mupiro zvepachena kuna Tenzi, Mwari wenyu.” Nokudaro akatenga ruware rwacho nenzombe namakumi mashanu emari yesirivha yemashekere.

²⁵Dhavhidhi akavakira Tenzi atari ipapo akapira mipiro yokupisa nemipiro yokuwadzana. Naizvozvo Tenzi akagamuchira minamato yakaitirwa nyika, denda rikabva ramiswa muIsiraeri.