Read Bhaibhiri Idzva rechiShona 2 Samueri 3 Bible Online

2 Samueri 3 - Bhaibhiri Idzva rechiShona bible

2 Samueri 3

¹Kwakaitika hondo kwenguva ndefu kwazvo pakati pemhuri yokwaSauro neyokwaDhavhidhi. Dhavhidhi akaramba achisimbarara, uku vemhuri yokwaSauro vakaramba vachiderera.

²Dhavhidhi wakabereka vana vakomana kuHebhuroni. Dangwe rake ndiAmoni waakaberekerwa naAhinoamu wokuJezireeri.

³Wechipiri ndiKireabhu waakaberekerwa naAbhigairi, chirikadzi yaNabhari wokuKarimeri. Wechitatu ndiAbhusharomu waakaberekerwa naMaaka, mukunda waTarimai, mambo weGeshuri.

⁴Wechina ndiAdhoniya waakaberekerwa naHagiti. Wechishanu ndiShefatiya waakaberekerwa naAbhitari.

⁵Wechitanhatu ndiItireamu wokuEgira mudzimai waDhavhidhi Ivava ndovana vaDhavhidhi vakomana vakaberekerwa muHebhuroni.

⁶Hondo payaingunotsviriridza kudaro pakati pemhuri yokwaSauro nemhuri yokwaDhavhidhi, Abhuneru akanga achitoita kuti ukuru hwake hudzike midzi mumhuri yokwaSauro.

⁷Zvino Sauro aiva nomurongo wake ainzi Rizipa mwanasikana waAiya. Ishibhosheti akabvunza Abhuneru kuti, “Wapindwa nei kubva wapinda mumba nomurongo wababa vangu?”

⁸Abhuneru akashatiriswa kwazvo nezvakataurwa naIshibhosheti izvi akati, “Heya unoti ndiri mbwaka ini, yokwaJudha? Iye nhasi uno ndiri munhu ano mwoyochena kumhuri yokwaSauro, baba vako nokuvakoma navanun'una vavo, neshamwari dzavo. Handina kukuisa mumaoko aDhavhidhi. Asi zvino wava kundipa mhosvaka iwe yezvomukadziwo zvake.

⁹Mwari ngaandione, asve andiomesera kwazvo iyeni Abhuneru kana ndikarega kuchiitira Dhavhidhi zvaakamutsidzira,

¹⁰zvokubvisa umambo mumba yokwaSauro agoita kuti umambo hwaDhavhidhi hudzike midzi muIsiraeri nokwaJudha, kubvira kwaDhani kusvikira kuBheerishebha.”

¹¹Ishibhosheti haana kana kuzokwanisa kumupindura chinhu nokuti akanga ava kumutya.

¹²Abhuneru akatumira nhume kuna Dhavhidhi kuHebhuroni kundoti, “Muridzi wenyika ino ndiani? Imi neni ngatiitei chibvumirano. Zviripo ndezvizvi ini ndichakubatsirai kuunganidza Isiraeri yose kwamuri.”

¹³Akati, “Zvakanaka, ngatiitei zvedu chibvumirano. Asi chinhu chimwechete chandinokumbira kwauri ndechichi chokuti: handidi kuonana newe kusatoti wauya naMikari, mukunda waSauro paunouya kuzondiona.”

¹⁴Dhavhidhi akabva atumirawo nhume kuna Ishibhosheti mwanakomana waSauro kundoti, “Ndipe kuno mukadzi wangu, Mikari wandakaroora nezana rezvikanda zvapamberi zvavaFirisitia.”

¹⁵Ishibhosheti akatumirawo nhume akamutora kumurume wake Paritieri mwana wavaRaishi.

¹⁶Asi murume wake akaendawo naye achimutevera achichema nzira yose kusvikira kuBhahurimu. Abhuneru akazomuti, “Chienda, chidzokera.” Iye ndokudzokera.

¹⁷Abhuneru akataurirana navakuru vakuru vokwaIsiraeri kuti, “Kwenguva yapera iyi manga muchingunotsvaka kuti Dhavhidhi ave mambo wenyu.

¹⁸Zvino dai machiita zvenyu kudaro nokuti Tenzi akatotsidzira Dhavhidhi kuti, ‘Ndichashandisa muranda wangu, Dhavhidhi kununura vanhu vangu vaIsiraeri mumaoko avaFirisitia nomumaoko avavengi vavo vose.’ ”

¹⁹Abhuneru akataurawo nevokwaBhenjamini akandosvitsawo munzeve dzaDhavhidhi kuHebhuroni, zvinhu zvose zvakanga zvakanaka mukuona kwevokwaIsiraeri nomukuonawo kwavose vedzinza rokwaBhenjamini.

²⁰Abhuneru akasvika kuna Dhavhidhi kuHebhuroni aina makumi maviri avarume. Dhavhidhi akaitira Abhuneru navarume vaaiva navo mabiko.

²¹Abhuneru akati kuna Dhavhidhi, “Chiregai ndisimuke ndiende zvangu ndindounganidza Isiraeri yose pasi penyu mambo, changamire kuti vaite chibvumirano nemi uyewo kuti mugotonga nyika yose imi muchifadzwawo nazvo.” Naizvozvo Dhavhidhi akati Abhuneru aende zvake, Abhuneru ndokuenda zvake zvakanaka.

²²Pakarepo makurukota okwaDhavhidhi akabva ati tutururu vhe vaina Joabhu vachibva kundopamba vakagukuchira zvinhu zvakawanda kwazvo zvavakanga vapamba. Asi Abhuneru akanga atobva kare pana Dhavhidhi kuHebhuroni nokuti akanga ati aende zvake iyewo ndokuendawo zvake zvakanaka.

²³Pakasvika Joabhu nehondo yose yaaiva nayo, vanhu vakataurira Joabhu kuti, “Abhuneru mwanakomana waNeru auya kuna mambo, ivo vatomurega zvavo akaenda, akatoendawo zvake zvakanaka.”

²⁴Joabhu akabva aenda kuna mambo akati, “Ko ndochii ichochi chamaita? Abhuneru kutouya zvake kwamuri kuno, sei imi mamurega achienda? Kuendaka kwaatoita ikoku.

²⁵Zivai kuti Abhuneru mwana waNeru chaichoicho chaanga avinga kuno kuzokunyengedzai nokuongorora mafambiro enyu nokuzivurura zvose zvamuri kuita.”

²⁶Joabhu paakangoti ibvei pana Dhavhidhi, akatuma nhume kutevera Abhuneru. Dzakadzoka naye kubva kutsime repaSira. Asi Dhavhidhi haana kuzviziva.

²⁷Pakadzoka Abhuneru kuHebhuroni, Joabhu akamutora akaenda naye parutivi munhandare yesuo guru reguta kuti ambotaurirana zvake kazevezeve naye. Ipapo ndopaakamubhovhora mudumbu akabva afa kuri kutsividza ropa romunun'una wake Asaheri raakadeura.

²⁸Kuzoti Dhavhidhi paakazvinzwa akati, “Ini nevokwangu tichagara nariini wose tisina mhosva pana Tenzi yokudeura ropa raAbhuneru mwanakomana waNeru.

²⁹Ngaipfukire iye Joabhu navose vemba yokwababa vake. Mumhuri yokwaJoabhu ngamurege kushayikwa vanhu vanotambura neizvi zvinoti: chirwere chezvinobuda mumuviri, namaperembudzi navanotoda mudonzvo kuti vafambe navanoita zvokuurayiwa nebakatwa kana vanofa nenzara!”

³⁰Ndozvakaita Joabhu nomunun'una wake Abhishai, vakauraya Abhuneru nokuti Abhuneru akanga auraya munun'una wavo Asaheri muhondo kuGibheoni.

³¹Dhavhidhi akati kuna Joabhu nokuvanhu vose vaiva naye, “Bvarurai hanzu dzenyu mupfeke masaga mucheme Abhuneru.” Mambo Dhavhidhi pachavo vakatevera banda raiva nechitunha.

³²Vakaviga Abhuneru kuHebhuroni. Mambo vakaridza mhere vakahwihwidza kuchema vari paguva raAbhuneru, vanhu vose vakahwihwidzawo kuchema.

³³Dhavhidhi akaimba rwiyo rwengondo kuchema Abhuneru achiti: “Abhuneri kufa here chokwadi serema kudai.

³⁴Haunaka iwe kumbosungwa maoko; makumbo ako ngetani hadzizivi. Mufiro wako ndowa avo chete, vanofa mumaoko avakaipa.” Vanhu vose vakahwihwidza kumuchema.

³⁵Vanhu vose vakauya kuzonyengetedza Dhavhidhi kuti awane chaangadye zuva risati radoka. Asi Dhavhidhi akatsidza kuti, “Mwari ngaandione asve andiomesera kwazvo kana ndikaruma chingwa mukanwa mangu kana chimwewo zvacho zuva risati radoka!”

³⁶Vanhu vakazviona zvikavafadza. Zvose zvakaitwa namambo zvakafadza vanhu vose.

³⁷Naizvozvo vanhu vose nevokwaIsiraeri vose vakazviziva zuva iroro kuti chakanga chisiri chido chamambo chokuti Abhuneru mwanakomana waNeru aurayiwe.

³⁸Mambo akati kumakurukota ake, “Hamuzive here kuti nhasi uno muIsiraeri tashayikirwa nachangamire chaivo, gamba chairo?

³⁹Kunyange zvazvo ndakagadzwa umambo, zvanhasi uno izvi ini zvandipedza simba ini. Zvavana Zeruya ava zvandiomera. Tenzi ngaarange munhu wakaipa zvakakodzerana nouipi hwake.”