Read Bhaibhiri Idzva rechiShona 2 Samueri 8 Bible Online

2 Samueri 8 - Bhaibhiri Idzva rechiShona bible

2 Samueri 8

¹Gare gare Dhavhidhi akakurira vaFirisitia akavaisa pasi pake, akatorera vaFirisitia Metehagama.

²Akakurirawo Moabhu akati vanhu vacho vati rare rare pasi. Akatora tambo akavaera katatu katatu nourefu hwayo vakangodaro achiuraya vomuchikamu chokutanga nechechipiri, vomuchikamu chechitatu akavarega vari vapenyu. VaMoabhu vakava varanda kuna Dhavhidhi vakatera mutero kwaari.

³Dhavhidhi akakurirawo Hadhadhiezeri, mwanakomana waRehobhu mambo wokuZobha paakanga achienda kundorwisa nyika yokuna Yufuratesi kuti idzokere mumaoko ake.

⁴Dhavhidhi akamutorera vachayiri vengoro dzehondo, chiuru chimwechete chavachayiri navachayiri mazana manomwe pamwechete navarwi vetsoka makumi maviri echuru. Dhavhidhi akadimura matatira amabhiza ose engoro dzehondo ndokungosiya anokwanirana nezana rengoro dzehondo.

⁵VaSiria vokuDhamasikusi vakauya kuzobatsira Hadhadhiezeri mambo wokuZobha. Dhavhidhi akauraya varume makumi maviri ezviuru nezviuru zviviri zvavaSiria.

⁶Munyika yeAramu kuDhamasikusi, Dhavhidhi akaisa zvikwata zvikwata zvavarwi, vaSiria vakava varanda kuna Dhavhidhi vachitotera mutero. Tenzi akaita kuti Dhavhidhi akurire kwose kwose kwaaienda.

⁷Dhavhidhi akatora nhoo dzendarama dzakanga dzakatakurwa namakurukota aHadhadhiezeru akadziunza kuJerusaremu.

⁸Mambo Dhavhidhi akakukuchawo ndarira yakawanda kwazvo kuBheta nokuBherotai maguta aHadhadhiezeru.

⁹Mambo Toi paakanzwa kuti Dhavhidhi akakurira hondo yose yaHadhadhiezeru,

¹⁰Toi akatuma mwanakomana wake Joramu kuna Mambo Dhavhidhi kundomukwazisa nokumukorokotedza nokuti akanga arwisa Hadhadhiezeru akamukurira. Chaivapo ndechokuti Hadhadhiezeru aigarorwisana naToi. Joramu uyu akauya nezvinhu zvesirivha nendarama nendarira.

¹¹Mambo Dhavhidhi akatsaurirawo zvinhu izvozvi kupira kuna Tenzi pamwechete nesirivha nendarama yaakatsaurira kupira kuna Mwari yabva kunyika dzose dzaakakurira

¹²dzinoti: Edhomu neMoabhu nevaAmoni nevaFirisitia neAmareki neyepazvinhu zvakapambwa zvaHadhadhiezeru mwanakomana waRehobhu mambo wokuZobha.

¹³Dhavhidhi akazviwanira zita paakadzoka kwaakanga andorakatisa gumi rezviuru rine zviuru zvisere zvavaSiria[7] mubani romunyu.

¹⁴MuEdhomu akaisamo zvikwata zvikwata zvavarwi. Munyika yose zvayo yeEdhomu akaisa zvikwata zvavarwi. VaEdhomu vose zvavo vakava varanda kuna Dhavhidhi. Tenzi akaita kuti Dhavhidhi akurire kwose kwose kwaaienda.

¹⁵Nokudaro Dhavhidhi akatonga Isiraeri yose zvayo. Dhavhidhi uyu aitonga vanhu vake zvine ruenzaniso uye nomazvo chaimo.

¹⁶Izvozvo Joabhu mwanakomana waZeruya ainge ari mutungamiriri wehondo, Jehoshafati mwanakomana waAhirudhu ariye samunyori.

¹⁷Zadhoki mwanakomana waAhitubhu naAhimereki mwanakomana waAbhiyatari ndovaiva vapristi, Seraya ari munyori.

¹⁸Bhenaya mwanakomana waJehoiadha aiva mukuru mukuru wevokuchengeta mambo, maKereti nemaPereti, ukuwo vana vaDhavhidhi vakomana vari vapristi.