Read Bhaibhiri Idzva rechiShona 1 Madzimambo 1 Bible Online

1 Madzimambo 1 - Bhaibhiri Idzva rechiShona bible

1 Madzimambo 1

¹Mambo Dhavhidhi paakanga achembera, makore ake aendedzana, kunyange zvazvo vaimufukidza namagumbeze, akanga asisanzwe kudziya.

²Nokudaro makurukota ake akati kwaari, “Mambo changamire, dai patsvakwa musikana, mhandara, ive yokushandira mambo nokumuchengeta, avate pedyo nechifuva chenyu kuti munzwe kudziya, mambo changamire.”

³Saizvozvo vakabva vatsvaka musikana, mhandara, ino, yakanaka munyika yose yeIsiraeri. Vakawana Abhishagi wokuShunamu, vakauya naye kuna mambo.

⁴Mhandara iyoyi yakanga yakanaka kwazvo. Ndiye akabva ava wokuchengeta mambo nokumushandira. Asi mambo haana kuzivana naye.

⁵Adhoniya mwanakomana womukadzi ainzi Hagiti akazvikudza achiti ndinoda kuva mambo, akazvigadzirira ngoro dzehondo navachayiri navanhu makumi mashanu vokumhanya vari mberi kwake.

⁶Baba vake havana kumbenge vambomutsiudza zvavo vachiti, “Unoitirei zvauri kuita izvi?” Iyeyu akanga akanakawo kwazvo chimiro uye ndiye aitevedzera Abhusharomu.

⁷Akataurirana naJoabhu mwanakomana waZeruya nomupristi Abhiyatari. Vakabvuma kubatsirana naAdhoniya.

⁸Asi mupristi Zadhoki naBhenaya mwanakomana waJehoyadha nomuporofita Natani naShimei naRei nemagamba ehondo aiva naDhavhidhi haana kuwirirana naAdhoniya.

⁹Adhoniya akapira zvibayiro zvehwai nemombe namagondora akakodzwa ari kuDombo reNyoka pedyo nokuEnirogeri. Akakokako vakomana navanun'una vake vose, vanakomana vamambo nevokwaJudha vose vaiva makurukota amambo.

¹⁰Asi haana kukoka muporofita Natani kana Bhenaya kunyange magamba aye omuhondo kana Soromoni.

¹¹Natani vakabvunza Bhatishebha amai vaSoromoni kuti, “Hamuna kunzwa here kuti Adhoniya mwana waHagiti atova mambo asi changamire wedu Dhavhidhi havasi kumbozviziva.

¹²Saka zvino chiregai ndikupei zano muzviponese upenyu imi nomwana wenyu Soromoni.

¹³Ibvai maenda kuna mambo Dhavhidhi mumuti, mambo changamire, hamuna here kunditsidzira ini muranda wenyu kuti Soromoni mwana wako ndiye achatonga mushure mangu, achizogara pachigaro changu choumambo? Ko zvauya sei kuti Adhoniya ava kutonga?

¹⁴Paunenge uchitaura namambo kudaro ndipo pandinobva ndatevera mushure ndozotsinhira mazwi ako.”

¹⁵Saka Bhatishebha akaenda kuna mambo mumba make. Izvozvo mambo akanga ava Harahwa chaiyo, Abhishagi muShunami ndiye aichengeta mambo ivava.

¹⁶Bhatishebha akati pasi gwadagwa kuremekedza mambo, mambo akati, “Tipirei tinzwe nhuna dzenyu.”

¹⁷Akati kwaari, “Changamire imi makatsidza kwandiri ini muranda wenyu naTenzi, Mwari wenyu muchiti Soromoni mwanakomana wako ndiye achatonga mushure mangu achizogara pachigaro changu choumambo.

¹⁸Asi zvino chitarisai muone Adhoniya atova mambo kunyange zvazvo imi mambo changamire musiri kuzviziva.

¹⁹Atopira zvibayiro zvemombe nezvigondora zvakakodzwa nezvehwai zvakawanda kwazvo. Akagokokawo vanakomana vose vamambo nomupristi Abhiyatari naJoabhu mutungamiriri wehondo. Asi Soromoni muranda wenyu haana kumukoka.

²⁰Zvino mambo changamire meso eIsiraeri yose akatotarisa kwamuri kuvaudza kuti ndiani achagara pachigaro chenyu choumambo mushure menyu mambo changamire.

²¹Dzimwe nguva kana imi mambo changamire mukazenge mavata maendawo kwakaenda vamwe madzitateguru enyu ini nemwana wangu Soromoni tichaonekwa savanhu vakapara mhosva.”

²²Pavaingunotaura namambo kudaro muporofita Natani ndiyewo vhu ipapo.

²³Vakazivisa mambo kuti, “Muporofita Natani ava pano.” Paakapinda maiva namambo akati pasi gwadagwa, akatyora uso pana mambo.

²⁴Natani akati, “Mambo changamire ndimi here imi mati Adhoniya atonge mushure menyu uye agare pachigaro chenyu choumambo?

²⁵Ndiri kudaro nokuti iye nhasi uno adzika uko akapira zvibayiro zvemombe nezvigondora zvakakodzwa nehwai zvizhinji kwazvo. Akoka vanakomana venyu mambo naJoabhu mukuru wehondo nomupristi Abhiyatari, kurizvino vari kutodya vachinwa naye vachitomuti, ‘Zvigare zvakadaro, mambo Adhoniya!’

²⁶Asi ini muranda wenyu nomupristi Zadhoki naBhenaya mwana wavaJehoyadha nomuranda wenyu Soromoni haana kutikoka.

²⁷Izvi ndimi here, makaronga mambo changamire musina kutinyeverawo isu varanda venyu kuti ndiani achagara pachigaro chenyu choumambo mushure menyu, mambo changamire?”

²⁸Mambo Dhavhidhi akapindura achiti, “Ndidaidzirei Bhatishebha.” Akapindamo makanga muna mambo akasvikomira pana mambo.

²⁹Mambo akatsidza nemhiko achiti, “NaTenzi mupenyu akandinunura munhamo dzangu dzose

³⁰sokupika chaiko kwandakamboita kwamuri naTenzi, Mwari weIsiraeri ndichiti, ‘Soromoni mwana wako ndiye achatotonga chete mushure mangu iye ndiye achagara pachigaro changu choumambo panzvimbo pangu, izvozvo ndozvandiri kutoita iye nhasi uno.’ ”

³¹Bhatishebha akakotamira mambo uso hwakatarisa pasi achimuremekedza akati, “Changamire mambo Dhavhidhi raramai nokusingaperi!”

³²Mambo Dhavhidhi akati, “Ndidaidzirei mupristi Zadhoki nomuporofita Natani naBhenaya mwana waJehoyadha.” Vakasvika pana mambo.

³³Mambo akavati, “Endai namakurukota angu ini changamire muti Soromoni mwanakomana wangu atasve nyurisi rangu ini mudzike naye kuGihoni,

³⁴ikoko regai mupristi Zadhoki nomuporofita Natani vamugadze umambo hweIsiraeri varidze hwamanda vachidaidzira vachiti, ‘Zvigare zvakadaro mambo Soromoni!’

³⁵Munozomutungamidza mouya naye kuno asvikogara pachigaro changu choumambo nokuti ndiye achava mambo panzvimbo pangu. Ndatomusarudza kuti ave mutongi weIsiraeri naJudha.”

³⁶Bhenaya mwanakomana waJehoyadha akapindura mambo achiti, “Ndizvozvo chaizvo! Dai Tenzi, Mwari wenyu mambo changamire adarowo.

³⁷Dai Tenzi sokuva nemi mambo changamire kwaanga achiita avavo naSoromoni saizvozvo aite kuti umambo hwake hukurekure kupinda hwenyu changamire mambo Dhavhidhi.”

³⁸Saizvozvo mupristi Zadhoki nomuporofita Natani naBhenaya mwana waJehoyadha nowokuchengetedza mambo, Kereti naPereti vakadzika vakakwidza Soromoni panyurusi ramambo Dhavhidhi vakaenda naye kuGihoni.

³⁹Mupristi Zadhoki akatora chinu chamafuta mutendhe akazodza Soromoni. Vakaridza hwamanda, vanhu vose vakadaidzira vachiti, “Zvirambe zvakadaro mambo Soromoni!”

⁴⁰Vanhu vose vakakwidza vachimutevera, nyere dzichirira kuchipemberwa kufara zvikuru kwazvo zvokutotsemura pasi.

⁴¹Adhoniya navose vakakokwa vaaiva navo vakazvinzwa vachingunopedzesa mabiko avo. Joabhu paakanzwa kurira kwehwamanda akabvunza kuti, “Ko mheremhere iyi iri muguta umu ndeyei?”

⁴²Achiri kutaura kudaro Jonatani mwana womupristi Abhiyatari ndiye vhu ipapo. Adhoniya akati, “Pinda zvako nokuti uri munhu anovimbika unofanira chete kunge uchitotiigira shoko rakanaka.”

⁴³Jonatani akapindura Adhoniya kuti, “Zviri kupiko nhaimi. Zvaitika uku, changamire mambo Dhavhidhi vatogadza Soromoni umambo.

⁴⁴Mambo vamutuma nomupristi Zadhoki nomuporofita Natani naBhenaya mwanakomana waJehoyadha pamwechete newokuchengetedza mambo Kereti naPereti vandomukwidza panyurusi ramambo.

⁴⁵Mupristi Zadhoki nomuporofita Natani vatomugadza umambo kuGihoni. Vabva ikoko vachipembera kufara zvokuti muguta umu rangova zhwerendende. Ndiyo mheremhere iyi yamuri kunzwa.

⁴⁶Soromoni atogara pachigaro choumambo.

⁴⁷Uyewo makurukota amambo asvika kuzokorokotedza changamire mambo Dhavhidhi vachitoti, Mwari wenyu ngaaite kuti zita raSoromoni riende mbiri kupinda imi aitewo kuti umambo hwake hukurekure kupfuura hwenyu. Mambo akamukotamira, pamubhedha wake.

⁴⁸Iye mambo atotiwo ngaarumbidzwe Tenzi, Mwari weIsiraeri apa kuti pave nomwana wangu[1] wokugara pachigaro changu choumambo nhasi uno ini ndichizvionawo nameso angu.”

⁴⁹Zvakadederesa vose vaiva vakakokwa naAdhoniya vakati dzvamu uyu kwake uyu kwakwe.

⁵⁰Asi Adhoniya akatya Soromoni akasimuka akaenda akandobata zvinenge nyanga zvepaatari.

⁵¹Shoko rakasvika kuna Soromoni rokuti, “Adhoniya ari kutya mambo Soromoni. Izvozvi ndozvaakatobatira zvinenge nyanga zvepaatari achiti mambo Soromoni ngaatange apika kwandiri kuti haazondiuraya nebakatwa ini muranda wake.”

⁵²Soromoni akati, “Kana akaratidzawo kuti munhu kwaye, hakuna kana rubvudzi rwake rumwechete zvarwo ruchadonhera pasi. Asi kana uipi hukawanikwa maari anotopafa chete.”

⁵³Mambo Soromoni akatumira shoko, vakandomuburutsa paatari. Akauya akasvikoremekedza mambo Soromoni. Soromoni akamuti, “Chienda zvako kumba kwako.”