Read Bhaibhiri Idzva rechiShona 1 Madzimambo 13 Bible Online

1 Madzimambo 13 - Bhaibhiri Idzva rechiShona bible

1 Madzimambo 13

¹Ndiye munhu waMwari nepo vhu achibva kwaJudha neshoko raTenzi. Izvozvo Jerobhoamu akanga amire padyo neatari kuti achipisa rusenzi.

²Murume uyu akadaidzira kuatari iyoyi namazwi aakafemerwa naTenzi achiti, “Atari, iwe atari, zvanzi naTenzi, chinzwa kuchaberekwa mwana mukomana womumba yokwaDhavhidhi ane zita rokuti Josiya. Iyeyo achapira pauri iyewe sezvibayiro vapristi venzvimbo dzakatunhumara dzokuteurira vachipisa rusenzi pauri. Vachapisa pauri iwe mapfupa avanhu.”

³Akabva apa chiratidzo musi wakarewo achiti, “Hechinoi chiratidzo chinoratidza kuti Tenzi ndiye azvitaura. Teererai munzwe, atari iyoyi iyi ichakoromorerwa pasi, rota riri pairi iri richakuhumurirwa pasi.”

⁴Mambo Jerobhoamu paakanzwa zvaitaurwa nomunhu waMwari nezveatari yapaBhetieri, akatambanudza ruoko kumunongedza ari paatari ipapo achiti, “Batai munhu uyo.” Ruoko irworwo rwaakatambanudza kunongedza rwakabva rwati papata kuoma zvokuti haana kukwanisa kurugonyesa.

⁵Atariwo yakabva yati pasi tsetsemu tsemu tsemu. Rotawo raiva paatari ndiye pasi ririri maererano nechiratidzo chakanga chapiwa nomunhu waMwari sokufemerwa kwaaiva aitwa naTenzi.

⁶Mambo ndokuti kumunhu waMwari, “Ndateterera ndikumbirireiwo kuna Tenzi, Mwari wenyu mundinamatirewo kuti ndiporeswe ruoko rwangu.” Munhu waMwari akakumbira kuna Tenzi, mambo akaporeswa ruoko rwake ndokubva rwaita sezvarwakanga rwakaita kare.

⁷Mambo akati kumunhu waMwari, “Uyai tiende tose kumba muwane chokumboti mudzore mwoyo ini ndigokupaiwo kachipo kangu.”

⁸Munhu waMwari akati kuna mambo, “Kunyange zvenyu mukandikamurira napakati zvemba yenyu, handiende nemi uye handisi kuzodya chokudya kanawo kunwa zvako mvura yokuno

⁹nokuti ndakanzi neshoko raTenzi ndisadye chokudya kana kunwa mvura kana kudzokera nenzira yandambofamba nayo pakuuya.”

¹⁰Saka akaenda neimwe nzira, akarega kudzokera nenzira yaakanga auya nayo kuBhetieri.

¹¹Zvino kuBhetieri ikoku kwaigara mumwe muporofita wechikuru. Mumwe mwana wake mukomana akauya akamutaurira zvose zvaiva zvaitwa nomunhu waMwari musi iwoyo muBhetieri imomo, shokowo raakanga ataura kuna mambo vakaritaurira baba wavo.

¹²Baba wavo vakati kwavari, “Aenda nokupi?” Vana vake vakomana vakamuratidza nzira yaakanga aenda nayo munhu waMwari aibva kwaJudha.

¹³Iye akati kuvana vake, “Ndisungirei dhongi.” Vakavasungira dhongi ndokubva vati padhongi riye karakata

¹⁴votevera munhu waMwari uya vakamuwana agere zvake pasi pomuti womuoku. Vakamuti, “Ndimi here munhu waMwari abva kwaJudha?” Iye ndokuti, “Ndini.”

¹⁵Ivo vakamuti, “Handei kumba mumbowana chokuisa mukanwa.”

¹⁶Iye ndokuti, “Handikwanisi kudzokera nemi kana kuenda nemi kunyange kudya chokudya kana kunwa mvura zvayo nemi kuno uku

¹⁷nokuti ndakanzi neshoko raTenzi ndisadye chokudya kana kunwa zvako mvura yeko kana kudzokera nenzira yandakambofamba nayo pakuuya.”

¹⁸Vakamuti, “Ini ndiri muporofitawo semi. Mutumwa anditaurirawo shoko raTenzi achiti, ‘Dzokera naye kumba kwako kuti adye chokudya amwewo mvura,’ ” asi akanga achimunyepera zvake.

¹⁹Nokudaro akadzokera navo akatodya mumba mavo, akatonwawo mvura.

²⁰Vachingunodya kudaro pateburu shoko raTenzi rakauya kumuporofita uya nyakumudzora

²¹akazivisa munhu waMwari uyu aibva kwaJudha kuti, “Zvanzi naTenzi, ‘Pamusana pokuti hauna kuteerera shoko raTenzi ukarega kuchengeta chirevo, nomutemo wawakapiwa naTenzi, Mwari wako,

²²ukadzoka ukatodya zvako chokudya nokunwa zvako mvura yokuno’ kunzvimbo yaakakuti, ‘Rega kudya chokudya kana kunwa mvura, nezvo chitunha chako hachichazovigwa muguva rababa vako.’ ”

²³Kuzoti apedza kudya chokudya nokunwa mvura, akasungira dhongi muporofita waakanga adzora.

²⁴Iye akaenda ndokubva asangana neshumba panzira ikamuuraya, chitunha chake ndokunzi panzira ipapo rabada. Dhongi neshumba ndokumira zvazvo pedyo nechitunha chacho.

²⁵Ndokubva vamwe vanhu vaipfuura nepo vaona chitunha chiya chakati rapata munzira. Shumbawo yakati mbikiti zvayo kumira pedyo nechitunha. Vakasvika vakataura izvozvi muguta maigara muporofita wechikuru uya.

²⁶Muporofita uya, nyakumbomudzora munzira paakazvinzwa akati, “Munhu waMwari uya chete asina kuteerera shoko raTenzi. Naizvozvo ndokusaka Tenzi akamuisa mukanwa meshumba yakamubvambura ikamuuraya sokutaura kwaita Tenzi.”

²⁷Akati kuvana vake, “Ndisungirei dhongi.” Vakabva vari sunga.

²⁸Akaenda ndokuwanawo chitunha chakati munzira rapata, dhongi neshumba zvakangotiwo mbikiti zvazvo kumira pedyo nechitunha chacho. Shumba haina kudya chitunha kana kubvambura dhongi.

²⁹Muporofita uyu akasimudza chitunha chomunhu waMwari ndokuchiisa padhongi odzokera nacho muguta rake iye muporofita wechikuru uya kundomuchema nokumuvigamo.

³⁰Akaviga chitunha muguva rake iye pachake. Vakamuchema vachiti, “Munun'una wangu maiwe!”

³¹Kuzoti amuviga akarongera vana vake kuti, “Kana ndafa ndivigei muguva rakavigwa munhu waMwari. Mapfupa angu muaradzike pedyo namapfupa ake.

³²Chandadariro ndechichi chokuti shoko raTenzi raakazivisa nezveatari iri muBhetieri muno nezvaakareva nezvedzimba dzepanzvimbo dzakatunhumara dzokuteurira dziri mumaguta eSamaria zvinofanira kutoti zviitike.”

³³Mushure maizvozvi Jerobhoamu haana kukanda pasi uipi hwake. Akadzokera makare mukupa vanhuwo zvavo basa roupristi hwenzvimbo dziya dzakatunhumara dzokuteurira achitoteketerera zvake kuna Mwari munhu wose wose ainge angodawo zvake kuti ave mupristi wenzvimbo dzakatunhumara dzokuteurira.

³⁴Izvozvi zvakava chitadzo mumba yaJerobhoamu zvokutoiparadza nokutoitsakatisa pasi pano.