Read Bhaibhiri Idzva rechiShona 1 Madzimambo 17 Bible Online

1 Madzimambo 17 - Bhaibhiri Idzva rechiShona bible

1 Madzimambo 17

¹Mumwe mugari wokuTishibhi kuGireadhi anonzi Eriya akati kuna Ahabhu, “Ndinopika naTenzi chaiye mupenyu, Mwari weIsiraeri wandinonamata kuti hakuchaita dova kana kunaya zvako makore ano kusatoti ndataura.”

²Shoko raTenzi rakauya kwaari rikati,

³“Chibva pano unange kumabvazuva unohwanda kukakova keKeriti kumabvazuva kweJorodhani.

⁴Mukakova ikako ndimo mauchanwa mvura. Ndaudza makunguwo kuti apote achikupa chokudya ikoko.”

⁵Saizvozvo akaenda akaita sokutaura kwakanga kwaitwa naTenzi. Akandogarawo kukakova keKeriti kari kumabvazuva kwaJorodhani.

⁶Makunguwo aimuigira chingwa nenyama kumangwanani, kumauro achimuigirawo chingwa, achinwa mvura mukakova kacho.

⁷Kwakati perei chinguva kakova aka kakabva kapwa nokuti munyika umu makanga musisanayi mvura.

⁸Shoko raTenzi rakauya kwaari rikati,

⁹“Chisimuka uende kuZarefati guta rokuSidhoni ugareko. Ndakaudza imwe chirikadzi ikoko kuti ikupe zvokudya.”

¹⁰Naizvozvo Eriya akasimuka akaenda Zarefati akasvika pasuo guru reguta iri wanei pane chirikadzi ichitsvaka huni. Akadaidzira kwairi achiti, “Ndiigireiwo tumvura mumudziyo ndingonwawo.”

¹¹Mudzimai uyu paakanga oenda kundoitora, Eriya akadaidzira kwaari achiti, “Mundiigirewo chimedu chechingwa mumaoko.”

¹²Mudzimai akati, “NaTenzi chaiye, Mwari wenyu mupenyu hakuna chandati ndabika. Chiriko, katsama bedzi koupfu mumudziyo notumafuta tushomanana muguchu. Chandiri kungoita, kunonga-nonga tukuni utwu kuti ndizondobikira ini nomwana wangu mukomana tidye tichifa zvedu.”

¹³Eriya akamuti, “Musatye zvenyu Endai zvenyu muite zvamareva, asi tangai mandigadzirira kachingwa paupfu ihwohwo mundiigirewo kuno mozoti mozvibikirawo imi nomwana wenyu,

¹⁴nokuti zvanzi naTenzi, Mwari weIsiraeri, ‘Upfu hwomumudziyo iwoyo hauchambopera uye mafuta omuguchu racho haachambokwengurwa kusvikira musi uchanayiswa mvura naTenzi panyika.’ ”

¹⁵Akaenda akandoita zvakanga zvataurwa naEriya, mudzimai uyu nevemba yake naEriya vakadya kwamazuva mazhinji.

¹⁶Upfu hwomumudziyo muya hauna kumbopera, mafutawo, muguchu muya haana kukwenguka sokutaura kwakanga kwaita Tenzi nomuromo waEriya.

¹⁷Zvakazoitikawo kuti mushure maizvozvi mukomana uya mwana womudzimai uya muridzi wemba, akarwara. Chirwere chake chakakura zvokuti upenyu pakanga pasisina.

¹⁸Mudzimai uyu akati kuna Eriya, “Ko chandakakutadzirai chiiko nhai, munhu waMwari? Heya kuuya kwenyu kwandiri kwaiva kwokuti uipi hwangu huyeukwe nhai nokuurayisa mwana wangu!”

¹⁹Eriya akamuti, “Ndipei kuno mwana wenyu.” Eriya akamutora mumaoko avo ndokumutakura oenda naye kumba yapamusoro maaigara akamuradzika pamubhedha wake chaiwo.

²⁰Akachema kuna Tenzi achiti, “Nhai Tenzi, Mwari wangu, mungauyise here chokwadi nhamo yakadai kunyange kuchirikadzi yandigere nayo nokuuraya mwanakomana wayo?”

²¹Akazvambarara pamusoro pomwana katatu achichema kuna Tenzi achiti, “Nhai Tenzi, Mwari wangu itai waro kuti mweya womwana uyu udzokere maari.”

²²Tenzi akanzwa chichemo chaEriya, mweya womwana wakadzokera mumwana uyu. Nokudaro akava mupenyu pakare.

²³Eriya akatora mwana ndokuburuka naye mumba yapamusoro iya opinda mumba, akamupa kuna amai vake. Eriya ndokuti, “Hoyuka mwana wenyu, ava mupenyu.”

²⁴Mudzimai uyu ndokuti kuna Eriya “Ndazoziva zvino kuti muri munhu waMwari uyewo kuti shoko raTenzi ramunotaura nomuromo wenyu nderechokwadi.”