Read Bhaibhiri Idzva rechiShona 1 Madzimambo 4 Bible Online

1 Madzimambo 4 - Bhaibhiri Idzva rechiShona bible

1 Madzimambo 4

¹Mambo Soromoni aitonga Isiraeri yose zvayo.

²Aiva makurukota ake ndeaya anoti: Muprisiti aiva Azariya mwanakomana waZadhoki

³samunyori ari Erihorefu naAhiya vanakomana vaShisha samunyori mukuru aiva Jehoshafati mwanakomana waAhirudhi.

⁴Mutungamiri wehondo aiva Bhenaya mwanakomana waJehoyadha vamwe vapristi vaiva Zadhoki naAbhiyatari.

⁵Mukuru mukuru wamasadunhu aiva Azariya mwanakomana waNatani. Jinda ramambo neshamwari yamambo aiva mupristi Zabhudhi mwanakomana waNatani.

⁶Mukuru mukuru wapamuzinda wamambo aiva Ahisha. Mukuru mukuru webasa rechibharo aiva Adoniramu mwanakomana waAbhudha.

⁷Soromoni aiva namasadunhu gumi namaviri ndoaiva okuwanira chokudya mambo navose vomumuzinda make. Mumwe nomumwe aiva nebasa rokuwanira mambo zvokudya kwomwedzi wose pagore.

⁸Mazita avo ndeaya, kwaiti: Bhenihuri kunyika yokwaEfuraimu yemakomo

⁹Bhenidhekeri kuMakazishaaribhimu nokuBhetishemeshi neEronibhetihanani

¹⁰Bhenihesedhi kuArubhoti sadunhu wokuSoko noruwa rweHeferu rwose

¹¹Bheniabhinadhabhu kuNafatidhori uyu akanga akaroora Tafati mukunda waSoromoni

¹²Bhaana mwanakomana waAhirudhi sadunhu wokuTaanaki nokuMegidho nokuBhetishani yose pedyo nokuZaretani kumaodzanyemba kweJezirieri, kubvira kuBhetishani kundosvika kuAbherimehora kundoyambukira kuJokimeamu

¹³Abherimehora sadunhu wokuRamatigireadhi nemisha yomuGireadhi yevemhuri yokwaJairi mwanakomana wokwaManase noruwa rwose rwokwaArigobhu kuBhashani namaguta aro makuru makumi matanhatu ane tsvingo ane zvihuri zvemisuo mikuru zvendarira

¹⁴Abhinadhabhu mwanakomana waIdho sadunhu wokuMahanaimu

¹⁵Ahimaazi sadunhu wokwaNafutari (uyu akanga akaroorawo mukunda waSoromoni, Bhasimati)

¹⁶Bhaana mwanakomana waHushai sadunhu wokwaAsheri nokuAroti

¹⁷Jehoshafati mwanakomana waParua sadunhu wokwaIsakari

¹⁸Shimei mwanakomana waEra sadunhu wokwaBhenjamini

¹⁹Gebheri mwanakomana waUri sadunhu wokuGireadhi nyika yaSihoni mambo wavaAmori nenyika yaOgu mambo weBhashani ndiye oga aiva sadunhu.

²⁰VokwaJudha nevokwaIsiraeri vaiva vakawanda sejecha romumahombekombe egungwa. Vaidya vachinwa upenyu huchivafadza.

²¹Soromoni aitonga nyika dzose kubvira muna Yufuratesi kusvikira kunyika yevaFirisitia nokumuganhu weIjipiti. Vaitera mutero vachishandira Soromoni upenyu hwake hwose.

²²Pazuva, kwaSoromoni kwaidiwa zvokudya zvakadai izvi, kwaiti: makumi mashanu amasaga oupfu hwekoroni hwakatsetseka, nezana ramasaga oupfu

²³nemombe gumi dzakakodzwa nedzimwe mombe makumi maviri uye mbudzi nehwai zana kwouyawo nondo nemhara nemhembwe nehuku dzakakodzwa.

²⁴Chaidariso ndechokuti aitonga dunhu rose rokumadokero kwaYufuratesi kubvira kuTifusa kusvikira kuGaza achitonga madzimambo ose kumadokero aYufuratesi aine runyararo mativi ose akanga akamupoteredza.

²⁵Panguva yose yaSoromoni kwaJudha nokwaIsiraeri kwakanga kuine runyararo kubvira kwaDhani kundosvika kuBheerishebha munhu wose ari pamutambarakede pamuvhaini nepamukuyu wake.

²⁶Soromoni aivawo notumatanga twemabhiza zviuru makumi mana navachairi vawo zviuru gumi nezviviri.

²⁷Masadunhu aye aye ndiwo aiwanira mambo Soromoni zvokudya nevose vaidya pamwechete namambo Soromoni pateburu yake, mumwe nomumwe mwedzi wake, ndiwowo aiwona kuti hapana here chiri kushayikwa.

²⁸Vaiunzawo bhari nemashanga amabhiza namanyurusi kwazvainge zvanzi zviunganidzirwe maererano nezvirongwa zvasadunhu woga woga.

²⁹Mwari akapa Soromoni ungwaru nomwoyo unonzwisisa zvakanyanyisisa kwazvo noruzivo rwakawanda chaizvo sejecha romumahombekombe egungwa

³⁰zvokuti ungwaru hwaSoromoni hwaipfuura ungwaru hwevanhu vose vokumabvazuva noungwaru hwose hwokuIjipiti.

³¹Uyezve akanga aine ungwaru kupinda munhu wose, kupfuura Etani vokwaEzira naHemani naKarikorai naDharidha vanakomana vaMahori. Akaenda mbiri munyika dzose dzaiva dzakapoteredza.

³²Akaita tsumo zviuru zvitatu nenziyo chiuru chimwechete chine shanu.

³³Aigona kukurukura nezvemiti kubvira kumushidhari uri kuRebhanoni kusvikira pakamuti komuhisopi kanomera pamadziro. Aikwanisawo kukurukura nezvemhuka neshiri nezvezvinozvova napasi uye nezvehove.

³⁴Vanhu vaiuyako vachibva kundudzi dzose kuzonzwa ungwaru hwaSoromoni vachibvawo kumadzimambo ose apasi pano akanga anzwa nezvoungwaru hwake.