Read Bhaibhiri Idzva rechiShona 2 Madzimambo 10 Bible Online

2 Madzimambo 10 - Bhaibhiri Idzva rechiShona bible

2 Madzimambo 10

¹Ahabhu aiva navanakomana makumi manomwe kuSamaria. Jehu akanyora tsamba akadzitumira kune vokuSamaria kuvatongi veJezirieri nokuvakuru vakuru vacho nokune vaiva vokuchengeta vana ivava vaAhabhu achiti,

²“Sezvamunongoonawo kuti vana vatenzi venyu munavo, nengoro dzehondo munadzo namabhiza uye mune maguta ane tsvingo nezvombowo zvokurwisa nazvo saka panongosvika chete tsamba iyoyi kwamuri

³mobva matosarudza mwana watenzi wenyu murume uno chaiye akasvika mumugadze pachigaro chababa wake choumambo, mutorwira umambo hwemba yababa wenyu.”

⁴Asi vakabva vabatwa nokutya kwakanyanyisa kwazvo vakati, “Onaika kuti madzimambo maviri aya akakundika kumirisana naJehu ko kutozoti isusu?”

⁵Nokudaro mukuru mukuru womuzinda nomutongi weguta pamwechete navakuru vakuru vacho navachengeti vaya, vakatumira Jehu shoko rokuti, “Tiri varanda venyu zvose zvamunenge mangotiudza tinoita. Hakuna munhu watinogadza umambo kuno. Itai zvenyu zvamunoda.”

⁶Iye akavanyorera tsamba yechipiri achiti, “Kana muri kudivi kwangu uye kana makagadzirira kunditeerera mochidaizvi. Bvisai vanakomana vatenzi wenyu misoro muuye kwandiri kuJezireeri mangwana panguva idzo dzino idzi.” Izvozvo vanakomana vamambo makumi manomwe vakanga vaine varume vomuguta iroro vaivarera.

⁷Pakasvika tsamba iyi kwavari, vakabata vanakomana vamambo, makumi manomwe avanhu vakavauraya vakaisa misoro yavo mudzitswanda vakaitumira kuna Jehu kuJezirieri.

⁸Pakasvika nhume ikamupira kuti, “Vauya nemisoro yavanakomana vamambo,” iye akati, “Iitei mirwi miviri kumberi kwesuo guru kusvikira mangwanani.”

⁹Mangwanani acho akabuda akamirapo akataurira vanhu vose kuti, “Imi hamuna mhosva. Ini ndini ndakapandukira tenzi wangu ndikamuuraya. Ko akaurayawo vose ava ndiani?

¹⁰Chizivai kuti muromo waTenzi hauwire pasi waakataura iye Tenzi nezvemba yaAhabhu nokuti Tenzi aita zvaakareva nomuromo womuranda wake Eriya.”

¹¹Saizvozvo Jehu akauraya vose vemba yaAhabhu vakanga vasara kuJezirieri, akaurayawo vakuru vakuru vake vose neshamwari dzake navapristi vake akasara asisina nomunhu wose.

¹²Jehu akasimuka akaenda kuSamaria, ari munzira kudaro ava kuBhetiekedhi yavafudzi

¹³akasangana nehama dzaAhaziya mambo wokwaJudha akati, “Ndimi vanaaniko?” Ivo vakati, “Isu tiri hama dzokwaAhaziya tauya kuzoshanyira vanakomana vamambo nevanakomana vaamai vamambo.”

¹⁴Iye ndokuti, “Vabatei vari vapenyu kudai.” Vakavabata vari vapenyu kudaro vakavaurayira kumugodhi wokuBhetiekedhi vaiva makumi mana avanhu ana vanhu vaviri hapana waakasiya ari mupenyu.

¹⁵Paakabva ipapo akasangana naJehonadhabhu mwanakomana waRekabhu achiuya kuzosangana naye. Jehu akamukwazisa akamuti, “Uri papi? Ini ndiri wako ini. Ko iwe uri wangu here?” Iye akati, “Ndizvozvo.” Jehu akati, “Kana zvakadaro ndibate,” iye ndokumukwazisa. Jehu akamukwidza mungoro yake yehondo

¹⁶akati, “Handei undoona shungu dzangu naTenzi.” Vakabva vamukwidza mungoro make.

¹⁷Kuzoti asvika kuSamaria akauraya vose vokwaAhabhu vakanga vasara muSamaria kudzamara aparadza sokutaurawo kwaTenzi nomuromo waEriya.

¹⁸Jehu akazounganidza vanhu vose akati kwavari, “Kunamata Bhaari kwaiita Ahabhu kwaiva kushoma kuye, ini Jehu ndichamunamata zvikuru kwazvo.

¹⁹Saka naizvozvo chindidaidziraiwo vaporofita vose vaBhaari navose vanomunamata navapristi vake vose kurege kuwana asingauyeko. Hapafanire kuva neanoshayikwapo. Ndinodaro nokuti ndine chibayiro chikuru kwazvo chokupira kuna Bhaari. Kuwana anoshayikwapo pake pamuperera.” Asi Jehu aiita izvozvo kuri kunyengedza achida zvake kuparadza vanamati vaBhaari.

²⁰Jehu akati, “Itirai Bhaari musangano,” vakabvawo vaukokera.

²¹Jehu akatumira shoko kwaIsiraeri kwose, vanamati vaBhaari vose vakauya zvokuti hapana asina kuuya. Vakapinda mumba yaBhaari ikazara kunze nokunze.

²²Jehu akati kune aichengeta maichengeterwa magemenzi, “Buritsira magemenzi vanamati vaBhaari vose.” Saizvozvo akavaburitsira magemenzi aye.

²³Jehu akapinda mumba maBhaari aina Jehonadhabhu mwanakomana waRekabhu akati kuvanamati vaBhaari, “Nyatsotsvakai muone kuti hapana munamati waTenzi pakati penyu asi kuti vanamati vaBhaari voga.”

²⁴Vakapinda[3] kundopira zvibayiro nemipiro yokupisa.

²⁵Paakangopedza chete kupira chibayiro chokupisa, Jehu akati kune vakanga vakagaririra vaye nokuvakuru vakuru, “Pindai muvauraye! Hapana anofanira kupunyuka!” Vokugaririra vaye navakuru vakuru pavakapedza kuvauraya namapakatwa, vakakanda zvitunha panze vakapinda mumba yomukati memba yaBhaari.

²⁶Vakaburitsa chifananidzo chokunamata chaiva mumba maBhaari vakachipisa.

²⁷Vakapwanya chifananidzo chaBhaari ichocho, vakapwanya imba yaBhaari vakaiita chimbuzi kusvikira pari nhasi.

²⁸Nokudaro Jehu zvaBhaari muIsiraeri akazviparadza kuti nho.

²⁹Asi Jehu haana kukanda pasi zvechitadzo chaJerobhoamu mwanakomana waNebhati chaakapinza nacho vokwaIsiraeri muchitadzo, zvezvimhuru zvendarama zvaiva kuBhetieri nokwaDhani.

³⁰Tenzi akati kuna Jehu, “Pamusana pokuti waita zvakanaka kumba yaAhabhu zvandinoda zvose zvanga zviri pamwoyo pangu, vana vako vakomana vechizvarwa chechina vachagara paumambo hwokwaIsiraeri.”

³¹Asi Jehu haana kuchenjerera kutevedza murao waTenzi, Mwari weIsiraeri nomwoyo wose. Haana kukanda pasi zvechitadzo chaJerobhoamu chaakapinza nacho vokwaIsiraeri muchitadzo.

³²Pamazuva iwayo Tenzi akatangisa kutapudza nyika yeIsiraeri. Hazaeri akavakurira munyika yose zvayo yeIsiraeri,

³³kubvira muna Jorodhani zvichienda kumabvazuva munyika yose yeGireadhi neyokwaGadhi neyokwaRubheni neyokwaManase; kubvirawo kuguta reAroero pedyo nebani romuna Arinoni zvichireva kuti Gireadhi neBhashani.

³⁴Inga dzimwe nyaya dzezvaJehu nezvose zvaakaita nougamba hwake hwose zvakanyorwa wani muBhuku reNhoroondo dzaMadzimambo okwaIsiraeri.

³⁵Jehu akazoenda kwakaenda vamwe madzitateguru ake, vakamuviga muSamaria. Jehoahazi mwanakomana wake ndiye akazotonga panzvimbo pake.

³⁶Jehu akatonga vokwaIsiraeri ari muSamaria kwamakore makumi maviri namasere.