Read Bhaibhiri Idzva rechiShona 2 Madzimambo 11 Bible Online

2 Madzimambo 11 - Bhaibhiri Idzva rechiShona bible

2 Madzimambo 11

¹Amai vaAhaziya, Ataria pavakaona kuti mwanakomana wavo afa vakasimuka vakauraya vose vokumba huru.

²Asi Jehoshebha mukunda wamambo Joramu hanzvadzi yaAhaziya akatora Joashi mwanakomana waAhaziya akamusvovesera mumba mokurara iye nomureri wake pakati pavanakomana vamambo vakange voda kuurayiwa. Ndokumuhwandisa kwaakaita kuna Ataria akabva apunyuka kuurayiwa.

³Akava naye kwamakore matanhatu akazvihwandisa mumba yaTenzi, Ataria achitonga nyika iyi.

⁴Asi kuzoti mava mugore rechinomwe Jehoyadha akatumira shoko kuvakuru vakuru vavachengetedzi vamambo Karite nevokuchengetedza muzinda. Akavati vaunzwe kwaari kumba yaTenzi. Akaita chitsidzirano navo, akavati vapike mhiko muimba yaTenzi, akabva avaratidza mwanakomana wamambo.

⁵Akavaudza kuti, “Zvamuchaita ndezvizvi: pazvikwata zvenyu zviri zvitatu, chiye chinouya kuzoita basa musi weSabata china mapokawo acho matatu anoti boka rokuchengetedza muzinda,

⁶neboka rokuchengetedza pasuo guru reSuru, neboka rokuchengetedza kuseri kweboka rinochengetedza pasuo guru, chikwata ichochi ndicho chichachengetedza muzinda.

⁷Zvimwewo zvikwata zvenyu zviviri zvisingawanzoita basa musi weSabata zviya zvine basa rokuchengetedza imba yaTenzi vakakuta mambo

⁸ndivo vachakomberedza mambo vakapakata zvombo zvavo zvehondo. Kuwana anenge angofemera kupindira pakarongana vachengetedzi ngaaurayiwe. Kwese kunenge kuchienda mambo vanofanira kunge vainaye.”

⁹Vakuru vakuru ava vakaita sezvakanga zvanzi nomupristi Jehoyadha zviitwe. Mumwe nomumwe wavo akauya navanhu vake vakanga vasingafaniri kuva pabasa musi weSabata navaye vakanga vachifanira kuva pabasa musi weSabata vakauya kumupristi Jehoyadha.

¹⁰Mupristi akapa vakuru vakuru ava mapfumo nenhoo zvaiva zvamambo Dhavhidhi zvaiva zviri mumba yaTenzi.

¹¹Vachengetedzi ava vakamira vakapakata zvombo zvavo zvehondo kubvira kumaodzanyemba kusvikira kuchamhembe kutenderedza atari nemba yamambo.

¹²Akabva aburitsa mwanakomana wamambo akamudzika ngundu youmambo akamupa bumbiro romutemo vakazivisa kuti ndiye mambo. Vakamuzodza mafuta vakarova makwa vachiti, “Mambo! Ngazvirambe zvakadaro.”

¹³Pakanzwa Ataria zhowezhowe revachengetedzi nerevanhu akaenda kuimba yaTenzi kuvanhu.

¹⁴Paakatarisa akaona, mambo amire pedyo nomusimboti maererano netsika yaifanira kuitwa, vakuru vakuru vehondo nevokuridza mabhosvo vamire namambo, vanhu vose venyika iyi vachipembera kufara, hwamanda ichidandaura. Ataria akabvarura hanzu dzake akadaidzira achiti, “Kwapandukwa! Kwapandukwa!”

¹⁵Mupristi Jehoyadha akaudza vakuru vakuru vaitungamirira hondo kuti, “Mubvisei mumitsetse yevachengetedzi mumuburitse, muuraye nebakatwa ani naani anenge woda kutsigirana naye.” Mupristi aiti haafanire kuurayirwa mumba yaTenzi.

¹⁶Nokudaro vakabata vakapfuura navo pasuo ramabhiza wokupinda nawo mumuzinda wamambo vakavaurayirapo.

¹⁷Jehoyadha akaitisa chitenderano pakati paTenzi namambo navanhu kuti vave vanhu vaTenzi uyewo pakati pamambo navanhu.

¹⁸Vanhu vose venyika iyi vakaenda kumba yaBhaari vakaipaza, neatari dzake. Zvifananidzo zvake vakazvipaza vakauraya Matani mupristi waBhaari pamberi peatari dzacho. Vapristi vaye vakabva vaisa vachengetedzi pamba paTenzi.

¹⁹Vakatora vakuru vakuru vehondo navachengetedzi vamambo nevokuchengetedza muzinda nevanhu vose venyika iyi ndokuunza mambo kubva kumba yaTenzi vachienda nepasuo guru revachengetedzi kusvika kumba yamambo. Akasvikogara pachigaro chake choumambo, chigaro chemadzimambo.

²⁰Vanhu vose venyika iyi vakapembera kufara, muguta mukava norunyararo mushure mokunge Ataria aurayiwa nebakatwa kumuzinda wamambo.

²¹Joashi akatanga kutonga ava namakore manomwe.