Read Bhaibhiri Idzva rechiShona 2 Madzimambo 12 Bible Online

2 Madzimambo 12 - Bhaibhiri Idzva rechiShona bible

2 Madzimambo 12

¹Mugore rechinomwe rokutonga kwaJehu, Jehoashi akatangawo kutonga. Akatonga ari muJerusaremu kwamakumi mana amakore. Zita raamai vake rainzi Zibhiya vokuBheerishebha.

²Jehoashi uyu akaita zvaidiwa naTenzi mazuva ose oupenyu hwake nokuti mupristi Jehoyadha ndiye aimudzidzisa.

³Zvakadaro zvazvo nzvimbo dzakatunhumara dzokuteurira hadzina kubviswa. Vanhu vakaramba vachipira zvavo zvibayiro vachipisawo rusenzi panzvimbo dzakatunhumara dzokuteurira idzodzo.

⁴Jehoashi akati kuvapristi, “Pamari yose yezvinhu zvinoera zvinofanira kuunzwa kumba yaTenzi, mari yomutero wapamunhu, mari yakatemwa pamunhu woga woga, nemari inobviswawo nomunhu sokuda kwake achiuya nayo mumba yaTenzi,

⁵vapristi ngavatore mumwe nomumwe kuna sahomwe wake vagadzire imba iyoyi panenge pachidikanwa kugadzira.”

⁶Asi gore ramakumi maviri nechitatu rokutonga kwamambo Jehoashi rakadzamara kusvika vapristi vasati vambogadzira imba yacho.

⁷Naizvozvo mambo Jehoashi akadaidza mupristi Jehoyadha navamwe vapristi akavati, “Muri kuregererei kugadzira imba yaTenzi. Saka zvino, zvokutora mari kunanasahomwe venyu chizviregai, muendese mari iyoyo kubasa rayo rokugadzira imba iyoyo.”

⁸Vapristi vakabvuma kuti zvokutora mari kuvanhu varege, ivo varegewo kugadzira imba iyoyo.

⁹Mupristi Jehoyadha akazotora zibhokisi guru akaboora buri pahwidibiro yaro. Akariisa pedyo neatari kurudyi topinda mumba yaTenzi. Vapristi vaichengetedza kumusuo, vaiisa mariri mari yose yaiunzwa mumba yaTenzi.

¹⁰Vaiti vakangoona kuti muzibhokisi umu mari yawanda, munyori wokwamambo nomupristi mukuru aiuya overenga vosungira mari yacho inenge yawanikwa mumba yaTenzi mututsapo.

¹¹Mari yainge yayerwa vaipa vashandi vaiona nezvebasa remba yaTenzi, ivavo vaitambirisa vavezi navavaki vaiita basa pamba paTenzi,

¹²uye vokuvaka namatombo navacheki vamatombo nokutenga mapuranga nematombo akakwakwanurwa zvokugadzirisa imba yaTenzi uye nokubhadhara basa rose zvaro rokugadzira imba iyoyo.

¹³Asi havana kugadzirisa midziyo kana makomichi kana zvigero kana madhishi kana mabhosvo kunyange midziyo zvayo yendarama kana yesirivha zvomuimba yaTenzi

¹⁴nokuti yakapiwa vaiti vebasa vaiishandisa pakugadzira imba yaTenzi.

¹⁵Havaimbobvunzurudza vanhu vavainge vapa mari iyoyo yokutambirisa vanhu nokuti vakanga vari vanhu vakavimbika.

¹⁶Mari yemipiro yokuripa mhosva neyemipiro yokupfupira zvitadzo hayaiuyiswa mumba yaTenzi, yaiva yavapristi.

¹⁷Panguva iyoyo Hazaeri mambo weSiria akakwira kundorwisa guta reGati akarikurira. Asi Hazaeri paakati zvino oda kuvinga Jerusaremu,

¹⁸Jehoashi mambo wokwaJudha akatora mipiro yose yakanga yaturirwa kuna Mwari yezvinhu zvakatsidzirwa kupa Mwari naJehoshafati naJehoramu naAhaziya, madzibaba ake madzimambo okwaJudha pamwechete nemipiro yake yaakanga akatsidzirawo kupa Mwari uye nendarama yose yaiva mokuchengetera upfumi hwemba yaTenzi neyemumuzinda wamambo. Akatumira zvose izvozvi kuna Hazaeri mambo weSiria. Hazaeri ndokubva asiya Jerusaremu oenda zvake.

¹⁹Inga dzimwe nyaya dzezvaJoashi nezvose zvaakaita, zvakanyorwa wani muBhuku reNhoroondo dzaMadzimambo okwaJudha.

²⁰Makurukota aJoashi akamumukurira akamupandukira akamuuraya mumba iya yapachimudhuri chamavhu munzira inodzika kuSira.

²¹Jozakari mwanakomana waShimeati naJehozabhadhi mwanakomana waShomeru, makurukota ake ndivo vakamuuraya akafa. Vakamuviga pamwechete namadzibaba ake muGuta raDhavhidhi. Amaziya mwanakomana wake ndiye akazotonga panzvimbo pake.