Read Bhaibhiri Idzva rechiShona 2 Madzimambo 13 Bible Online

2 Madzimambo 13 - Bhaibhiri Idzva rechiShona bible

2 Madzimambo 13

¹Mugore regumi nechitatu rokutonga kwaJoashi mwanakomana waAhaziya mambo wokwaJudha, Jehoahazi mwanakomana waJehu akatangisa kutonga kwaIsiraeri kuSamaria. Akatonga kwegumi ramakore rina makore manomwe.

²Akaita zvakaipa zvisingadiwi naTenzi akatevedzera zvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza, haana kusiyana nazvo.

³Tenzi akavirukira Isiraeri nehasha akaramba ovaisa mumaoko aHazaeri mambo weSiria nomumaoko aBhenihadhadhi mwanakomana waHazaeri.

⁴Jehoahazi akateterera kukumbira kuna Tenzi, Tenzi akamunzwa nokuonawo kubatwa zvakaipa kwaiitwa vaIsiraeri namambo weSiria.

⁵Naizvozvo Tenzi akapa Isiraeri mununuri zvokuti vakapunyuka mumaoko avaSiria, vanhu vokwaIsiraeri vakagara mumisha yavo samazuva ose.

⁶Zvakadaro zvazvo havana kusiyana nezvitadzo zvemba yaJerobhoamu zvaakapinza nazvo vokwaIsiraeri mukutadza, akatozvitevedzera uyewo chifananidzo chokunamata Ashera chakaramba chiri muSamaria.

⁷Chakanga chavepo ndechokuti Jehoahazi akanga angosara namakumi mashanu avachairi vemabhiza nengoro dzehondo gumi nezviuru gumi zvavarwi vetsoka nokuti mambo weSiria akanga avaparadza avawotesa seguruva repaburiro.

⁸Inga dzimwe nyaya dzezvaJehoahazi nezvose zvaakaita nougamba hwake, zvakanyorwa wani muBhuku reNhoroondo dzemadzimambo okwaIsiraeri.

⁹Jehoahazi akazovata oendawo kwakaenda vamwe kumadzitateguru ake. Joashi mwanakomana wake ndiye akazotonga.

¹⁰Mugore ramakumi matatu ane rechinomwe rokutonga kwaJoashi mambo wokwaJudha, Jehoashi mwanakomana waJehoahazi akatanga kutonga Isiraeri muSamaria. Akatonga kwamakore gumi namatanhatu.

¹¹Akaita zvakaipa zvisingadiwi naTenzi haana kusiyana nezvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza achitozvitevedzera zvake.

¹²Inga dzimwe nyaya dzezvaJehoashi nezvose zvaakaita nougamba hwake pakurwa naAmaziya mambo wokwaJudha, zvakanyorwa wani muBhuku reNhoroondo dzeMadzimambo okwaIsiraeri.

¹³Jehoashi akazovata oendawo kwakaenda vamwe, kumadzitateguru ake. Jerobhoamu ndiye akazogara pachigaro chake choumambo. Joashi akavigwa muSamaria pamwechete namadzimambo okwaIsiraeri.

¹⁴Erisha paakawirwa nedenda raizomutora, Joashi mambo weIsiraeri akadzikako kwaari akasvikochema paari achiti, “Baba vangu! Baba vangu kani! Ngoro dzamabhiza dzehondo dzeIsiraeri navachairi vadzo!”

¹⁵Erisha akati kwaari, “Torai uta nemiseve,” iye ndokutorawo uta nemuseve.

¹⁶Akati kuna mambo wokwaIsiraeri, “Torai uta hwenyu mutatamure.” Akahutatamura. Erisha ndokuisa maoko ake pamusoro pamaoko amambo

¹⁷akati, “Chizarurai hwindo rokumabvazuva.” Iye akarizarura. Erisha ndokuti, “Chipfurai.” Iye ndokupfuura. Erisha akabva ati, “Museve waTenzi wokununura, museve wokununura kuvaSiria! Ndinodaro nokuti mucharwisa vaSiria muAfeki kusvikira mavaparadza.”

¹⁸Erisha akati, “Torai miseve iyi.” Iye akaitora. Akati kuna mambo wokwaIsiraeri, “Rovai pasi nayo.” Iye akarova pasi nayo katatu ndokubva arega.

¹⁹Munhu waTenzi akamushatirirwa akati, “Mungadai matoparova kashanu kana katanhatu kese. Ndopamaizokwanisa kurova Siria kusvikira maiparadza. Asi zvino muchangorova Siria katatu chete.”

²⁰Erisha akafa zvake vakamuviga. Zvikwata zvokupamba zvevaMoabhu zvaipota zvichiuya munyika umu mumwaka wepfumvunza.

²¹Zvino kwakati mumwe murume achindovigwa ndokuona hecho chikwata chokupamba. Vakangokanda murume uyu muguva raErisha akaenda akaguma mapfupa aErisha akabva amuka ndokumira chaizvo namakumbo ake.

²²Hazaeri mambo weSiria akabata zvakaipa vokwaIsiraeri mazuva ose oupenyu hwaJehoahazi.

²³Asi Tenzi akavaitira mwoyochena akavanzwira tsitsi akavacheuka pamusana pechitenderano chake chaakaita naAbhurahamu naIsaki naJakobho akarega kuvaparadza kunyange nazvino wese haana kumbovarasa paari iye.

²⁴Pakafa Hazaeri mambo weSiria, mwanakomana wake Bhenihadhadhi ndiye akatonga panzvimbo pake.

²⁵Jehoashi mwanakomana waJehoahazi akatorera pakare Bhenihadhadhi mwanakomana waHazaeri maguta akanga atorerwa baba vake Jehoahazi muhondo. Jehoashi akamukurira rutatu akabva adzosa maguta eIsiraeri.