Read Bhaibhiri Idzva rechiShona 2 Madzimambo 15 Bible Online

2 Madzimambo 15 - Bhaibhiri Idzva rechiShona bible

2 Madzimambo 15

¹Mugore ramakumi maviri nechinomwe rokutonga kwaJerobhoamu mambo wokwaIsiraeri, Azariya mwanakomana waAmaziya mambo wokwaJudha akatangisa kutonga.

²Akanga ava namakore gumi namatanhatu paakatanga kutonga. Akatonga kwamakore makumi mashanu namaviri ari muJerusaremu. Zita raamai vake rainzi Jekoriya vomuJerusaremu.

³Iyeyu akaita zvakarurama zvinodiwa naTenzi sezvakaitwa nababa vake Amaziya.

⁴Zvakadaro zvazvo nzvimbo dzakatunhumara dzokuteurira hadzina kubviswa. Vanhu vainge vachingopira zvavo zvibayiro nokupisa rusenzi panzvimbo idzodzo dzakatunhumara dzokuteurira.

⁵Tenzi akarova mambo nechirwere chemaperembudzi chikaramba chakamubata kusvikira pazuva raakafa. Izvozvo ainge ongogara mumba make ari oga oga. Jotamu mwanakomana wamambo ndiye akanga abata zvomumuzinda wamambo achitonga vanhu.

⁶Inga dzimwe nyaya dzezvaAzariya nezvose zvaakaita zvakanyorwa wani muBhuku reNhoroondo dzeMadzimambo okwaJudha.

⁷Azariya akazovatawo oendawo kwakaenda vamwe kumadzitateguru ake. Vakamuviga pamwechete namadzibaba ake muguta raDhavhidhi. Mwanakomana wake Jotamu ndiye akazotonga panzvimbo pake.

⁸Mugore ramakumi matatu nechisere rokutonga kwaAzariya mambo wokwaJudha, Zekariya mwanakomana waJerobhoamu akatonga vokwaIsiraeri ari muSamaria kwemwedzi mitanhatu.

⁹Iyeyu akaita zvakaipa zvisingadiwe naTenzi sezvakaita madzibaba ake haana kusiyana nezvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza.

¹⁰Sharumu mwanakomana waJabheshi akaronga zvokumumukira akamuponda pane vanhu akafa. Iye ndokutonga panzvimbo pake.

¹¹Inga dzimwe nyaya dzezvaZekariya zvakanyorwa wani muBhuku reNhoroondo dzeMadzimambo okwaIsiraeri.

¹²(Ichochi ndicho chitsidzo chaTenzi chaakaita kuna Jehu achiti, “Vana vako vakomana vachagara pachigaro choumambo hwokwaIsiraeri kusvikira kuchizvarwa chechina,” zvikabva zvaitika saizvozvo).

¹³Sharumu mwanakomana waJabheshi akatangisa kutonga mugore ramakumi matatu nechipfumbamwe rokutonga kwaUziya mambo wokwaJudha. Akatonga kwemwedzi mumwechete ari muSamaria.

¹⁴Menahemu mwanakomana waGadhi akabva kuTiriza akakwira kuSamaria akaponda Sharumu mwana waJabheshi muSamaria akamuuraya ndokutonga panzvimbo pake.

¹⁵Inga dzimwe nyaya dzezvaSharumu nokuronga kwaakaita zvokupanduka zvakanyorwa wani muBhuku reNhoroondo dzaMadzimambo okwaIsiraeri.

¹⁶Panguva iyoyo Menahemu akaparadza Tifusa navose vaivemo nedunhu raro, kubvira kuTiriza zvichienda mberi nokuti havana kumuzarurira guta irori ndokusaka akariparadza achitumbura madzimai aiva nepamuviri vakanga varimo.

¹⁷Mugore ramakumi matatu nechipfumbamwe rokutonga kwaAzaria mambo wokwaJudha, Menahemu mwanakomana waGadhi akatangisa kutonga kwaIsiraeri. Akatonga kwegumi ramakore ari muSamaria.

¹⁸Akaita zvakaipa zvisingadiwi naTenzi. Pamazuva ake ose haana kusiyana nezvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza.

¹⁹Puru mambo weAsiria akauya kuzorwisa nyika iyi, ndokubva Menahemu apa Puru mari yesirivha inorema makirogiramu zviuru makumi matatu nezvina achida kuti abatsirwe kuita kuti umambo hwake hudzike midzi.

²⁰Menahemu akawana mari iyoyi nokuteresa vokwaIsiraeri. Akaitora kuna vapfumi achibvisisa makumi mashanu emari yesirivha yamashekeri pamunhu, yokupa kuna mambo weAsiria. Nokudaro mambo weAsiria akadzokera zvake. Haana kuzoramba ari munyika umu.

²¹Inga dzimwe nyaya dzezvaMenahemu nezvose zvaakaita zvakanyorwa wani muBhuku reNhoroondo dzeMadzimambo okwaIsiraeri.

²²Menahemu akazovata oendawo kwakaenda vamwe kumadzitateguru ake. Mwanakomana wake Pekahiya ndiye akazotonga panzvimbo pake.

²³Mugore regumi nechishanu rokutonga kwaAzariya mambo wokwaJudha, Pekahiya mwanakomana waMenahemu akatangisa kutonga kwaIsiraeri ari muSamaria. Akatonga kwamakore maviri.

²⁴Akaita zvakaipa zvisingadiwi naTenzi. Haana kusiyana nezvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza.

²⁵Mumwe mukuru mukuru wehondo yake ainzi Peka, mwanakomana waRemariya akaronga kumupandukira navarume makumi mashanu vokwaGireadhi vakamuuraya[4] kuSamaria mumba yokuhwanda hondo yomumuzinda wamambo, akabva ava kutonga panzvimbo pake.

²⁶Inga dzimwe nyaya dzezvaPekahiya nezvose zvaakaita, zvakanyorwa wani muBhuku reNhoroondo dzeMadzimambo okwaIsiraeri.

²⁷Mugore ramakumi mashanu nechipiri rokutonga kwaAzariya mambo wokwaJudha, Peka mwanakomana waRemariya akatanga kutonga kwaIsiraeri ari muSamaria. Akatonga kwamakumi maviri amakore.

²⁸Akaita zvakaipa zvisingadiwe naTenzi. Haana kusiyana nezvitadzo zvaJerobhoamu mwanakomana waNebhati zvaakapinza nazvo vokwaIsiraeri mukutadza.

²⁹Pamazuva aPeka mambo wokwaIsiraeri, Tigiratipireseru mambo weAsiria akauya akakurira Iyoni neAbherobhetimaaka neJanoa neKedheshi neHazori nokwaGireadhi neGarirea nenyika yose yokwaNafutari. Akatapa vanhu ivavo akaenda navo kuAsiria.

³⁰Hoshea mwanakomana waEra akaronga kupandukira Peka mwanakomana waRemariya akamuponda akamuuraya akatonga panzvimbo pake. Izvozvo raiva gore rechimakumi maviri rokutonga kwaJotamu mwanakomana waUziya.

³¹Inga dzimwe nyaya dzezvaPeka nezvose zvaakaita, zvakanyorwa wani muBhuku reNhoroondo dzemadzimambo okwaIsiraeri.

³²Mugore rechipiri rokutonga kwaPeka, mwanakomana waRemariya, mambo wokwaIsiraeri, Jotamu mwanakomana waUziya, mambo wokwaJudha akatanga kutonga.

³³Akanga ava namakore makumi maviri namashanu paakatangisa kutonga. Akatonga kwemakore gumi namatanhatu ari muJerusaremu. Zita raamai vake rainzi Jerusha, mwanasikana waZadhoki.

³⁴Akaita zvakarurama, zvinodiwa naTenzi, sezvakaitwawo nababa wake Uziya.

³⁵Zvakadaro zvazvo, nzvimbo dzakatunhumara dzokuteurira hadzina kubviswa. Vanhu vainge vachingopira zvavo zvibayiro nokupisa rusenzi panzvimbo idzodzo dzakatunhumara dzokuteurira. Akavaka Suo Guru roKumusoro repamba paTenzi.

³⁶Inga dzimwe nyaya dzezvaJotamu nezvose zvaakaita zvakanyorwa wani muBhuku reNhoroondo dzeMadzimambo okwaJudha.

³⁷Mumazuva iwayo Tenzi akatanga kutuma Rezini mambo weSiria naPeka mwanakomana waRemariya kuti varwise vokwaJudha.

³⁸Jotamu akazovatawo oenda kwakaenda vamwe kumadzitateguru ake. Akavigwa pamwechete namadzibaba ake muguta raDhavhidhi tateguru wake. Mwanakomana wake Ahazi ndiye akazotonga panzvimbo pake.