Read Bhaibhiri Idzva rechiShona 2 Madzimambo 24 Bible Online

2 Madzimambo 24 - Bhaibhiri Idzva rechiShona bible

2 Madzimambo 24

¹Panguva yaJehoyakimu Nebhukadhineza mambo weBhabhironi akauya, ndokubva Jehoyakimu ava muranda wake kwamakore matatu. Asi akazodzoka omupandukira.

²Tenzi akamutumira zvikwata zvavaKaridhea nezvikwata zvevaSiria nezvikwata zvavaMoabhu nezvikwata zvavaAmoni. Akazvitumira kundorwisa kwaJudha kuti vaparadze sokumbotaura kwakaita Tenzi nomuromo wavaranda vake vaporofita.

³Izvozvi zvinofanira kunge chete zvakawira vokwaJudha ari Tenzi ainge atotema kuti zviitike kuti avabvise pameso pake pamusana pezvitadzo zvaManase maererano nezvose zvaakanga aita

⁴uye napamusana peropa risina mhosva raakadeura nokuti akanga azadza Jerusaremu neropa risina mhosva. Zvino Tenzi akaramba kuregerera izvozvi.

⁵Inga dzimwe nyaya dzezvaJehoyakimu nezvose zvaakaita zvakanyorwa wani muBhuku reNhoroondo dzaMadzimambo okwaJudha.

⁶Jehoyakimu uyu akazovata oendawo kwakaenda vamwe kumadzitateguru ake. Mwanakomana wake Jehoyakini ndiye akazotonga panzvimbo pake.

⁷Mambo weIjipiti haana kuzobudazve munyika make nokuti mambo weBhabhironi akanga zvino atorera mambo weIjipiti zvose zvaaiva nazvo kubvira kukakova keIjipiti kusvikira kurwizi rwaYufuratesi.

⁸Jehoyakini akanga ava namakore gumi namasere paakava mambo. Akatonga kwemwedzi mitatu ari muJerusaremu. Zita raamai vake rainzi Nehushita mwanasikana waErinatani wokuJerusaremu.

⁹Iye akaita zvakaipa zvisingadiwe naTenzi achitevedzera zvakaitwa nababa vake.

¹⁰Panguva iyoyo machinda aNebhukadhineza mambo weBhabhironi akakwira kuJerusaremu akarikomba.

¹¹Nebhukadhinezari mambo weBhabhironi akavinga guta irori, machinda ake akarikomba.

¹²Jehoyakini mambo wokwaJudha akazviisa mumaoko amambo weBhabhironi, iye naamai vake namakurukota navanakomana vake navakuru vakuru vomumuzinda make. Mambo weBhabhironi akamuita mubatwa wake mugore rechisere rokutonga kwake.

¹³Akatakura upfumi hwose hwomumba yaTenzi noupfumi hwomumuzinda wamambo. Akajajada midziyo yose yendarama yaiva mumba yaTenzi kuita zvidimbu zvidimbu. Ndiyo midziyo iya yakanga yagadzirwa naSoromoni mambo weIsiraeri sokutaura kwakanga kwaita Tenzi.

¹⁴Akatapa Jerusaremu yose vaiti: vana vamambo vose namagamba ose okurwa vari nhapwa dzaisvika gumi rezviuru, kwoti nyanzvi dzokugadzira zvinhu nemhizha dzoutare. Hapana akasara kusiya chete varombowo zvavo vokupedzesera chaivo vomunyika imomo.

¹⁵Akatakura Jehoyakini kuBhabhironi naamai vake iye mambo navakadzi vamambo namakurukota ake namadzishe omunyika iyi akavatapa muJerusaremu akaenda navo kuBhabhironi.

¹⁶Mambo weBhabhironi akatapa magamba ose okurwa aisvika zviuru zvinomwe nenyanzvi dzokugadzira zvinhu nemhizha dzoutare vaisvika chiuru akaenda navo kuBhabhironi. Vose ivava vaiva vanhu vakasimba vakasvikawo chaivo vaigona kurwa muhondo.

¹⁷Mambo weBhabhironi akaita Mataniya babamudiki waJehoyakini mambo panzvimbo pake akamusandura zita omutumidza rokuti Zedhekiya.

¹⁸Zedhekiya akanga ava namakore makumi maviri nerimwechete paakava mambo. Akatonga kwemakore gumi nerimwechete ari muJerusaremu. Zita raamai vake rainzi Hamutari mwanasikana waJeremiya wokuRibhuna.

¹⁹Iye akaita zvakaipa zvisingadiwe naTenzi achitevedzera zvose zvakanga zvaitwawo naJehoyakimu.

²⁰Zvakazosvitsa pokuti Tenzi abvise Jerusaremu nenyika yevokwaJudha pameso pake pamusana pokushatirwa kwaakanga aita. Zedhekiya akazopandukira mambo weBhabhironi.