Read Bhaibhiri Idzva rechiShona 1 Nhoroondo 11 Bible Online

1 Nhoroondo 11 - Bhaibhiri Idzva rechiShona bible

1 Nhoroondo 11

¹VokwaIsiraeri vose vakauya kuna Dhavhidhi kuHebhuroni vakati, “Zvamunoona izvozvi tiri hama nehama, vanhu veropa rimwechete chairo nemi.

²Kare kaya, kunyange Sauro paakanga achiri mambo, ndimi maimhanya-mhanya nebasa rokutungamiririra Isiraeri kuhondo uyewo Tenzi, Mwari wenyu akakutii, ‘Imi ndimi muchava mufudzi wavanhu vangu vaIsiraeri, muchava ishe weIsiraeri.’ ”

³Ndizvo zvakaunza vakuru vakuru vokwaIsiraeri vose kuna mambo kuHebhuroni ndokubvawo Dhavhidhi aita chibvumirano navo kuHebhuroni, ikoko pana Tenzi. Vakagadza Dhavhidhi umambo hwokwaIsiraeri sokutaura kwakaita Tenzi nomuromo waSamueri.

⁴Dhavhidhi neIsiraeri yose vakaenda kuJerusaremu ndiro guta rimwechetero rinonzi Jebhusi, kwaiva navaJebhusi vagari vomunyika iyoyo.

⁵Vagari vomuJebhusi vakati kuna Dhavhidhi, “Muno haumupindi.” Zvakadaro zvazvo Dhavhidhi akakurira guta retsvingo reZioni ndorakarero rinonzi Guta raDhavhidhi.

⁶Dhavhidhi akati, “Anenge angoita wokutanga kurwisa vaJebhusi ndiye achava changamire nomutungamiriri wehondo.” Joabhu mwanakomana waZeruya ndiye akabva ava wokutanga kukwirako nokudaro akabva ava changamire.

⁷Dhavhidhi akagara munzvimbo yokuhwanda hondo, ndokusaka rakatumidzwa zita rokuti Guta raDhavhidhi.

⁸Akavaka guta iri kuritenderedza kubvira pachimudhuri chemavhu kutenderera rose. Joabhu akagadzira kumwe kwose kweguta iri kwakanga kwasara.

⁹Ukuru hwaDhavhidhi hwakaramba hwongoenderera mberi nokuti Tenzi, wehondo nehondo aiva naye.

¹⁰Zvino vano ava ndivo vakuru vakuru vemagamba aDhavhidhi okurwa hondo vaimutsigira kwazvo muumambo hwake pamwechete neIsiraeri yose kuti ave mambo sokutaura kwakanga kwaita Tenzi nezveIsiraeri.

¹¹Iyi ndiyo nhoroondo yemagamba aDhavhidhi okurwa hondo: kunoti Jashobheamu wokuHakimoni. Pautatu hwavo ndiye aiva mukuru. Akarwisa mazana matatu avarume akavauraya nepfumo rake muhondo imwechete.

¹²Aitevedzerwa naEreazari mwanakomana waDhodho wokuAhohi.

¹³Ndiye akanga aina Dhavhidhi kuPasidhamimu kwakanga kwaunganwa nevaFirisitia kuzorwa hondo. Pakanga paine munda waiva nekoroni. Varwi ndopavakadzvamuka kutiza vaFirisitia.

¹⁴Ivo[15] vakamira nomunda iwoyo vachiudzivirira vakauraya vaFirisitia. Tenzi akaita basa guru rokuvanunura.

¹⁵Pavakuru — vakuru makumi matatu vamwe vavo vatatu vakasvika kudombo kuna Dhavhidhi kubako reAdhuromu. Izvozvo matendhe evaFirisitia akanga akadzikwa mubani revaRefaimu.

¹⁶Izvozvo Dhavhidhi akanga achiri munhare yakavakirirwa. Chimwe chikwata chavarwi vechiFirisitia chakanga chiri kuBetirehemu.

¹⁷Dhavhidhi akanzwa nenyota akati dai waro pangowana mumwe anonditekera mvura yokunwa kutsime rokuBetirehemu riri pedyo nesuwo guru raro.

¹⁸Magamba okurwa aye ari matatu akatyoredzera nomumatendhe evaFirisitia imomo akandoteka mvura kutsime rokuBetirehemu riri pedyo nesuo guru racho. Vakaichera vakauya nayo kuna Dhavhidhi asi Dhavhidhi akaramba kuinwa akaiteurira pasi kuna Tenzi

¹⁹achiti, “NaMwari wangu chaiye, handifanire kumbofa ndakaita chinhu chakadai. Iropaka iri upenyuka uhu hwavanhu vaendako, nokuti vatopinzaka ava upenyu hwavo munjodzi.” Naizvozvo akaramba kuinwa. Izvozvi izvi ndizvo zvakaitwa namagamba matatu aya.

²⁰Abhishai munun'una waJoabhu ndiye aiva mukuru mukuru wavo vari makumi matatu. Akarwisa varume mazana matatu nepfumo rake akavauraya akazviwanira zita pamwechete navatatu vaya.

²¹Ndiye aiva nomukurumbira kwazvo pamakumi matatu avo ndokubva ava mukuru-mukuru wavo, asi pavatatu vaya haana kupasvika.

²²Bhenaya mwanakomana waJehoyadha wokuKabhuzieri ndiyewo aiva rimwe gamba rokurwa, nyakuita mabasa makuru kwazvo. Akauraya shumba chaidzo dzavanhu vaviri vokuMoabhu. Akapindawo mugomba akauraya shumba musi wakanga wadonha chando.

²³Akaurayawo mumwe muIjipiti, murume chaiye akasvika. MuIjipiti uyu akanga akabata pfumo muruoko asi Bhenaya akamuvinga netsvimbo. Akatorera muIjipiti pfumo, ndokubva amuuraya nepfumo rake iroro.

²⁴Izvozvi izvi ndizvo zvakaitwa naBhenaya mwana waJehoyadha akazviwanira zita pamwechete namagamba matatu aya.

²⁵Iyeyu uyu aivawo nomukurumbira pamwechete navaya makumi matatu. Asi pavatatu vaya haana kupasvika. Dhavhidhi akamuita mukuru-mukuru wevokuchengetedza iye mambo.

²⁶Magamba okurwa muzvikwata zvavo zvehondo ndeaya anoti: Asheri munun'una waJoabhu naErihanani mwanakomana waDhodho wokuBetirehemu

²⁷naShamoti wokuHarodhi naHerezi wokuPeroni

²⁸naIra mwanakomana waIkeshi wokuTekowa naAbhiezeru wokuAnatoti

²⁹naSibhekai muHushati naIrai muAhohi

³⁰naMaharai wokuNetofa naHeredhi mwanakomana waBhaana wokuNetofa

³¹naItai mwanakomana waRibhai wokuGibheya kwaBhenjamini naBhenaya wokuPiratoni

³²naHurai wokumakoronga wokuGaashi naAbhieri muAribhati

³³naAzimavheti wokuBhaharumu naEriyabha wokuShaoribhoni

³⁴navanakomana vaHashemu wokuGizoni naJonatani mwanakomana waShage wokuHarari

³⁵naAhiyamu mwanakomana waSakari wokuHarari naErifari mwanakomana waUru

³⁶naHeferu muMumekeri naAhiya muPeroni

³⁷naHeziro wokuKarimeri naNaarai mwanakomana waEzibhai

³⁸naJoeri mukoma nomunun'una naNatani naMibhari mwanakomana waHagiri

³⁹naZereki muAmoni naNaharai wokuBheroti mutakuri wezvombo zvehondo zvaJoabhu mwanakomana waZeruya

⁴⁰naIra wokuItira naGarebhu wokuItira

⁴¹naUriya muHiti naRabhadhi mwanakomana waAhirai

⁴²naAdhina mwanakomana waShiza wokuRubheni aiva mutungamiriri wokwaRubheni, chikwata chake chiri makumi matatu avanhu

⁴³naHanani mwanakomana waMaaka naJoshafati muMitini

⁴⁴naUziya wokuAshiteroti Shama naJeieri vanakomana vaHotamu wokuAroero

⁴⁵naJedhiyaeri mwanakomana waShimiri nomunun'una wake Jaha muTizi

⁴⁶naErieri wokuMahavhi naJeribhai naJoshavhiya vanakomana vaErinaamu naItima wokuMoabhu

⁴⁷naErieri naObhedhi naJaasieri wokuMezobha.