Read Bhaibhiri Idzva rechiShona 1 Nhoroondo 16 Bible Online

1 Nhoroondo 16 - Bhaibhiri Idzva rechiShona bible

1 Nhoroondo 16

¹Vakaunza bhokisi raMwari rechitenderano vakariisa mukati metendhe rarakanga ragadzirirwa naDhavhidhi vakapira zvibayiro zvokupisa nemipiro yokuwadzana pana Mwari.

²Dhavhidhi paakapedza kupira mipiro yokupisa nemipiro yokuwadzana, akakomborera vanhu nezita raTenzi

³akagoveranisa vanhu vose veIsiraeri varume navakadzi zvokudya zvinoti chingwa nenyama yechirango[17] nezvitsumbu zvamagirepisi akaomeswa.

⁴Chimwewo ndechokuti, akasarudza vamwe vaRevhi kuti vashande pamberi pebhokisi raTenzi rechitenderano vapote vachinamata nokutenda nokurumbidza Tenzi, Mwari weIsiraeri.

⁵Asafu ndiye aiva mutungamiriri wacho achitevedzerwa naZekariya naJeieri naShemiramoti naJehieri naMatitiya naEriyabhu naBhenaya naObhedhiedhomu naJeieri vaiva vokuridza madimbwa nezvipendani. Asafu ndiye aiva wokuridza makwakwakwa outare,

⁶Bhenaya naJahazieri vapristi, vari vokuramba vachiridza mabhosvo pamberi pebhokisi raMwari rechitenderano.

⁷Musi iwoyo Dhavhidhi akazoudza Asafu nehama dzake kuti vaimbire Tenzi rwiyo rwokutenda Tenzi vachiti:

⁸“Tendai Tenzi munamate kwaari nezita, muzivise mabasa ake kundudzi dzavanhu!

⁹Muimbirei, mumurumbidze nenziyo, mutaure zvishamiso zvaakaita!

¹⁰Pururudzai muzita rake rinoera, mwoyo yavanotsvaka Tenzi ipembere nokufara.

¹¹Nekairai kutsvaka Tenzi mutsvakewo simba rake, shungu yokuda kuva pana Tenzi ngaive mugariro.

¹²Rangarirai zvishamiso zvaakaita, zviratidzo nemirao zvakabuda mumuromo make.

¹³Imi chizvarwa chaAbhurahamu muranda wake, imi vana vaJakobho vasarudzwi vake.

¹⁴Iyeyu Tenzi ndiye Mwari wedu mirao yake hakuna kwaisiri pasi pose.

¹⁵Rangarirai nokusingapere chitenderano chake, shoko raakati richengetwe kunyange, kusvikira kuchizvarwa chavanhu chechiuru,

¹⁶chitenderano chaakaita naAbhurahamu, chitsidzo chaakaita kuna Isaki;

¹⁷chaakazvisunga nacho somurao kuitira Jakobho, sechitenderano chake naIsiraeri, chokugara nokugara

¹⁸achiti: ‘Ndichakupa nyika yeKanani somugove wako wenhaka.’

¹⁹Ipapo vakanga vachiri katsama chete, vanhu vashomanana, vatorwa zvavo;

²⁰vachidzunga nawo marudzi akasiya-siyana vachideva namo mumadzimambo nomumarudzi avanhu akasiyana-siyana.

²¹Zvokuti pave neanovabata zvakaipa akaramba, pamusana pavo aitsiura madzimambo

²²achiti: ‘Musambobata-bata zvenyu vangu vandakazodza, vaporofita vangu musawane chamunoita kwavari.’

²³Pasi pose zvapo ngapaimbire Tenzi. Paridzai ruponeso rwake zuva nezuva.

²⁴Rondedzerai marudzi avanhu zvembiri yake, nokundudzi dzose zvishamiso zvaakaita,

²⁵nokuti Tenzi mukuru anofanira kurumbidzwa chaizvo. Pavamwari vose zvavo ndiye chete anofanira kutyiwa

²⁶nokuti vamwari vose vamarudzi ndavamwari vechipameso. Asi Tenzi ndiye akasika matenga,

²⁷chiremera nembiri ndezvake, musha wake wakasimba, musha werufaro.

²⁸Ipai Tenzi imi mhuri dzose dzavanhu, ipai Tenzi mbiri noukuru.

²⁹Mbiri ngaiende kuna Tenzi, mbiri inokodzerana nezita rake. Takurai chipo muuye nacho paari. Pfugamirai Tenzi mune hanzu dzoutsvene.

³⁰Pasi pose zvapo ngapadedere mberi kwake, nyika yakanyatsosimba haitsukunyuki.

³¹Matenga ngaafare, nyika izare nokufara, marudzi adure pachawo kuti, ‘Tenzi ndiye mutongi!’

³²Gungwa ngaritinhire nezvosewo zvizeremo, sango ngarifare kwazvo nezvosewo zvirimo.

³³Miti yomusango ichadaidzira nokufara, kufarira Tenzi nokuti anouya kuzotonga nyika.

³⁴Tendai Tenzi nokuti akanaka mwoyochena wake hauperi.

³⁵Itiiwo, ‘Tiponeseiwo nhai Mwari ndimi Mwari anotiponesa. Tikokorodzeiwo mutinunure mukati mamarudzi tikwanise kutenda zita renyu rinoera tipembere kufara mukukurumbidzai kwatinoita

³⁶Tenzi ngaarumbidzwe, narini narini Mwari weIsiraeri.’ ” Vanhu vose vakati, “Ameni,” vakarumbidza Tenzi.

³⁷Dhavhidhi akazosiya Asafu nehama dzake ikoko pamberi pebhokisi rechitenderano raTenzi kuti vagare vachishanda pamberi pebhokisi rechitenderano basa rainge richifanira kuitwa zuva nezuva.

³⁸Akasiyawo Obhedhiedhomu nehama dzake makumi matanhatu navasere. Obhedhiedhomu mwanakomana waJedhutuni naHosa ndivo vaifanira kuva vachengetedzi vokusuo guru.

³⁹Akasiyawo mupristi Zadhoki nehama dzake vapristi patendhe rinoera raTenzi panzvimbo iya yakatunhumara yokuteurira yaiva kuGibheoni

⁴⁰kuti vapire mipiro yokupisa kuna Tenzi paatari pokupisira mipiro nguva dzose kumangwanani nokumanheru maererano nezvakanyorwa mumutemo waTenzi waakapa Isiraeri.

⁴¹Vaivawo naHemani naJedhutumu navamwe vakanga vasarudzwa vachiita zvokudomwa namazita kuti vapote vachitenda Tenzi nokuti mwoyochena wake hauperi.

⁴²Hemani naJedhutumu vaiva namabhosvo nemakwakwakwa midziyo yokuridza nokuimbisa, nziyo dzinoera. Vana vokwaJedhutumu ndivo vakapiwa basa rokuchengeta pasuo guru.

⁴³Vanhu vose vakati uyu kwake uyu kwake kuenda kumisha yavo. Dhavhidhi akadzokera kumuzinda wake kundokomborera mhuri yake.