Read Bhaibhiri Idzva rechiShona 1 Nhoroondo 23 Bible Online

1 Nhoroondo 23 - Bhaibhiri Idzva rechiShona bible

1 Nhoroondo 23

¹Dhavhidhi paakanga zvino akwegura mazuva ake aendadzanawo kwazvo, akagadza mwanakomana wake Soromoni umambo hweIsiraeri.

²Dhavhidhi akaunganidza vatungamiriri vose veIsiraeri navapristi nevaRevhi.

³Kwakaverengwa vokwaRevhi, kubvira pane vane makumi matatu amakore zvichikwira pakaita makumi matatu ezviuru zvavarume ane zviuru zvisere.

⁴Dhavhidhi akati, “Makumi maviri ezviuru ane zviuru zvina zvaivava ava ngavave vokuona nezvebasa repamba yaTenzi, zviuru zvitanhatu vova vakuru vakuru navatongi,

⁵zviuruwo zvina vave vachengetedzi vokumisuo mikuru, vamwe zviuru zvinawo vari vokurumbidza Tenzi nezvokuridzisa mumhanzi zvandakagadzirira kurumbidza.”

⁶Dhavhidhi akavaronga mumapoka zvichifambirana navanakomana vokwaRevhi achiti vokwaGerishomu nevokwaKohati nevokwaMerari.

⁷Vanakomana vokwaGerishomu paiti Radhani naShimei.

⁸Vanakomana vaRadhani ndiJehieri mukuru wacho, naZetamu naJoeri, vatatu.

⁹Vana vaShimei vakomana ndiSheromoti naHazieri naHarani pautatu hwavo kudaro. Ivava ndivo vaiva vatungamiriri vedzimhuri dzokwaRadhani.

¹⁰Vanakomana vaShimei ndiJahati naZina naJeushi naBheriya. Ivava vari vana kudai ndovanakomana vaShimei.

¹¹Johati ndiye mukuru wacho, wechipiri ari Ziza. Asi Jeushi naBheriya vaiva vasina vana vakomana vazhinji nokudaro vakazongozikanwa savanhu vemhuri imwechete.

¹²Vanakomana vaKohati ndiAmuramu naIzhari naHebhuroni naUzieri vari vana kudaro.

¹³Vanakomana vaAmuramu ndiAroni naMosesi. Aroni akatsaurwa kuti ave ndiye wokuteketera kuna Mwari zvinhu zvinoera kwazvo kuti iye navanakomana vokwake vave vokupisa rusenzi pana Tenzi narini wose uye kumushandira nokukomborera vanhu muzita rake nokusingaperi.

¹⁴Asi vanakomana vaMosesi munhu waMwari mazita avo aitaurwa mukati mevedzinza rokwaRevhi.

¹⁵Vana vaMosesi vakomana ndiGerishomu naEriezeru.

¹⁶Vanakomana vaGerishomu ndiShebhueri mukuru wacho.

¹⁷Vanawo vakomana vaEriezeru ndiRehabhiya mukuru wacho. Eriezeru uyu aiva asina vamwe vana vakomana, asi Rehabhiya aiva nezanzwe ravanakomana kuwanda.

¹⁸Vanakomana vaIzhari ndiSheromiti mukuru wacho.

¹⁹Vanakomanawo vaHebhuroni ndiJeriya mukuru wacho wechipiri ndiAmariya, wechitatu ari Jahazieri, Jekameamu ariye wechina wacho.

²⁰Vanakomana vaUzieri ndiMika mukuru wacho wechipiri ari Ishiya.

²¹Vana vaMerari vakomana ndiMahiri naMushi. Vanakomana vaMahiri ndiEreazari naKishi.

²²Ereazari akafa asina vana vakomana aingova navana vasikana chete. Hama dzavo, vanakomana vaKishi ndivo vakavaroora.

²³Vanakomana vaMushi ndiMahiri naEdheru naJerimoti pautatu hwavo kudaro.

²⁴Ivava ndivo vanakomana vokwaRevhi imba nemba vari vatungamiriri mudzimhuri dzokwavo. Ndouwandi hwavo sokunyorwa kwavo mazita munhu nomunhu vachiverengwa kubvira vane makumi maviri amakore okuberekwa navaipfuura ipapa vokuzoita basa romumba yaTenzi

²⁵nokuti Dhavhidhi akareva paakati, “Tenzi, Mwari weIsiraeri aita kuti vanhu vake vave norunyararo uyewo iye aita Jerusaremu musha wake narini wose.

²⁶Chimwezve ndechokuti kuvaRevhi, basa rokutakura tendhe rinoera kana mumwe mudziyo zvawo wokushandisamo hapachisina.”

²⁷Pamusana pemazwi aya aDhavhidhi okupedzesera, vaRevhi vakaverengwa vaibvira pamakore makumi maviri zvichikwira.

²⁸Saka basa ravo rakanga rava kuzova rokubatsira vanakomana vokwaAroni kushanda pamba yaTenzi nokuchengetedza zvivanze zvacho, nedzimba dzepo nokuchenura zvose zvinoera nokuita basa rose rose zvaro repamba yaMwari;

²⁹nokubatsirawo pachingwa chokuisa pana Tenzi uye upfu hwekoroni hwakanyatsokuyiwa hwomupiro wembesenwa nechingwa chakati fatata chisina mbiriso nomupiro wokubika nomupiro waikanyiwa namafuta eorivhi uyewo kupima uwandi nokuera mwero yemhando nemhando dzose dzezvinhu.

³⁰Ndivo zvino vakanga vava vokumira mangwanani oga oga vachitenda Tenzi vachimurumbidza, manheru voitawo zvimwechetezvo;

³¹napose paipirwa kuna Tenzi mipiro yokupisa pamisi yeSabata neyokugara kwemwedzi namamwe mazuva makuru zvichifambiranawo nouwandi hwavo sezvavakanzi vagare vachiita pana Tenzi.

³²Uyewo ndobasa ravainge vofanira kuita rokuonawo nezvetendhe rokusanganira nenzvimbo inoera vachitumwa navanakomana vaAroni hama dzavo kuitira basa repamba yaTenzi.