Read Bhaibhiri Idzva rechiShona 2 Nhoroondo 10 Bible Online

2 Nhoroondo 10 - Bhaibhiri Idzva rechiShona bible

2 Nhoroondo 10

¹Rehobhoamu akaenda kuShikemu kwakanga kwakaunganwa neIsiraeri yose kundomugadza umambo.

²Jerobhohamu mwanakomana waNebhati paakazvinzwa zvake achiri kuIjipiti sezvo akanga achiri kuIjipiti ikoko kwaakaenda atiza mambo Soromoni,

³vakamutumira nhume kundomudaidza. Jerobhoamu uyu nevokwaIsiraeri vose vakasvikopira nyaya yavo kuna Rehobhoamu vachiti,

⁴“Baba venyu vakatiremedza nejoko rinorema. Zvino dai mukatirerutsirawo basa rababa venyu rakaoma kudai nejoko ravo rinorema ravakaisa patiri tigokushandirai zvedu.”

⁵Iye akati, “Mozodzoka zvenyu kwandiri kwapera mazuva matatu.” Nokudaro vanhu ava vakaenda zvavo.

⁶Mambo Rehobhoamu akandobvunza mazano kune vechikuru chikuru vaimbova makurukota kuna Soromoni baba vake pavakanga vachiri vapenyu achiti, “Zano ramunondipa kuti ndipindure vanhu ava nderipi?”

⁷Ivo vakati kwaari, “Zvanhasi uno izvi kana mukabvuma zvenyu kuitira vanhu ava tsiye nyoro, mukavafadza mukataura navo zvakanaka naivowo vachava varanda kwamuri mazuva ose.”

⁸Asi iye akasiya zano raakapiwa nevechikuru chikuru ava akandobvunza mazano kune vechidiki vaakakura navo vakanga vava zvino makurukota ake.

⁹Akati kwavari, “Ko zano ramunondipa kuti ndipindure vanhu ava nderipi vakanditi, ‘Tirerutsireiwo joko rakaiswa nababa venyu patiri.’ ”

¹⁰Vechidiki vaakakura navo ava vakamuti, “Udzai vanhu ivavo vakakutii, ‘Baba venyu vakatiremedza nejoko rinorema dai mukachitirerutsirawo, kuti kasiyanwa kangu kakobvu pane chiuno chababa vangu.’

¹¹‘Zvino baba vangu vakakuremedzai nejoko rinorema, handiti! Ini ndichatoripamhidzira. Baba vangu vaikurovai neshamhu, handiti! Ini ndichakurovai netyava ine minzwa yerukato.’ ”

¹²Saizvozvo Jerobhoamu navanhu vose vakadzokera kuna Rehobhoamu pazuva retatu racho sokutaura kwakanga kwaita mambo kuti mugozodzoka kwandiri kwapera mazuva matatu.

¹³Mambo akavapindura nehasha achisiya zano revechikuru vaya.

¹⁴Akataura kwavari achitevera zano riya raakapiwa nevechidiki achiti, “Baba vangu vakakuremedzai nejoko rinorema, handiti! Ini ndichatoripamhidzira. Baba vangu vakakurovai neshamu, handiti! Ini ndichakurovai netyava ine minzwa yekananga.”

¹⁵Nokudaro mambo haana kunzwa chichemo chavanhu ivava nokuti maitikiro aya ezvinhu akanga auyiswa naMwari kuti Tenzi azadzikise shoko rake raakanga ataura nomuromo waAhiya wokuShiro kuna Jerobhoamu mwanakomana waNebhati.

¹⁶VokwaIsiraeri vose pavakaona kuti mambo haana kunzwa chichemo chavo, vanhu vakapindura mambo vachiti, “Isu muna Dhavhidhi, mugove wedu ndowei chaizvo? Hatina isu nhaka mumwana waJese. VokwaIsiraeri, munhu wose kumusha. Iwe Dhavhidhi, zvomumba mako wochizvionera.” VakwaIsiraeri ndiye shapu kuenda kumusha.

¹⁷Asi vaIsiraeri vaigara mumaguta okwaJudha ndivo vaitongwa naRehobhoamu.

¹⁸Mambo Rehobhoamu akatuma Adhoramu mumwe mukuru mukuru wezvebasa rechibharo. Vanhu vokwaIsiraeri vakamutema namatombo akabva afa. Mambo Rehobhoamu ndopaakabva ati nokuchimbidza ngoro yake yehondo karakata ndiye kuJerusaremu ware kutiza.

¹⁹Saizvozvo vokwaIsiraeri vakapandukira imba yokwaDhavhidhi kusvikira pari nhasi.